Omazikamisiro wondjeverero youini
1 “Nomundu worive tja vaka ongombe poo onḓu, ne i zepa poo e i randisa, ma sokusuta ozongombe ndano mongombe imwe poo ozonyanda ine monyanda imwe.
2 “Erunga tji ra kamburwa ngunda amari teya ondjuwo, noro ari tonwa nga tji ra koka, ingwi ngwe ri zepa, ke nakuvarwa otja omuzepe. 3 Nungwari erunga tji ra kamburwa amari teya ondjuwo eyuva ara piti, ingwi ngu ma zepa ro ma rire omunandjo poo omuzepe. Nungwari indi erunga ngari yandje ovisuta mbya yenene pu imbi mbi ra vaka. Noro tji ri hi notjiṋa, ngari randisiwe konḓengu yovivakwa. 4 Nu ihi otjiṋa tji tja vakwa, kutja ongombe poo okasino poo onyanda, atji vazewa pu ye atji nomuinyo, ma sokusuta pu pe ṱeki potuvari.
5 “Omundu worive tja twa ovinamuinyo vye motjikunino poo momivite, nu imbi ovinamuinyo avi kataurira motjikunino tjomukwao okurya, ma sokusuta novinikora oviwa vyapo vyotjikunino poo vyomivite vye.
6 “Tji kwa yaka omuriro nau kambura komahozu, nga tji wa nyono ovimbunga poo ovikokotwa mbi hiya kondwa, nau nyono ovikunino, nu ingwi ngwa yakisa omuriro nga sute pu pa yenene.
7 “Omundu worive tja yandja ovimariva poo oviṋa ovinanḓengu komukwao okuviṱiza, novyo avi vakerwa mondjuwo yomurumendu ngwi, nu erunga tji ra munika mari sokususta pu pe ṱa potuvari. 8 Nungwari indi erunga tji ri ha munikire, ingwi omuini wondjuwo ma sokuyana komurungu wa Ndjambi, pe munike kutja eye omuini ka toorere oviṋa vyomukwao.
9 “Moviposa avihe, mbi nozombata nouini, kutja ongombe poo okasino poo onyanda poo ozombanda poo otjiṋa ngamwa atjihe tji tja pandjara, nomundu worive a tja otjandje, otjiposa tjawo aveyevari matji etwa komurungu wa Ndjambi. Nu ingwi ngwa munika ondjo ku Ndjambi, ma sutu pu pe ṱa potuvari komukwao.
10 “Omundu worive tja yandja komukwao okasino poo ongombe poo onyanda poo otjinamuinyo ngamwa atjihe okumuṱakamisira, natji ṱu poo atji munu oumba poo atji pundwa nokuhamunikire, 11 oruyano komurungu wa Muhona otji maru pangura pokati kaimba vevari kutja ingwi ka toorere oviṋa vyomukwao; nu ingwi omuini wotjiṋa ma kara nohange na ha sutisa. 12 Nungwari otjinamuinyo tji tja vakwa tjiri, matji sutwa komuini watjo. 13 Nu tji tja ṱu i ovipuka ovinyondorore katjotjiri, eye ke nakusokusuta; nungwari nge tji ete otja otjiraisiro.
14 “Omundu worive tja yazema otjinamuinyo komukwao, natji munu oumba poo atji koka, omuini watjo ngunda e he ri po, eye nga sute pu pa yenene. 15 Nungwari ingwi omuini watjo tje ri po, omundu ngo ke nakusuta. Nu otjinamuinyo tji tji ri otjiyazemwa matji sutwa notjimariva tjomayazemeno.
Omatwako womeritjindiro wouhirona nowokukarera Ndjambi
16 “Omurumendu worive tja popo omuatje omusuko ngu hiya varekwa, na rara pu ye, nga yandje otjitunya, nu e mu kupe. 17 Nungwari ihe tja panḓa okumuyandjera okukupwa, ingwi omurumendu nga yandje otjisuta tji tji ṱeki potjitunya tjovanatje ovasuko.
18 “Omukazendu onganguze ke nakusokuisiwa a kare nomuinyo.
19 “Ngamwa ngu ma tunduka otjinamuinyo, tjiri, nga ṱe.
20 “Ngamwa ngu ma yandja ozombunguhiro koomukuru varwe posi ya Muhona erike, nga sengwe.
21 “Ove ko nokutatumisa poo okuṋiṋikiza omundu wozonganda, orondu eṋe oveni tjinga amwa ri ovozonganda mehi ra Engipte. 22 Amu ṋiṋikiza ko omuhepundu poo osewa. 23 Ove tji we ve ṋiṋikiza momuano ngamwa auhe, tjiri, ami meve zuvire, owo tji mave uru ku ami, 24 nomazenge wandje maye yaka, nami me mu zepa nengaruvyo kutja ovakazendu veṋu ve hepunde novanatje veṋu ve rire ozosewa.
25 “Ove tji wa yazemisa otjimariva ku umwe wotjiwaṋa tjandje, ngu ri omusyona mokati keṋu, ko nokusokutjita otja omupahe woviweziwa. Amu twako otjiweziwa tjomayazemeno ku ye. 26 Ove tji wa kambura ongwava komukweṋu moruveze rwotjiṋa, mu kotorera eyuva ngunda ari hiya toka; 27 orondu oyo ootjikutjire tje, tje na tjo okumupa oupyu. Eye ma rara na tjike? Neye tja ku ku ami, ami me mu zuvire, orondu ami mbi notjari.
28 “Ko nokunyekerera ko Ndjambi, nu ko nokusenga ko omunane wotjiwaṋa tjoye.
29 “O rurupara okuyandja ozombunguhiro zovikokotwa vyoye nozomavinu nozo maze woye womiṋinga.
“Everi rovanatje voye ovazandu yandja ku ami. 30 Tjita nai wina nozongombe nozonyanda zoye; otjiveri ngatji kare koina omayuva hambombari, nu meyuva oritjahambondatu tji eta ku ami.
31 “Neṋe oweṋe ovandu vandje, opu mu hi nakusokurya onyama yovinamuinyo mbya ṱu i ovipuka ovinyondorore mokuti, nungwari i yumbeye kozombwa.
© Herero Revision Bible © Bible Society in Namibia, 2021.
