Ovisenginina na Ndjambi watjiri
1 Tjiwaṋa tja Israel, purateneye kombuze Muhona ndji ma hungire ku eṋe. 2 Eye ma tja nai:
“Amu kongorere ozondjira zoviwaṋa,
nu amu urumisiwa i oviraisiro mbi ri kevaverwa,
nandarire kutja oviwaṋa vi vi tira.
3 Omazikamisiro wongamburiro
yoviwaṋa mbi owo oviporoporo.
Omuti u kewa mehwa,
nu u hongwa nekuva i omake womuhonge womiti.
4 Omuti mbwi u harekwa nosilveri nongoldo,
u paperwa nohamara nozomboha kutja au ha kurakura.
5 Ovisenginina otja imbi vi ri otja ovitirise
vyozonḓera motjikunino tjomatanga;
ovyo kavi hungire,
vi toorwa uriri, orondu kavi wondjo.
Amu vi tira; kavi nokumutjita otjipo,
nu wina kavi nokumutjita ouwa.”
6 Muhona, kape na umwe ngu ri otja ove;
oove omunamasa,
nu ena roye enene nu enauvara.
7 Owaṋi ngu hi nokuyozika ove,
ngu u ri Ombara yoviwaṋa avihe?
Ove wa pwa ondjozikiro.
Kape na umwe ngu ri otja ove
mokati kozonongo azehe zoviwaṋa
na mokati kozombara azehe zarwe.
8 Ovisenginina avihe mbi oviyova novihipa.
Omahongero wavyo kaye nozondunge.
9 Oviserekarera vyovisenginina vyawo
vya tuwa osilveri ndja zire kOtarsis,
nongoldo ndja zire kooUfas;
ovyo avihe oviungura vyonongo,
nu vya zarisiwa ozombanda
ozondovazu nozoserarovazu,
nḓa wozewa i ovawoze ozonongo.
10 Nungwari ove, Muhona,
oove Ndjambi watjiri,
oove Ndjambi omunamuinyo,
noove Ombara yaaruhe.
Tji wa ṱomazenge, ouye u zezera;
oviwaṋa kavi nokuyenena okuzara omapindi woye.
11 Nambano ove, tjiwaṋa, raera oviwaṋa mbi kutja oomukuru mbe ha utire eyuru nehi mave nyonwa. Owo kave tji nokuuhara amave kara ngamwa apehe kombanda yehi.
Eimburiro rondangero ku Ndjambi
12 Ndjambi wa utire ehi momasa we,
eye wa utire ouye mounongo we,
nu wa tandavarisire omayuru mondjiviro ye.
13 Otja komarakiza we omeva mevaverwa ye ṱuṱuma;
eye u eta ovikamba okuza komaandero wehi.
Eye u tjenisa orutjeno kutja ombura i roke,
nu u hinda ombepo kutja i hinge
okuza mozondjuwo ze zomapwikiro.
14 Mokumuna oviṋa mbi omundu auhe
u rimuna kutja eye eyova nu ke nondjiviro,
nu auhe ngu hambura oviserekarera
vyovisenginina u ṱisiwa ohoṋi,
orondu oviserekarera vyovisenginina mbye ungura,
ovyo otjiwova, nu kavi nomuinyo.
15 Ovyo oviporoporo nu vya sokuṋeṋunwa;
ovyo mavi yandekwa,
Muhona tji meya okuvivera.
16 Ndjambi wa Jakob ka sanene ku vyo,
eye onguri ngwi ngwa uta oviṋa avihe,
neye wa toorora Israel okurira otjiwaṋa tje omuini.
Ena re oMuhona Omunamasaaehe.
Omahuuriro ngu maye ya
17 Tjiwaṋa tja Jerusalem, eṋe mwa koverwa. Tooreye omitwaro vyeṋu! 18 Muhona me mu nakaura mehi ndi; eye me mu twa mombamisiro kutja eṋe mu mu tjiwe kutja ope ri. Muhona wa hungire.
19 Ovature va Jerusalem va ravaera ave tja:
“Owee ku eṱe mbu twa hihamisiwa tjinene!
Ovirwaro vyetu kamaavi veruka.
Nungwari eṱe twe ripura kutja imbwi ombu
ri omutjise mbu matu sora okutjinda.
20 Ozondanda zetu za nyonwa;
ozongoze nḓaa ze ze ṱiza za poka.
Ovanatje vetu avehe va ya;
kape na umwe ngwa sewa po
okuzika ozondanda zetu rukwao;
kape na umwe ngu ma ṱaisa omarapi wazo rukwao.”
21 Ami mba zira e tja: “Ovanane vetu omayova;
owo kave ningire ondunge ku Muhona.
Opu ve ha zire okutoṋa,
notjiwaṋa tjetu opu tja rimbarera.
22 Purateneye! Ombuze ye ya!
Mu nezunganeno enene motjiwaṋa
tjokomukuma wokokunene kweyuva;
otjimbumba tjatjo tjovita matji tjiti kutja ovihuro vya Juda
vi rire okuti onguza, moṋa mu mu tura ozombandje.”
23 Muhona, ami me tjiwa kutja
kape nomundu ngu ri omutye womirari vye omuini;
kape na umwe ngu yenena
okuryamisa omikambo vye omuini.
24 Vyura otjiwaṋa tjoye, Muhona,
nungwari o rire omukukutu ku eṱe,
nu o tu vere momazenge woye;
ihi matji rire omayandekero wetu.
25 Tirira omazenge woye koviwaṋa mbi he rikotamena
kove na komihoko mbi ha isana ena roye.
Ovyo vya zepa otjiwaṋa tjoye;
vye tu yandeka okumana,
nu avi isa ehi retu ara rire etundu.
© Herero Revision Bible © Bible Society in Namibia, 2021.
