1 “Nu Besalel na Oholiab novarumendu avehe ovanandunge moviungura vyongongo Muhona ka yandja ounongo nozondunge okutjiwa okuungura otjiṋa ngamwa atjihe komatungiro wOtjouyapuke, ombu mave ungura ngamwa atjihe otja Muhona punga e ve rakiza.”
Omayandero womawongero woviyandjewa
2 Nu Moses wa isana Besalel na Oholiab novarumendu avehe ovanandunge moviungura vyongongo Muhona ka yandja ounongo, na avehe mbe rirongera okuvatera, ne ve raera kutja ve ute okuungura. 3 Nowo va kambura oviyandjewa avihe vyomatungiro wOtjouyapuke ku Moses mbya eterwe i Ovaisrael. Nungwari Ovaisrael aave kayenda komurungu okuetera Moses oviyandjewa omuhuka auhe. 4 Nu imba ovarumendu avehe ovanandunge moviungura vyongongo, mba ri pokutjita oviungura avihe vyOtjouyapuke, va isa oviungura vyawo pekepeke nave ya. 5 Nowo va tja ku Moses: “Otjiwaṋa matji eta ovingi komurungu waimbi, mbi mavi heperwa koviungura Muhona mbya rakiza okuungura.”
6 Moses otja hinda omarakiza kozondanda na tja: “Ape ningi omurumendu nomukazendu ngu ma uhara ama eta oviyandjewa vyOtjouyapuke rukwao.” Otjiwaṋa otji tja isa okueta ovikwao; 7 orondu imbi mbya etwa komatungiro vya yenena okumana oviungura avihe, nu tjiva vya hupa.
Omatungiro wOndanda yOmahakaeneno
(Eks 26:1-37)8 Novarumendu avehe ovanandunge moviungura vyongongo mokati kovaungure otji va tunga Ondanda yOmahakaeneno. Oyo ya tungwa nomarapi omurongo, nga tungwa nozosepa nḓa wozewa. Ovivara vyomarapi vya ri ovirovazu noviserarovazu noviserandu pyu, mu mwa tungirwa oviserekarera vyovakerubi vyongongo. 9 Erapi arihe ra ri nozometa omurongo na mbari koure, nozometa mbari kouparanga; omarapi nga aehe ya ṱekire pamwe. 10 Neye wa hondjera omarapi yetano kumwe, nu inga warwe yetano wa tjita tjingetjo wina. 11 Neye wa twako omahuha wotjivara otjirovazu kotjikoro tjerapi ropendje rotjivangwa ihi otjitenga; nu otja twako omahuha, omuhingo tjingewo, kerapi ropendje rotjivangwa ihi otjitjavari. 12 Eye wa twako omahuha omirongo vitano kerapi ndi etenga rotjivangwa ihi otjitenga, nomahuha omirongo vitano kerapi indi esenina rotjivangwa ihi otjitjavari; omahuha nga otji ya tarasana. 13 Eye wa ungura oupate oungoldo omirongo vitano, nu ombwa pata na wo ovivangwa mbi vivari kumwe kutja ovyo vi rire Ondanda yOmahakaeneno.
14 Tjazumba wa ungura omarapi omurongo na rimwe pomainya wozongombo, okutjita na zo otjikutjire tjOndanda yOmahakaeneno. 15 Erapi arihe rondanda ra ri nozometa omurongo nandatu koure, nozometa mbari kouparanga; azehe nḓa za ṱekire pamwe. 16 Eye wa kuta omarapi yetano kumwe peke, na hamboumwe yarwe peke. 17 Eye wa ungura omahuha omirongo vitano kotjikoro tjerapi indi esenina rotjivangwa ihi otjitenga, nomahuha omirongo vitano kotjikoro tjaindi esenina rotjivangwa ihi otjikwao. 18 Eye wina wa ungura oupate omirongo vitano wongoporo, okukuta na wo imbi ovivangwa kumwe kutja vi rire otjiṋa tjimwe. 19 Neye wa ungurira Ondanda yOmahakaeneno otjikutjire pomikova vyozondwezu zozonḓu mbya seraerisiwa, nu kombanda yaihi otja twako otjikutjire tjomikova vyozombwa zomeva.
20 Neye wa ungurira indji Ondanda yOmahakaeneno otutapo twomue wina tu twa zikwa oseka. 21 Oure worutapo aruhe peke wa ri ozometa ine, nozosentimeta mangara omirongo hambombari kouparanga. 22 Orutapo aruhe peke rwa ri nomatota yevari, ngaa e tu hondjizire kumwe. Eye otja ungura nai kotutapo atuhe twOndanda yOmahakaeneno. 23 Eye wa ungura otutapo omirongo vivari komukuma wokokumuho kweyuva, 24 na twako ozombaze omirongo vine ozosilveri kehi yotutapo itwi omirongo vivari, ozombaze mbari kehi yorutapo aruhe, okuṱakamisa inga omatota warwo yevari. 25 Neye wina wa ungura otutapo omirongo vivari komukuma wokokunene kweyuva kwOndanda yOmahakaeneno, 26 nozombaze zatwo ozosilveri omirongo vine rukwao, okutja ozombaze mbari korutapo aruhe. 27 Nu kongotwe yOndanda yOmahakaeneno, komukuma wokongurova, wa ungura otutapo hamboumwe. 28 Wina wa ungura otutapo tuvari kovikoro vyOndanda yOmahakaeneno kongotwe. 29 Otutapo twi twokovikoro twa pambwa tuvari kumwe okuza kehi nga kombanda pongoho indji ondenga. Otutapo twi tuvari twokovikoro vivari twa ungurwa nao. 30 Otji pa ri otutapo hambondatu, nozombaze ozosilveri omurongo na hamboumwe, okutja ozombaze mbari kehi yorutapo aruhe peke.
31 Eye wa ungura omiti pomue mbi mavi tyakaṋa: Vitano kotutapo twomunda umwe wOndanda yOmahakaeneno, 32 na vitano kotutapo twomunda warwe wOmaturiro, na wina vitano kotutapo twokongotwe, komukuma wokongurova. 33 Omuti mbu mau tyakaṋa mokati wa ungurwa okutuurunga otutapo okuza komunda umwe nga komunda warwe. 34 Neye wa twako ongoldo kotutapo twi; nozongoho zatwo nḓa ṱiza omiti omityakaṋa za ri ozongoldo; wina komiti omityakaṋa wa twako ongoldo.
35 Norukwao wa ungura erapi etjizikize rokomurungu pomarapi omarovazu nomaserarovazu nomaserandu pyu, norupera ndwa tungwa nozosepa ozoheze; nu vya ri oviungura vyongongo mu mwa tungirwa oviserekarera vyovakerubi. 36 Neye we i ungurira ozongunḓe ine zomue, na twako ongoldo ku zo; novipa vyazo wina vya ri ovingoldo; neye we ze ungurira ozombaze ine ozosilveri. 37 Nu rukwao eye wa ungurira omahitiro wOndanda erapi etjizikize perapi erovazu neserarovazu neserandu pyu, norupera oruheze, erapi rovivaravara; 38 nu posi yaimbi pa ungurwa ozongunḓe ndano novipa vyazo. Koviuru vyazo na koviṱakamise vyozongoho kwa tuwa ongoldo; nozombaze ndano za ri ozongoporo.
© Herero Revision Bible © Bible Society in Namibia, 2021.
