Jesaja 17 - Herero Revision Bible (HRR)

Ndjambi ma vere Ovasirie nOvaisrael

1 Muhona wa tja nai: “Damaskus katji nokuuhara ama tji rire otjihuro rukwao; matji rire otjitambatundu uriri. 2 Ovihuro vyehi ra Sirie mavi rire ongaango nga aruhe; mavi rire omaryo wozonḓu nozongombe, nu kape na ngu me ze ramba. 3 Israel katji nokuriyeura, nu Damaskus matji pandjarisa ouvara watjo. Ovasirie imba mba hupa mave yambururwa tjimuna Ovaisrael. Ami, ngu mbi ri Muhona Omunamasaaehe, mba hungire.”

4 Muhona wa tja nai: “Eyuva mari ya ouvara wa Israel mu mau yanda; noutumbe watjo mau yarukirwa po i ousyona. 5 Israel matji sana nehi romakunino mu mwa kondwa ovikokotwa, nu matji isiwa tjo otja ehi romakunino morutjandja rwa Refaim tji ra sewa tjo. 6 Mape sewa ovandu tjiva uriri, nu Israel matji sana nomuṋinga ku kwa nikorwa ozoṋinga azehe, posiya mbari poo ndatu nḓe ri kotutavi twokombandambanda poo tjiva nḓa sewa kotutavi twokehi. Ami, ngu mbi ri Muhona, Ndjambi wa Israel, mba hungire.” Omuṋinga

7 Eyuva ndo tji re ya, ovandu mave ningire ombatero rukwao kOmuute wawo, Omuyapuke wa Israel. 8 Owo kave tji nokuuhara amave riyameke kovipunguhiro, mbi va ungura nomake wawo oveni poo koviungura vyomake wawo oveni, okutja imbi oviserekarera vyomukuru wotjisenginina oserekaze Asera, novipunguhiro ku ku twimisirwa ovyomoro omuwa.

9 Eyuva ndo tji re ya, ovihuro mbya zeuparisiwa nawa mavi sewa tjo, nu mavi isiwa ovitambatundu tjimuna ovihuro mbya isiwa i Ovahevi nOvaamori, indu tji va taurisiwa i Ovaisrael.

10 Israel, ove wa zemba Ndjambi ngu ku yama nu ngu ku tjizikiza otja oruuwa orunamasa. Moruveze rwanao, ove u kuna ovikunino ovizere, kokutja u rikotamene komukuru wozonganda. 11 Nungwari nandarire kutja ovyo vya nyomoka nu vya twako ozongara, omuhuka tjingewo mbu we vi kunu, kape nokukara omakondero. Mape kara oumba nomihihamo porwavyo mbi hi nokuwa pehi.

Oviwaṋa ovinavita mavi haverwa

12 Oviwaṋa ovinamasa mavi zungana nombosiro tjimuna okuhwaara kwokuvare, tjimuna okurokoha kwozongazona ozonene. 13 Oviwaṋa mavi tye ovimboro tjimuna ozongazona nḓu maze rauka nomasa, nungwari Ndjambi me vi tena, novyo mavi yaruka ovihahambunda amavi hingwa otja oruuma kozondunda, notja oviyaya morukumbambura. 14 Ongurova vi pendura omburuma, nungwari omuhuka avi zengi. Imbwi ombu ri oumba ku imba avehe mbe huura ehi retu.