Ongumbiro yombatero mombamisiro
Komuimburise wotjiketara otja ku Seminit. Epsalme ra David.
1 Muhona, o ndji vyura momazenge woye,
nu o ndji vere momapindi woye!
2 Ṱotjari na ami, Muhona, ami mba pungara.
Ndji verukisa, orondu orutu
rwandje rwa ngundipara tjinene.
3 Mourekoto wandje mba kurunga tjinene.
Nungwari, Muhona, ove mo wombo
okundjivatera nga ruṋe?
4 Kotoka, Muhona, u ndji yame.
Motjari tjoye ndji kutura konḓiro.
5 Orondu monḓiro ove ko zemburukwa;
kape na ngu me ku tanga motjovakoke.
6 Ami mba pungarisiwa i oruhoze rwandje;
ouṱuku auhe otjiraro tjandje tji kara
momupupo womahoze wandje,
otjikusinga tjandje tja
ningenisiwa i omahoze wandje.
7 Omeho wandje ya hara epoṱu mena roruhoze,
nowo ya suru
ya surisiwa i omaririro nga
etwa i ovanavita na ami.
8 Zakoeye ku ami, oweṋe vanauvi amuhe,
orondu Muhona wa zuvire ondjuriro yandje.
9 Eye wa puratena omerihekeneno wandje,
nu ma kara neziriro kongumbiro yandje.
10 Ovanavita na ami avehe
mave ṱohoṋi nave uruma;
tjimanga mave rambwa ava ṱohoṋi!
© Herero Revision Bible © Bible Society in Namibia, 2021.
