1 Eye wa kaenda komurungu na tja ku wo: “Tjiri, me mu raere, mokati kaimba mba kurama mba, mu na tjiva mbe hi na maave ṱu ngunda ave hiya muna ouhona wa Ndjambi a mauya nomasa.”
Omarundurukiro wombunikiro ya Jesus
(Mt 17:1-13Lk 9:28-36)2 Kombunda yomayuva hamboumwe Jesus wa toorere Petrus na Jakobus na Johanes, e ve twara kombanda yondundu onde nu ave kakara ngo peke. Nu ongeṋangeṋeno onene ye ya kombanda ya Jesus. 3 Ozombanda ze za hara ondjerera ongeṋangeṋe, aze rire ozombapa twee, arire omayepaerisiro omundu kombanda yehi nge hi na maa sora okusasaneka. 4 Imba ovahongewa vetatu va muna Elia na Moses amave hungire kuna Jesus. 5 Petrus otja tja nai ku Jesus: “Muhonge, okokuwa kutja eṱe tu ri mba. Ngatu tunge oviranda vitatu: Tjimwe tji rire otjoye, tjimwe tji rire otja Moses, tjimwe tji rire otja Elia.” 6 Petrus kaa tjiwa kutja ma hungire tjike, orondu eye novakwao tjandje va uruma tjinene.
7 Nu pe ya otjikamba tji tje ve pa omuzire, motjikamba hi mwa za eraka nda tja: “Ingwi eye Omuna wandje omusuverwa, purateneye ku ye!” 8 Nowo va yevayeva tjimanga, nu ave ha munu omundu warwe puna wo posi na Jesus erike.
9 Ngunda amave heruka kondundu, Jesus we ve rakiza a tja: “Ngaamu roro amu serekarere komundu imbi mbi mwa munu, nga Omuna wOmundu tja penduka movakoke.”
10 Owo va kara nonḓuviro komarakiza we nga, nungwari mokati kawo aave purasana nai: “Omambo nga wokutja ‘nga tja penduka movakoke’ maye hee tjike?” 11 Nowo va pura Jesus ave tja: “Okutjavi ozonongo zomambo tji ve tja Elia ma sokutenga po okuya?”
12 Eye we ve zira a tja: “Tjiri, Elia ongu ma tenge po okuya kokutja a yarure oviṋa avihe koupe; posi ya omatjangwa wina hapo kaye tja Omuna wOmundu ma sokuhihamisiwa nokuyambururwa are? 13 Nungwari me mu raere kutja Elia we ere rukuru, novandu ve mu tjita otja puyave vanga, otja tji pa tjangerwa ye.”
Jesus ma verukisa omuzandu ngu nombepo ohakohoke
(Mt 17:14-20Lk 9:37-43a)14 Nowo tji va kotoka kovahongewa, va vaza po otjimbumba otjinene tjovandu pu wo, nozonongo zomambo amave pataṋa kuna wo. 15 Ovandu tji va muna Jesus va himwa tjinene, ave utuka ku ye nave mu minike. 16 Jesus wa pura ovahongewa ve a tja: “Mamu patasana tjike kuna wo?”
17 Omundu umwe motjimbumba wa zira nai: “Muhonge, ami mba eta omuatje wandje omuzandu kove, orondu eye u nombepo ohakohoke ndje mu patisa eraka. 18 Nu aruhe ombepo ndji tji ye mu sekamene, i mu vanda pehi, neye u eta etutu kotjinyo, a kweye omayo nu a kukuta orutu aruhe. Ami mba ningire ovahongewa voye kutja ve pitise ombepo ndji, nungwari owo kave yenenene!”
19 Jesus wa tja ku wo: “Muhoko omuhinangamburiro, me kara puna eṋe nga ruṋe? Me kara nomuretima na eṋe nga ruṋe? Eteye omuzandu nguno ku ami!” 20 Owo ve mu eta ku Jesus.
Tjimanga indji ombepo tji ya muna Jesus ya zunga ingwi omuzandu neye we rivanda pehi, ai murangisire mehi, ama eta etutu kotjinyo. 21 Jesus wa pura ihe yomuzandu a tja: “Okuza ku ruṋe eye tje tjita nai?”
Ihe wa zira a tja: “Okuza kouṱiṱi we. 22 Nu potuingi ombepo ohakohoke ya kondja okumuzepa ama i mu wisire momuriro na momeva. Arikana tji mo yenene, tu ṱira ondjenda nu u tu vatere.”
23 Jesus wa tja ku ye: “Ove motja: ‘Tji mo yonene’? Ku ingwi ngu nongamburiro avihe mavi sora okutjitwa.”
24 Tjimanga ihe yomuatje wa ravaera a tja: “Me kambura, arikana ndji vatera mbi taare okuhinangamburiro kwandje!”
25 Jesus tja munine kutja otjimbumba tjovandu matji hakahana oku ve wongarare, wa rakiza indji ombepo ohakohoke na tja: “Mbepo ove omboro ngu we mu patisa eraka, ami me ku rakiza kutja u pite momuzandu ngwi, nu o ha roro okuhita mu ye rukwao!”
26 Ombepo otji ya ura, ai zunga ingwi omuzandu, nu ai piti mu ye. Omuzandu aa munika otja ngwa koka, nu avehe arire tji va tja: “Wa koka!” 27 Nungwari Jesus wa kambura ingwi omuzandu keke, e mu yere, neye arire tja kurama kamuseka.
28 Nu Jesus tja hita mondjuwo, ovahongewa ve ve mu purira peke ave tja: “Okutjavi eṱe tji tu ha yenenene okupitisa ombepo ohakohoke ndjo?”
29 Jesus wa zira a tja: “Ombepo otja indji ma i yenene okupitisiwa i ongumbiro porwe.”
Jesus ma hungire onḓiro ye rukwao
(Mt 17:22-23Lk 9:43b-45)30 Jesus novahongewa ve va zapo poṋa mbo, nu ave tuurunga ehi ra Galilea. Jesus kaa vanga kutja pe ninge omundu ngu ma tjiwa kutja eye u ri pi, 31 orondu eye aa hongo ovahongewa ve nai: “Omuna wOmundu ma yandjewa momake wovandu, nowo mave mu zepa. Nu tja zu nokuṱa, meyuva oritjatatu ma penduka.” 32 Nowo kave zuvire nawa kutja omambo nga maye hee tjike, nu tjandje okumupura mave tira.
Ngu ri omunenenene owaṋi?
(Mt 18:1-5Lk 9:46-48)33 Nowo ve ya mOkapernaum, nu tji va hita mondjuwo, Jesus wa pura ovahongewa ve a tja: “Mondjira mwa ri nozombata zatjike?”
34 Nungwari owo kave mu zirire ko, orondu mondjira owo va ri nozombata zokutja owaṋi pu wo avehe ngu ri omunenenene. 35 Jesus wa haama, a isana imba ovahongewa omurongo na vevari, na tja ku wo: “Ingwi ngu ma vanga okurira omutenga, nga rire omusenina pu avehe, nu nga rire omukarere waavehe.” 36 Tjazumba eye wa toora okanatje, e ke kuramisa mokati kawo, nu e ke pukata, na rire tja tja nai ku wo: 37 “Ingwi ngu ma sekirisa omuatje otja ingwi mena randje me ndji sekirisa; nu ingwi ngu me ndji sekirisa, ke nokusekirisa ami porwe, nungwari wina ma sekirisa ingwi ngwe ndji hinda.”
Ingwi ngu hi na kutupirukira eye u ri puna eṱe
(Lk 9:49-50)38 Johanes wa tja nai ku Jesus: “Muhonge, eṱe twa munu omundu ama ungurisa ena roye okupitisa na ro ozombepo ozohakohoke, neṱe otji twe mu tjaere, eye tjinga e he ri owapuna eṱe.”
39 Jesus we ve raera a tja: “Amu mu tjaere, orondu kape nomundu ngu ma tjiti otjihimise mena randje, nu tjazumba a hakahana okundjiyamburura. 40 Orondu ingwi ngu hi na kutupirukira eye u ri puna eṱe. 41 Auhe ngu me mu pe omeva okunwa mena rokutja oweṋe ova Kristus, eye, tjiri, ma pewa ondjambi ye.
Okurorerwa kouvi
(Mt 18:6-9Lk 17:1-2)42 “Nu auhe ngu ma tjiti kutja umwe wa imba ouṱiṱi mba mba kambura mu ami ve tjite ourunde, atja rira kokuwa tjinene komundu ngo, ewe enene rotjikweyero tji ra kutwa mosengo ye, nu a yumbwa mokuvare. 43 Nu eke roye tji mari tjiti kutja u poke kongamburiro yoye, konda! Okokuwa kove okuhita meyuru au neke rimwe posi yokukara nomake ayeyevari no i kotjovasengwa, 44 omativa mu ye ha koka, nomuriro mu u ha zemi. 45 Nombaze yoye tji mai ku tjiti kutja u poke kongamburiro yoye, konda! Okokuwa kove okuhita meyuru au nombaze imwe posi yokukara nozombaze azeyembari nokuyumbwa motjovasengwa, 46 omativa mu ye ha koka, nomuriro mu u ha zemisiwa. 47 Nu eho roye tji mari tjiti kutja u poke kongamburiro yoye, homona! Okokuwa kove okuhita mouhona wa Ndjambi au neho rimwe posi yokukara nomeho ayeyevari nokuyumbwa motjovasengwa, 48 omativa mu ye ha koka, nomuriro mu u ha zemisiwa.
49 “Omundu auhe ma kohororwa nomuriro otja ombunguhiro tji i kohororwa nomongwa.
50 “Omongwa owo otjiṋa otjiwa; nungwari tji wa mana omutjato, mau tjatisiwa na tjike?
“Kareye nomutjato womongwa mokati keṋu, nu mu karasane nohange.”
© Herero Revision Bible © Bible Society in Namibia, 2021.
