Ndjambi eye omupangure wouye
Epsalme.
1 Imburireye Muhona eimburiro epe;
eye wa tjita oviungura ovihimise!
Mouvara na momasa we omayapuke
eye wa tjita ondoṋeno.
2 Muhona wa zuvarisa ondoṋeno ye kouye;
eye wa tjiukisa omasa we wondjamo koviwaṋa.
3 Eye wa yenenisa omakwizikiro we
kotjiwaṋa tja Israel mokutjiraisira
ouṱakame norusuvero orukarerere.
Ovandu avehe akuhe va muna
ondoṋeno ya Ndjambi wetu.
4 Yorokereye Muhona,
eṋe mahi amuhe;
Mu tangeye nomaimburiro,
nu mu ravaere nondjoroka!
5 Imburireye Muhona omatangero;
mu nyandereye novihumba noviharpe!
6 Posiseye ozohiva nozongoma;
yorokereye Muhona, Ombara yetu!
7 Kuvare, noviutwa avihe mbi ri move,
zuzuma!
Hi na avehe mba tura move,
imbura!
8 Oweṋe zonḓonḓu,
toneye otukwise!
Eṋe vivanda,
imbureye pamwe nondjorokero
9 komurungu wa Muhona,
orondu eye meya okupangura ouye.
Eye ma honaparere oviwaṋa
vyouye mousemba na mouatjiri.
© Herero Revision Bible © Bible Society in Namibia, 2021.
