Jesus ma verukisa omuremane
(Mt 9:1-8Lk 5:17-26)1 Jesus wa yaruka kOkapernaum, nu kombunda yomayuva tjiva ovandu va zuva kutja eye wa kotoka konganda. 2 Ovandu ve ya ku ye motjivarero otjingi, nga tji pe ha ri oruveze nandarire pomuvero. Jesus ngunda ama zuvarisa ombuze ye ku wo, 3 arire tji pe ya ovarumendu vane, mba toorere omuremane okumuyeta ku ye. 4 Mena rotjimbumba otjinene tjovandu, owo kave sorere okuvasisa omuremane ngwi ku Jesus. Nowo va kutjurura omututu wondjuwo ouhunga nopoṋa pu pa ri Jesus, nu arire tji va pundisa omuremane ngwa rarere poruara. Omututu wondjuwo 5 Jesus tja muna ongamburiro yawo, wa tja nai komuremane: “Muatje wandje, ourunde woye ove wa isirwa.”
6 Ozonongo zomambo tjiva nḓa haamene mbo, zakonḓonona otjiṋa hi, amaze ripura nai momitima vyazo: 7 “Ma hungirire tjike nai? Eye ma hungire ondjambu ku Ndjambi! Ngu ma sora okuisira ourunde owaṋi pendje na Ndjambi erike?”
8 Tjimanga Jesus wa tjiwa kutja owo mave ripura na tjike, notja tja ku wo: “Mamu ripurire tjike oviṋa mbya sana ngo momitima vyeṋu? 9 Oupupu tjinene okongwi okutja komuremane: ‘Ourunde woye ove wa isirwa,’ poo okongwi okutja: ‘Sekama, toora oruara roye nu u kawondje’? 10 Nungwari nambano, ami me mu raisire kutja Omuna wOmundu u nouvara kombanda yehi okuisira ourunde.” Eye opa tjera nai komuremane: 11 “Ami me tja nai kove: Sekama, toora oruara roye nu u yende koyoye!”
12 Ngunda avehe amave tarere, ingwi omuremane wa sekama, a toora oruara rwe na hakahana okuyenda. Avehe va himwa tjinene nave hivirike Ndjambi amave tja: “Katu yarora okumuna otjiṋa otja ihi!”
Jesus ma isana Levi
(Mt 9:9-13Lk 5:27-32)13 Jesus wa yaruka rukwao kOmuronga wa Galilea; notjimbumba atjihe tjovandu tje ya ku ye, neye wa uta okuvehonga. 14 Nu ngunda ama ka wondja, wa muna omusutise wotjisuta tjouhona wena Levi, omuzandu wa Alfeus, a haama pondjuwo yomasutiro, Jesus wa tja nai ku ye: “Ndji kongorera!” Levi otja sekama ne mu kongorere.
15 Kombunda yanao Jesus wa ka kara pehi okurya mondjuwo ya Levi. Ovasutise votjisuta tjouhona novanauvi ovengi aave kongorere Jesus, novengi vawo va ka kara pehi puna ye novahongewa ve potjiriro. 16 Ozonongo zomambo tjiva, nḓa ri Ovafarisei, va muna kutja Jesus ma ri puna ovanauvi novasutise mba, notji va pura kovahongewa ve ave tja: “Okutjavi omuhonge weṋu tji ma ri puna ovasutise votjisuta tjouhona novanauvi?”
17 Jesus we ze zuva na tja kuwo: “Mbe hepa onganga kawo mba ovaveruke, nungwari owo mba mba vera. Ami hi ere okuisana ovasemba, nungwari mbe era okuisana ovanauvi.”
Omeritjaerero kovikurya
(Mt 9:14-17Lk 5:33-39)18 Otjikando tjimwe ovahongewa va Johanes Omupapitise nOvafarisei va ri amave ritjaere kovikurya. Ovandu ve ya ku Jesus nave mu pura ave tja: “Okutjavi ovahongewa va Johanes Omupapitise nOvafarisei tji ve ritjaera kovikurya, nu imba ovoye tji ve he ritjaere kovikurya?” 19 Jesus wa zira a tja: “Mamu tjangovasi ovaṋangwa pomukandi worukupo mave ritjaere kovikurya, omuvareke ngunda e ri puna wo are? Kako, ka tjiperi nao! Omuvareke ngunda e ri puna wo, owo kave nokuritjaera kovikurya. 20 Nungwari eyuva mari ya omuvareke ndi ma isiwa po pu wo, nu owo otji mave ritjaere kovikurya meyuva ndo.
21 “Kape nomundu ngu twako erapi epe kombanda onguru, orondu erapi epe ndi mari taurire ko indji ombanda onguru, nondovi mai ririre ko onene. 22 Wina kape nomundu ngu pakera omavinu omape mozondjaṱu ozonguru zomikova, orondu omavinu omape nga maye pamuna inḓa ozondjaṱu, nomavinu aye nyonoka. Nungwari omavinu omape ye sokupakerwa mozondjaṱu ozombe zomikova.”
Omaṱakamisiro wesabata
(Mt 12:1-8Lk 6:1-5)23 Eyuva rimwe Jesus novahongewa ve aave ka wondja movikunino vyovikokotwa mesabata, ngunda amave ka wondja, ovahongewa va uta okuteya ovikokotwa. 24 Ovafarisei va tja nai ku Jesus: “Tara, okutjavi ovahongewa voye tji mave tjiti otjiṋa tji tja tjaerwa okutjitwa mesabata?”
25 Jesus wa zira a tja: “Kamu na pu mwa resere imbi David mbya tjitire indu eye na imba mba ri puna ye tji ve ha ri novikurya nu tji va ṱirondjara are? 26 Eye wa hitire mondjuwo ya Ndjambi moruveze ndwi Abiatar tja ri Omupristeri Otjiuru, na karya ozomboroto nḓa punguhirwa Ndjambi, nu nḓe ha pwire okuriwa i ovandu mbe he ri ovapristeri. Neye wina wa yandja ku imba mba ri puna ye.”
27 Nu Jesus wa tja ku wo: “Eyuva rEsabata onda zikamisirwa omundu, nungwari kamundu ongwa utirwa esabata. 28 Omuna wOmundu eye omuhona nandarire wesabata.”
© Herero Revision Bible © Bible Society in Namibia, 2021.
