Samuel ma virikiza otjiwaṋa
1 Samuel wa tja nai kOvaisrael avehe: “Tareye, ami mba puratena ku eṋe mu avihe mbi mwe ndji raera, nu mbe mu zikira ombara. 2 Nambano eye ngo nge mu hongorere. Ami mba kurupa nu mba hara ozonḓi, novazandu vandje owo mbo puna eṋe. Ami mbe mu hongorera okuza koumutanda wandje nga ku ndinondi. 3 Owami ngwi. Ndji hongononeye komurungu wa Muhona na komurungu womutwirisiwa we: Tji mba kambura ongombe yomundu worive poo okasino ke poo tji mba ṋiṋikiza nokutatumisa omundu poo tji mba kambura otjimariva tjombopero, me vi yarura ku eṋe.”
4 Notjiwaṋa tja zira nai: “Ove ko tu ṋiṋikizire, nu ko tu tatumisire, nu ko kamburire otjiṋa komundu.”
5 Samuel otja zira a tja: “Muhona nombara ndja toorora, ombe ri ovahongonone ndinondi kutja eṋe mwe ndji munu omuhinandjo oparukaze.”
Nowo va ravaera ave tja: “Muhona onguri omuhongonone wetu.”
6 Norukwao Samuel wa hungira kotjiwaṋa a tja: “Muhona onguri omuhongonone; eye ongwa toorora ooMoses na Aron nongwa tjindisa ooiho mukururume mehi ra Engipte. 7 Nambano kurameye mbo pu mu ri kutja ami mbi mu pangure komurungu wa Muhona mena rozondjito zouwa azehe Muhona nḓa tjita ku eṋe na kooiho mukururume. 8 Jakob neṱunḓu re tji ve yere kOengipte nOvaengipte tji ve ve tatumisire, ooiho mukururume va kwa ombatero ku Muhona, neye wa hinda ooMoses na Aron mbe ve tjindisa mOengipte nokuveturisa mehi ndi. 9 Nungwari owo va zemba Muhona, Ndjambi wawo; neye otje ve yandja mouvara wa Sisera, omuhongore wotjimbumba tja Hasor tjovita, na mouvara wOvafilisti nowombara yOvamoab mbe ve rwisa nave ve havere. 10 Nowo va kwa ombatero ku Muhona ave tja: ‘Twa tura ondjo tjinga atwa humburuka na ove, Muhona, natu karere oomukuru vovisenginina ooBaal na Astarte. Tu yama nambano kovanavita na eṱe, otji matu Ku karere!’ 11 Nu Muhona wa hinda Jerubbaal na Barak na Jefta na ami, Samuel, mbu twe mu yama kovanavita na eṋe mbe mu kondoroka kutja mu ture nokuhinatjipo. 12 Nungwari tji mwa muna kutja Nahas, ombara yOvaamoni, me mu rwisa, otji mwa tja nai ku ami: ‘Ayee, matu vanga ombara!’ Ingwi Muhona, Ndjambi weṋu, ngunda e ri ombara yeṋu.”
13 “Nambano tareye ombara ndji mwa toorora, nu ndji mwa ningira, oyo ndji, Muhona we mu pe. 14 Avihe mavi kara nawa ku eṋe tji mamu tira Muhona, Ndjambi weṋu, nokumukarera, nokuzuva ku ye nokuṱakamisa omarakiza we, neṋe nombara yeṋu tji mamu ryanga mozondjira ze. 15 Nungwari tji mu hi nakupuratena keraka ra Muhona nu tji mu hi nokuṱakamisa omarakiza we, eye ma pirukire eṋe nombara yeṋu. 16 Nambano kurameye mbo pu mu ri, neṋe mamu munu otjiṋa otjinene Muhona tji ma tjiti. 17 Indwi kandu ri oruveze rwomakondero wovikokotwa are? Ami me kumbu ku Muhona kutja eye a ete otuṱuṱumo nombura. Notji mamu tjiwa nokumuna kutja ouvi mbu mwa tjita komurungu wa Muhona owo ounene, indu tji mwa ningira okupewa ombara.”
18 Samuel otja kumba ku Muhona, nu meyuva tjingero ndo Muhona wa hinda otuṱuṱumo nombura; notjiwaṋa atjihe tja tira Muhona na Samuel tjinene. 19 Notjiwaṋa atjihe arire tji tja tja ku Samuel: “Kumbira ovakarere voye, ku Muhona, Ndjambi woye, kutja atu ha ṱu, eṱe tjinga atwa weza ouvi komauvi wetu aehe ngu twa tjita, indu tji twa ningira ombara.”
20 Nu Samuel wa zira a tja: “Amu tira! Eṋe mwa tjita omauvi nga aehe; nungwari nambano amu humburuka na Muhona, nu mu karereye nomitima vyeṋu avihe. 21 Amu hondjo koomukuru vovisenginina. Owo kave nakumuvatera nokumuyama, tjinga ave he ri ovatjiri. 22 Muhona kamaa imbirahi otjiwaṋa tje mena rena re enene, tjinga apa tjata ku ye okumutjita otjiwaṋa tje. 23 Ami wina himee isa okukumbira eṋe kutja e ha tura ondjo komurungu wa Muhona, nungwari ami me vanga okumuhonga ondjira ombwa nosemba. 24 Tireye Muhona nu mu mu karere nouṱakame nomitima vyeṋu avihe. Zemburukeye oviṋa ovinene eye mbye mu tjitira. 25 Nungwari tji mamu tjiti ouvi komeho, eṋe oveni nombara yeṋu mamu yandekwa.”
© Herero Revision Bible © Bible Society in Namibia, 2021.
