1 Indji ondji ri ombuze Muhona ndja vandururira omuprofete Habakuk motjirimunikise.
Habakuk ma unaunine ouhasemba
2 Muhona, hi ningire ombatero kove tungapi kutja u ndji vatere; nu hi urakane ondjamo kove tungapi kutja u ndji yame kozondjito zoutwe? 3 Okutjavi tji u ndji munisa ouhasemba nai? Okutjavi tji u ha kara ko na tja noṋiṋikizire ombi otja indji? Omayandekero nozondjito zoutwe vye ndji kovera akuhe, nu poṋa apehe pe novirwa nozombata. 4 Omatwako opu ya ngundiparera, nousemba opu u he tji tjitirwa. Ovarunde ve kondoroka ovasemba novineya, nousemba opu u kamunikira aayo kawo.
Eziriro ra Muhona
5 Muhona wa tja nai kotjiwaṋa tje: “Yevayeveye mokati koviwaṋa mutjevere nawa, neṋe mamu kumisiwa i imbi mbi mamu munu. Ami me tjiti otjiṋa tji mu hi nokukambura, nandi mwa serekarererwa tjo. 6 Ami me sekamisa Ovababilon ve rire ovanauvara, ihi otjiwaṋa otjindandi notjirwe. Owo mave tuurunga ouye amave havere omahi warwe. 7 Owo otjiwaṋa otjitirise notjiurumise, nu momeritongamisiro wawo owo ve rizikira omatwako wawo oveni.
8 “Oukambe wOvababilon mbo u novikara povitotongwe nu oundandi pozombungu nḓa ṱondjara. Ovakavire vawo mave kavire okuza komahi wokokure; oukambe wawo u tupuka tjinene. Owo mave rauka otja ozonguvi nḓu maze wirire potjiriwa tjazo.
9 “Ovimbumba vyovita vyOvababilon mba mavi utukire okuyekutjita outwe, novandu avehe mave vi tira tji mavi rauka. Ovahuurwa vawo ovengi tjinene tjimuna eheke. 10 Owo mave nyengwa ozombara nave nyekerere ozohivirikwa; kape notjiṱunga tji matji ve tjaere, mave tji tungire ozondunduvahi ave tji kambura. 11 Tjazumba otji mave hingi otja otjivepo ave zengi, imba ovandu mbe vara omasa wawo otja nge ri omukuru wawo.”
Habakuk ma unaunine Muhona rukwao
12 Muhona, okuza kombutiro, tjiri, oove Ndjambi. Oove Ndjambi wandje, Omuyapuke nu waaruhe. Muhona, Ndjambi nOmuyame wandje, ove wa toorora Ovababilon no ve pe omasa kokutja ve sore okutupangura nokutuvera. 13 Nungwari pe ya vi kutja ove u zare ovandu ovavi novarunde mba? Omeho woye omayapuke tjinene nai nga tji ye hi nokusokutara mourunde, nove ko nokusora okuzara ovandu mbe tjita outwe. Okutjavi tji wa mwina owo ngunda amave yandeke otjiwaṋa otjisemba tjinene pu wo?
14 Okutjavi ove tji u ṱuna ovandu otja ozohi poo otja ehapu roupuka mbu honahona pehi nu mbu hi nomunane okuuhongorera? 15 Ovababilon ve pata ovandu nozongoorero aayo owo ozohi. Owo ve ve kokozora mozombate okuvetwara, nu ve ravaera nondjoroka komapatero wawo ngu va tjiti. 16 Owo ve rikotamena nangarire kozombate zawo nave ze punguhire ozombunguhiro, ozombate zawo tjinga aze ve pa outumbe ouingi novikurya vyombyarero.
17 Owo mave ungurisa omangaruvyo wawo nga aruhe nokukara pokuzepa omihoko nokuhinotjari are?
© Herero Revision Bible © Bible Society in Namibia, 2021.
