Ongumbiro yondjamo
Komuimburise. Epsalme rovazandu va Kora.
1 Ndjambi, eṱe twa zuva nomatwi wetu oveni,
ootate mukururume ve tu
serekarera oviungura ovihimise,
mbi wa tjitire moruveze rwawo,
momayuva warukuru;
2 Ove wa ramba ovanavisenginina,
narire tji wa turisa otjiwaṋa tjoye mehi rawo.
Ove wa teya omasa woviwaṋa vyarwe,
nu o ṋingaparisa otjiwaṋa tjoye.
3 Otjiwaṋa tjoye katji kamburire
ehi nomangaruvyo watjo;
nomasa watjo kaye tji vaterere;
nungwari yari kehi yomasa nomasorero woye,
mokukambura moukarepo woye,
ove tjinga awe tji suverere.
4 Oove ombara yandje na Ndjambi wandje;
yandja outoṋi kotjiwaṋa tjoye.
5 Momasa woye matu havere ovanavita na eṱe,
nu mena roye matu tombo ovetupirukire.
6 Ami hi nokuriyameka kouta wandje,
poo kengaruvyo randje okundjiyama;
7 nungwari ove we tu yama kovetupirukire,
nu wa ṱisa ovetutonde ohoṋi.
8 Eṱe aruhe matu hivirike Ndjambi,
nu matu tanga ena re aruhe nga aruhe.
9 Nungwari nambano ove we tu nakaura
nu we tu esa kutja tu haverwe;
ko nokuuhara amo kayenda puna
ovimbumba vyetu vyovita.
10 Ove we tu taurisa komurungu wovanavita na eṱe,
novetutonde opu va za okutuhuura.
11 We tu yandja ku wo kutja tu ṱe tjimuna ozonḓu,
nu we tu rimba mokati kovanavisenginina.
12 Ove wa randisa otjiwaṋa tjoye kotjisuta otjiṱiṱi,
nu ko mwine mo ovitjoziwa mokutjirandisa.
13 Ove we tu twa mohoṋi kovararanganda na eṱe,
nu we tu nyekererisa
nokutuhembisa kovopopezu na eṱe.
14 We tu tjita ovanyengurwa
mokati kovanavisenginina,
noviwaṋa vi tu takera oviuru mokutunyekerera.
15 Ami aruhe mbi kara mondjambu,
nu mbi ṱisiwa ohoṋi,
16 mo ku zuva ovanavita nami na imba
mbe ndji tonda tji mave ndji
nyekerere nokundjiyamburura.
17 Oviṋa avihe mbi vya tjitwa ku eṱe,
nandarire kutja eṱe katu ku zembire,
nu katu teyere omerikutiropamwe
ngu wa tjita ku na eṱe.
18 Omitima vyetu kavi pokere kove,
nu katu yepere mondjira yoye.
19 Nungwari ove we tu esa
mokati kovipuka ovinyondorore
nokuhinombatero no tu
vandeke nomuzororema.
20 Andakuzu eṱe twa isire
okurikotamena ku Ndjambi wetu
natu kumbu komukuru wotjisenginina,
21 ove, tjiri, otjiṋa hi otjo tjimuna,
tjinga au tjiwa oviundikwa vyo momitima vyetu.
22 Nungwari omena roye eṱe tji tu ṱa eyuva arihe,
nu tu varwa otja ozonḓu nḓu maze kaṱa.
23 Penduka, Muhona! Mo rarere tjike?
Yanḓimuka! Nu o tu nakaura nga aruhe.
24 Omurungu woye mo u horekere tjike ku eṱe?
O zembi ondjenda nombameno yetu!
25 Eṱe twa ṋiṋikizirwa moruuma,
nu twa saravara mehi atwa ṱukuṱurwa.
26 Sekama u tu vatere! Nu tu yama
mena rorusuvero rwoye orukarerere!
© Herero Revision Bible © Bible Society in Namibia, 2021.
