Moses novanane mave rondo kondundu
1 Tjazumba Muhona wa hungira ku Moses a tja: “Ronda kondundu ku ami, ove na Aron na Nadab na Abihu novanane omirongo hambombari vOvaisrael; nu ngunda amu ri kokure kaṱiṱi, rikoteye nu mu rikotamene. 2 Moses erike nga rire ngweya popezu na Muhona, nungwari imba ovakwao ave ya ko popezu, notjiwaṋa atji ha rondo puna ye.”
3 Nu Moses tja kotoka na serekarere omambo aehe wa Muhona kotjiwaṋa, nomazikamisiro aehe wousemba wina, otjiwaṋa atjihe tja zira neraka rimwe atji tja: “Omambo aehe Muhona nga rakiza matu ye tjiti.” 4 Moses wa tjanga inga omambo aehe wa Muhona. Nu omuhuka omunene we rirongera na katunga otjipunguhiro kehi yondundu nomawe omurongo na yevari wotjizemburukiro otja ku imbi omihoko omurongo na vivari vyOvaisrael. 5 Neye wa tuma ovarumendu omitanda vOvaisrael, nowo va punguhira Muhona ozombunguhiro ozoningiririsiwa, nave zepa ozondwezu zozongombe ze rire ozombunguhiro zohange ku Muhona. 6 Nu Moses wa wota ko ombinḓu ohinga ne i tirire movikuve, nombinḓu ndji ohinga ongwao we i pamenena kotjipunguhiro. 7 Neye wa toora indi embo romerikutiropamwe ne ri resere otjiwaṋa. Notjo tja tja: “Avihe Muhona mbya hungire matu vi tjiti nokukara nonḓuviro ku vyo.”
8 Moses wa toora indji ombinḓu ndja ri movikuve na pemenene na yo otjiwaṋa, na tja: “Indji oyo ombinḓu yomerikutiropamwe wa Muhona nga tjita na eṋe, eye tja yandja omatwako nga aehe.”
9 Tjazumba Moses wa ronda kondundu puna Aron na Nadab na Abihu novanane omirongo hambombari vOvaisrael. 10 Nowo va muna Ndjambi wOvaisrael. Kehi yozombaze ze iyaku munika tjimuna orupare rwomawe omasafir, nomawe ngaa e werawera tjimuna ourovazu weyuru orini. 11 Nungwari eye ka tjitire otjipo ku imba ovanane ovatoororwa vOvaisrael; nowo va muna Ndjambi, nu ave ri nu ave nu.
Moses kondundu Sinai
12 Muhona otja tja ku Moses: “Ronda nguno kondundu ku ami, u ye okukara mba! Ami meya okukupa imbi ovitjangero vyomawe ku ku nomazikamisiro nomatwako ngu mba tjangera okuyehonga otjiwaṋa.” 13 Komuhingo mbwi Moses otje rirongera puna Josua, omuvatere we. Nu Moses wa ronda kondundu ya Ndjambi. 14 Neye wa tja kovanane: “Tu undjireye mba, nga tji twa kotoka ku eṋe. Nu tareye, Aron na Hur ve ri puna eṋe; ngamwa ngu notjiposa nga yende ku wo.”
15 Nu Moses wa ronda kondundu, notjikamba tja kutjira yo. 16 Nongeṋangeṋeno ya Muhona ya rauka kondundu Sinai, notjikamba tje i kutjira oure womayuva hamboumwe. Nu meyuva oritjahambombari Muhona wa ravaera ku Moses okuza motjikamba. 17 Nongeṋangeṋeno ya Muhona ya ri tjimuna omuriro omusesete mbuyau yaka kombanda yondundu momeho wOvaisrael. 18 Nu Moses wa hita moukoto wotjikamba, na rondo kondundu na kakara oure womayuva omirongo vine nomauṱuku omirongo vine kombanda yondundu.
© Herero Revision Bible © Bible Society in Namibia, 2021.
