Omayumbiro wotjimariva kombongo ya Jerusalem
1 Nambano otja komayumbiro wotjimariva kombongo ya Jerusalem eṋe wina mamu sokutjita punga amba raera kozombongo za Galatie. 2 Osondaha aihe auhe weṋu nga horeke otjimariva punga ama sora ne tji pwike, kokutja a ha rire ohepero okuwonga otjimariva, ami tji mbe ya. 3 Nu tji mba vaza ku eṋe, ami, ovarumendu mba eṋe mbu mwa toorora, meve hindi notutuu kutja ve tware oviyandjewa vyeṋu vyotjari kOjerusalem. 4 Nu tjinangara ohepero ami wina okuyenda, okutja owo mave sora okuyenda puna ami.
Omeripura wouyenda wa Paulus
5 Ami meya ku eṋe tji mba zu nokutuurunga ehi ra Makedonie; orondu ami me tuurunga ehi ra Makedonie. 6 Nu mape ya ami e kara puna eṋe ngahino okupepera akuhe, nu otji mamu sora okundjipa ombatero mouyenda wandje tji me ryama komurungu, ngamwa akuhe ku me i. 7 Ami hi nokuvanga okuyekumutara uriri tji me kapita, nungwari mbi nomaundjiro okukara pu eṋe okaruveze okasupi, Muhona tji me ndji yandjere. 8 Ami me kara muno mOefese nga keyuva rOmatiririro wOmbepo, 9 orondu muno ku ami mu nomasorero wokuungura oviungura ovinene novinanḓengu, nandarire kutja mu novendjipirukire ovengi.
10 Nu Timoteus tjinangara weya ku eṋe, mu yakureye nawa kutja tje ri mokati keṋu a ha tira, eye tjinga e ungurira Muhona otja ami. 11 Ape ningi omundu ngu me mu nyengura, nungwari mamu sokumuvatera kutja a kayende mohange, kokutja eye a sore okukotoka ku ami; orondu ami me mu undju okukotoka puna ovakambure ovakwetu.
12 Nomukwetu Apolos otja tje ri nai, ami aruhe mbe mu ningira potuingi tjinene kutja e yokumuvarura puna ovakambure ovakwetu, nungwari eye kaa vanga okuya tjimanga. Neye meya, tja munu oruveze oruwa.
Omambo womapatero
13 Kareye katumba, zikameye mongamburiro, panḓipareye nu mu zeupare. 14 Avihe, mbi mamu tjiti, tjiteye morusuvero.
15 Ami me riyarikaṋa ku eṋe, vakwetu: Eṋe mamu tjiwa Stefanas nonganda ye kutja owo omba ri ovakambure ovatenga mOakaja, nokutja owo ve riyandja motjiungura tjokukarera ovakambure. 16 Riwiseye kehi younane wovandu otja imba na kehi yaauhe ngu ungura nokukondja puna wo.
17 Ami me nyandere omeero wa Stefanas na Fortunatus na Akaikos, orondu owo ve yokuyaruka moruveze rweṋu. 18 Owo va nyaṋuna ombepo yandje na indji oyeṋu wina. Aruhe zemburukeye ovandu mbe ri nai.
19 Ozombongo morukondwa rwa Asie maze mu minike. Akuila na Priskila nombongo, ndji woronganena moyawo, mave minike tjinene mu Muhona. 20 Ovakambure ovakwetu avehe mave mu minike. Minikasaneye noruhupito oruyapuke.
21 Me tjanga neke randje omuini ozombinika: Owami Paulus.
22 Tji pe nomundu ngu hi nakusuvera Muhona eye nga sengwe! Maranata! Muhona indjo!
23 Otjari tja Muhona Jesus ngatji kare na eṋe! 24 Orusuvero rwandje ngaru kare na eṋe amuhe mu Kristus Jesus.
© Herero Revision Bible © Bible Society in Namibia, 2021.
