Muhona eye Ndjambi erike
1 Muhona ma tja nai:
“Puratena nambano, Israel, mukarere wandje,
tjiwaṋa tjandje tji mba toorora,
zondekurona za Jakob.
2 Owami Muhona ngu mbe ku mema;
ami mbe ku vatera okuza koruveze ndu wa kwatwa.
O tira; oove omukarere wandje,
otjiwaṋa tjandje otjitoororwa tji mba suvera.
3 “Ami me yandja omeva kehi nda ṱonyota,
nu me pupisa omipupo mehi nda kukuta.
Me tirire Ombepo yandje kozondekurona zoye,
nondaya yandje kovanatje voye.
4 Owo mave nyomoka tjimuna ehozu ndi tjatjwa nawa,
tjimuna omikaru meṋe yonḓonḓu ndji pupa.
5 “Ovandu koumweumwe mave tja:
‘Owami owa Muhona.’
Owo mave ya okuwana notjiwaṋa tja Israel.
Auhe ma tjanga ena ra Muhona meke re,
nu me rihungirire omuini kutja
eye iumwe wotjiwaṋa tja Ndjambi.”
6 Muhona ngu honaparera Israel,
nu ngu mu yama,
Muhona Omunamasaaehe, ma tja nai:
“Owami omutenga, nomusenina, Ndjambi erike;
kape na Ndjambi warwe posi yandje.
7 Pena Ndjambi warwe ngwatja yenena okuungura
imbi ami mbi mba ungura are?
Owaṋi ngwatja yenena okuuka avihe,
mbi mavi tjitwa okuza kombutiro
nga kondjandero yoruveze?
8 Amu tira, tjiwaṋa tjandje!
Eṋe mamu tjiwa kutja okuza korukuru
nga ku nambano ami mba uka oviṋa avihe,
mbi mavi tjitwa, neṋe oweṋe ovahongononene vandje.
Pena Ndjambi warwe posi yandje are?
Pena Ndjambi umwe Omunamasa
ngu mbi hi na mba zuvire are?”
Oviserekarera vyovisenginina mavi nyekererwa
9 Avehe mbe ungura oviserekarera vyovisenginina owo oviporoporo, noomukuru mbu ve hiva tjinene nai, owo oviṋa uriri. Imba mbe rikotamena koomukuru mba owo ovapoṱu nu kave nondjiviro, nowo mave ṱisiwa ohoṋi. 10 Okuungura otjiserekarera tjotjitenda okurikotamena ku tjo otja omukuru oko kaku nombatero. 11 Auhe ngu me rikotamene ku tjo ma ṱisiwa ohoṋi. Imba mbe ungura oviserekarera vyovisenginina owo ovandu uriri. Ngave ye ve pangurwe; owo mave urumisiwa, nokuyambururwa.
12 Omuungure wovitenda ma toora otjindimbu tjotjitenda ne tji twa momuriro. Okuoko kwe okunamasa maku toora otjihambure okutona na tjo otjitenda momuhapo omusemba. Eye tji ma ungura ma ṱondjara nonyota na urwa.
13 Omuhonge womiti u saneka omuti nongoze. Ma saneke otjiserekarera notjitjange, e tji korora noviungurise vye ne tji ungura momuhapo womundu, omundu omuwa ngu ma tuwa mondjuwo ye. 14 Porumwe eye ma ke orupapa okuungura na rwo poo ma toorora omumbonde momahwa poo ma kunu omuparara na undju ombura okuuhapisa. 15 Omundu u teya ozonguṋe komuti a yakisa na zo omuriro, nu wina pu zo u ungura po otjiserekarera tjotjisenginina; orutau rumwe rwozonguṋe u yakisa na rwo omuriro okuwota nokutereka na rwo ozomboroto, nu porutau orukwao u ungura po omukuru ne rikotamene ko. 16 Eye u yakisa omuriro nozonguṋe tjiva, a tereke onyama, a ri ne kuta. Eye u wota omuriro na tja: “Oupyu ouwa! Omuriro watjike omuwa nai!” 17 Nu pozonguṋe nḓa hupu u ungura po otjiserekarera tjotjisenginina ne rikotamene ku tjo, u kumba ku tjo a tja: “Oove omukuru wandje, ndji yama!”
18 Ovandu ohamukwao na imba owo omayova okutjiwa imbi mbi mave ungura. Owo ve pata omeho wawo nomitima vyawo okumuna imbi mbi ri ouatjiri. 19 Omuungure woviserekarera vyovisenginina ke nozondunge poo ondjiviro okurihungirira nai: “Ozonguṋe tjiva mba yakisa; mbi tereka ozomboroto momazuko nu mba tereka onyama ne ri; nozonguṋe nḓa hupu mba ungura po otjiserekarera tjotjisenginina. Owami ngwi, mbe ripete kotjihenḓe tjomuti.”
20 Okuriyameka kotjiṋa tjomungandjo kwa sana nokurya omutwe. Omeripuriro we wouyova ye mu pukisa nga tje hi nokusokuvaterwa. Eye kamaa itavere omuini kutja otjiserekarera tje na tjo meke re, otjo kamukuru oparukaze.
Muhona, eye Omuute nOmuyame
21 Muhona ma tja nai:
“Israel, zemburuka otjiṋa hi;
zemburuka kutja oove omukarere wandje!
Ami mbe ku memena okurira omukarere wandje,
nu himee ku zembi ko.
22 Ami mba zemisa ozongatukiro zoye tjimuna otjikamba,
nourunde woye tjimuna ombundu.
Kotoka ku ami; ami owami ngu me ku yama.”
23 Yorokeye, oweṋe mayuru!
Nyandeye, oweṋe maukoto wehi!
Ravaereye nenyando,
oweṋe zondundu nomiti avihe vyomahwa!
Muhona wa raisa ouvara we
mokukutura otjiwaṋa tje Israel.
24 “Owami Muhona, Omukuture woye;
owami ngu mbe ku zezenga mezumo ranyoko.
Owami Muhona, Omuute woviṋa avihe,
ngu mba tandavarisa omayuru.
Tji mba ungurire ehi,
kapa ri omundu ngwe ndji vaterere.
25 Ami mbi raisira ozondjai kutja ozo oviporoporo;
nu mbi yovaparisa ovatjiwe vozonyose.
Mbi teyaura omambo wozonongo,
nu mbi raisa kutja ondjiviro yawo oyo ouyova.
26 Nungwari omukarere wandje tji ma zuvarisa,
nami tji me hindi omuhindwa
okukaserekarera omeripuriro wandje,
ami me tjiti kutja omeripuriro
nomazuvarisiro ngo ye yenenisiwe.
Ami me raere Jerusalem kutja
ovandu mave tura mo rukwao,
nokutja ovihuro vya Juda mavi tungururwa,
mavi tungururwa movitambatundu vyavyo.
27 Ami mbi pwirisa omuronga
nozonḓonḓu nembo romarakiza.
28 Ku Kirus me tja nai:
‘Oove ngu mo honapara moruveze rwandje;
mo tjiti imbi ami mbi me vanga kutja u tjite.
Mo rakiza kutja Jerusalem tji tungururwe,
nokutja omazikameno
wondjuwo ya Muhona ye tungwe.’ ”
© Herero Revision Bible © Bible Society in Namibia, 2021.
