Ongumbiro kovanavita va Israel
1 Ovanavita na ami ve ndji tatumisa
tjinene okuza koumutanda wandje,
Israel ngatji hongonone nai.
2 “Owo ve ndji ṋiṋikiza tjinene
okuza koumutanda wandje,
nungwari kave ndji urire ko.
3 Owo va usura ovirwaro ovikoto
metambo randje,
va konda mo ozondjira tjimuna ehi
romakunino nda taurwa.
4 Nungwari Muhona eye omunausemba;
eye wa pora omapando ovanauvi
ngu ve ndji pandeka na wo.”
5 Avehe mba tonda Sion ngave
haverwe nu ve yarurwe ovihahambunda.
6 Ngave sane kehozu ndi hapa komututu
wondjuwo nu ndi kukuta
ngunda ari hiya hapa nawa;
7 notji pe hi nokukara ehozu, ndi mari kondwa
nokutwarewa momikuta.
8 Ape ningi omundu ngu ma kapita
pu wo ama tja: “Muhona nga
sere eṋe ondaya!
Matu mu sere ondaya mena ra Muhona.”
© Herero Revision Bible © Bible Society in Namibia, 2021.
