Deuteronomium 21 - Herero Revision Bible (HRR)

Omuzepe omuhatjiukwa

1 “Tji pa munika omundu ngwa ṱire mokuti, mehi Muhona, Ndjambi woye, ndi me ku pe ri rire ouini woye, nape ha tjiukwa kutja owaṋi ngwe mu zepa, 2 ovanane novapangure voye ngave pite okukasaneka omikambo pokati komuṱi novihuro vyopopezu. 3 Novanane votjihuro hi tji tji ri popezu tjinene na ingwi omuṱi, ngave toore ondana ondema ndji hiya ungurisiwa, nu ndji hiya kutirwa. 4 Nowo ngave i tware komukutu mbu nomupupo mbu ha pwire, nu mbu nehi, ndi ha taurirwe nu ndi ha kuninwe, nu imbo nga rire pu ve keiteyera engoti. 5 Ovapristeri, imba ovazandu va Levi, nga ve yende ngo, owo tjinga ave pangura otjiposa ngamwa atjihe tjotjitandi tjokuzepa. Muhona, Ndjambi woye, we ve toorora okumukarera nokusera ondaya mena re. 6 Novanane avehe votjihuro hi tji tji ri popezu tjinene na ingwi omuṱi, ngave kohere omake wawo kombanda yondana ndji ondema, yengoti nda teyerwa momukutu; 7 nowo ngave hungire amave tja nai: ‘Kaweṱe mbu twa zepa omundu ngwi, nu katu nokutjiwa kutja wa ṱu i aṋi. 8 Muhona, isira otjiwaṋa tjoye Israel tji wa kutura mOengipte. Tu isira, nu o tu vara otja ovanandjo konḓiro yomundu omuhinandjo ngwi.’ 9 Tji mo tjiti ihi tji tji ri osemba momeho wa Muhona, ko nakuvarwa otja omuzepe.

Ovakazendu mba huurwa movita

10 “Muhona, Ndjambi woye, tje ku pe outoṋi movita, nove tji wa huura ovandu vawo, 11 ngahino mokati kawo mo munu mo omukazendu ngu nomuhapo omuwa, ngu wa suvere nu ngu movanga okukupa. 12 Mu twara konganda yoye; nu nge rihore ozondjise motjiuru, ne rikonde ozonyara. 13 Nozombanda, nḓa ri na zo morutu tja za kouhuura, nge ze hukure, nu nga kare mondjuwo yoye ama riri ooihe na ina oure womueze umwe; tjazumba otji mo yenene okumukupa. 14 Nu kombunda, tji u hi nokuuhara amo mu vanga komurungu, mo sokumuesa a yende ku ma vanga; nungwari ko nakusokumurandisa kovimariva nokumutatumisa, ove tjinga awa rara pu ye.

Ousemba wotjiveri

15 “Nu tji pe nomurumendu worive ngu novakazendu vevari, umwe ngwa suvera na umwe ngwe ha suverere, nu aveyevari ave mu pandukire ovanatje ovazandu, nu ingwi otjiveri a rire womukazendu ngwi eye ngwe ha suverere, 16 tji ma tye otjirumatwa tje kovazandu ve, ke nakusokuyandja ousemba wotjiveri komuzandu womukazendu ngwi ngwa suvera kutja a ha kaerisa omuzandu womukazendu ngwi ngwe ha suverere, ngu ri otjiveri katjotjiri. 17 Nungwari ma sokurizemburuka nomuzandu womukazendu ngwi ngwe ha suverere kutja onguri otjiveri, e mu pe otukondwa tuvari okuisa mouini auhe, eye tjinga e ri everi romasa we, nousemba wouveri e ri owe.

Omuzandu otjirangaranga

18 “Tji pe nomundu ngu nomuatje omuzandu, ngu notjiuru otjikukutu notjirangaranga, nu ngu ha zuu kooihe na ina tji mave mu vere, 19 ovanene ve ngave mu tware kovanane votjihuro ho, a rire mbe ke mu pangura. 20 Nowo ngave katje nai kovanane: ‘Omuatje wetu ngwi u notjiuru otjikukutu notjirangaranga, nu ka zuu ku eṱe; eye omunwe womanuwa omazeu, nu omunyandise wotjimariva.’ 21 Tjazumba imba ovarumendu avehe votjihuro ho ngave mu zepe nomawe. Komuhingo mbwi otji mamu isa mo ouvi mbwi mokati keṋu; nOvaisrael avehe mave zuu otjiṋa hi, nave tira.

Omatwako pekepeke

22 “Tji pe nomundu ngwa pangurwa kokuṱa mena rourunde we, na ṱu, norutu rwe aru turikwa komuti, 23 nu orurova rwe aru rekareka komuti mbo ouṱuku auhe. Orwo ngaru pakwe meyuva tjingero, orondu omundu ngwa turikwa komuti, eye omusengwa komurungu wa Ndjambi. Paka orurova ndwi, kokutja o ha zunḓa ehi Muhona, Ndjambi woye, nde ku pa ri rire otjirumatwa tjoye.