1 Omayuva womukandi wOpaska tji ya kapita, Ovaisrael avehe va ire kovihuro mOjuda nave kateya ozongunḓe zomawe nokuka ovihenḓe ovizere mbya yapurirwa omukuru wotjisenginina oserekaze Asera, nave nyono ovipunguhiro nopoṋa apehe pomerikotameneno kovisenginina kozondunda. Owo va tjita omuhingo tjingewo mehi arihe ra Juda nora Benjamin nora Efraim nora Manasse; tjazumba avehe va yaruka kozoyawo.
Hiskija ma ṱunu oviungura mondjuwo ya Muhona
2 Ombara Hiskija wa zika rukwao ovira vyovapristeri novyOvalevi moviungura vyawo, auhe ma ri notjiungura tje otjizikame. Oviungura mbi vya ri okupunguha ozombunguhiro ozoningiririsiwa nozohange, nokukarera mondjuwo ya Muhona, nokutanga Muhona nokutja okuhepa ku ye momatuwo pekepeke nga kondoroka ondjuwo ya Muhona. 3 Eye wa yandja ovinamuinyo okuisa motupanda twe omuini kutja vi punguhwe otja ozombunguhiro ozoningiririsiwa, omuhuka nongurova aihe, mesabata, nOmukandi wOmatendameno wOmueze, na momikandi omikwao vyarwe punga apa tjangwa mOmatwako wa Muhona.
4 Ombara ya rakiza ovandu va Jerusalem kutja ve ete oviyandjewa, mbi ri ovyovapristeri novyOvalevi, kutja ve riyandje oveni okuura kOmatwako wa Muhona. 5 Ombuze ndji ya handjana tjimanga, nOvaisrael va eta oviyandjewa vyovikokotwa ovitenga, novyomavinu novyomaze womiṋinga novyouitji wozonyutji novyovihape avihe vyovikunwa; nowo wina va eta otjitjamurongo tjoviṋa avihe, mbi va ri na vyo. 6 Ovandu avehe, mba turire movihuro vya Juda, va eta otjitjamurongo tjozongombe notjozonḓu zawo, nu wina va eta otjitjamurongo tjoviyandjewa, mbi va yapurira Muhona, Ndjambi wawo. 7 Oviyandjewa vya utwa okuetwa momueze outjatatu navi tendekasana nga komueze outjahambombari. 8 Nombara Hiskija novahongore ve tji va muna imbi mbya yandjerwe kutja vi ṱeki pi, arire tji va tanga Muhona notjiwaṋa tje Israel. 9 Ombara Hiskija wa pura kovapristeri na kOvalevi, kutja oviyandjewa avihe mbi vya zu pi? 10 Asarja, Omupristeri Otjiuru, ondekurona ya Sadok, we mu zira nai: “Okuza indu ovandu tji va uta okueta oviyandjewa vyawo kondjuwo ya Muhona twa kara noviriwa mbya yenena nape hupu ovingi. Eṱe tu noviṋa imbi avihe, Muhona tjinga a sera otjiwaṋa tje ondaya.”
11 Owo va ṱuna omatuwo womapwikiro morupanda rwondjuwo ya Muhona otja ombara pu ya rakiza, 12 nave twa oviyandjewa notjitjamurongo tjoviṋa avihe mu wo okupwikwa. Owo va zika Omulevi wena Konanja a rire omutjevere, nomuangu we Simi a rire omuvatere we. 13 Pa zikwa Ovalevi omurongo mba okuungura kehi yawo: OoJehiel na Asasja na Nahat na Asahel na Jerimot na Josabad na Eliel na Jismakja na Mahat na Benaja. Avihe mbi vya tjitwa kehi yondyero yombara Hiskija noya Asarja, Omupristeri Otjiuru. 14 Kore, omuzandu wa Imna, Omulevi ngwa ri otjiuru tjovatjevere vopOmuvero wOkomuhuka wondjuwo ya Muhona, wa ri nousemba wokuyakura ozombunguhiro zombango yawo oveni nḓaa ze punguhirwa Ndjambi; eye wina wa haṋa oviyandjewa mbya toororerwa Muhona, na imbi oviyapukeyapuke. 15 Movihuro ovikwao mu mwa turire ovapristeri, eye wa vaterwa nouṱakame motjiungura hi i Ovalevi ovakwao mba: OoEden na Minjamin na Jesua na Semaja na Amarja na Sekania. Owo va haṋa ovikurya pu pe ṱeki pamwe kOvalevi ovakwao otja koviungura vyawo, nu ka ri otja kozonganda. 16 Owo va yandjere orukondwa kovavena avehe vozombura omirongo vitatu nokomurungu, mba ri noviungura vyeyuva arihe mondjuwo ya Muhona otja potuveze twoviungura vyawo. 17 Ovapristeri va perwe oviungura vyawo otja kozonganda; nOvalevi, mba ri nozombura omirongo vivari nokomurungu, va perwe oviungura vyawo otja kovimbumba vyovaungure. 18 Avehe va tjangwa pamwe novakazendu novanatje vawo, orondu otja koviungura vyawo ovikarerere owo va sere okuriyapura nawa oveni. 19 Mokati kovapristeri, inḓa ozondekurona za Aron, mba turire movihuro poo momahi womaryo nga wovihuro mbi, mwa ri ovarumendu ovatjiukwa mbaa ve haṋa ovikurya kovavena avehe momaṱunḓu wovapristeri na ku auhe ngwa ri momatjangero wozonganda zOvalevi.
20 MOjuda arihe ombara Hiskija wa tjita imbi mbya ri ovisemba nu mbyaa vi tjata ku Muhona, Ndjambi we. 21 Eye wa ri omuṋingandu, orondu otjiṋa atjihe tja tjitira ondjuwo ya Muhona poo okuṱakamisa Omatwako, eye we tji tjitira Ndjambi, ame mu paha nomutima we auhe.
© Herero Revision Bible © Bible Society in Namibia, 2021.
