Ovandu mba hindwa i Johanes Omupapitise
(Lk 7:18-35)1 Nu Jesus tja manene okuyandja omarakiza kovahongewa ve omurongo na vevari, waza po poṋa mbo na i okukahonga nokuzuvarisa movirongo vyopopezu.
2 Johanes Omupapitise ngunda e ri motjovakamburwa wa zuvire imbi Kristus mbyaa tjiti, notja hinda ovahongewa ve tjiva ku ye 3 okukemupura nai: “Tu raera, hapo oove ngwi Johanes ngwa tja meya, poo ingee ngatu undje warwe?”
4 Jesus wa zirire a tja: “Twendeye mu karaere Johanes imbi mbi mamu zuu na mbi mamu munu: 5 Ovapoṱu nambano mave munu, oviṱeṱu mavi ka wondja, imba mba vera omutjise wongana va kohororwa, ozomboro nambano maze zuu, ovaṱi mave pendurwa movakoke, nOmbuze Ombwa mai zuvarisiwa kovasyona. 6 Nomuṋingandu ingwi ngu hi nokuivaiva mu ami!”
7 Ovahindwa va Johanes ngunda averi pokuyaruka, Jesus arire tja hungire Johanes kotjimbumba a tja: “Tji mwa ya ku Johanes mokuti onguza, mwa ira okukamuna tjike? Oruu ndu maru hingwa i yombepo? 8 Mwa ira okukamuna tjike? Omundu ngwa zara ozombanda ozombwa? Ovandu mbe zara ozombanda ozombwa ve kara mozondjuwo zouhona! 9 Ndji raereye kutja hapo eṋe mwa ira okukamuna tjike? Omuprofete? Tjiri, me mu raere, eye omunene pomuprofete. 10 Orondu Johanes eye ngwi ngu maku zu nai momatjangwa: ‘Ndjambi ma tja tara, ami me tumu omuhindwa wandje komurungu woye kutja e kekuṱunine ondjira yoye.’ 11 Tjiri, ami memu raere kutja Johanes Omupapitise omunene povandu ngamwa avehe mba kwatwa kombanda yehi. Nungwari ingwi ngu ri okaṱiṱiṱiṱi mouhona womayuru, eye omunene pu Johanes. 12 Okuza komayuva wa Johanes Omupapitise nga ku ndinondi ouhona womayuru u kondjisiwa moutwe, nu ovandu ovanautwe ve kondja okuukambura komasa. 13 Ovaprofete avehe pamwe nOmatwako wa Moses va hungira ouhona womayuru nga komayuva wa Johanes. 14 Neṋe tji mu nombango okukambura mombuze yawo, Johanes onguri Elia ingwi ngu kwa za meya. 15 Ngu nomatwi okuzuva nga zuve!
16 “Hapo omuhoko wa nambano mba sokuusasaneka ku tjike? Owo u ri otja ovanatje mba haama poruveze romarandisiro, nu mbu mave ravaerasana nai: 17 ‘Twe mu tonene ohiva, neṋe amu ha pundu; twa imbura omaimburiro womutambo, neṋe amu ha kamburire.’ 18 Johanes tje ya, we ritjaera kovikurya na komavinu, navehe va tja: ‘Eye u nombepo ohakohoke!’ 19 Nu Omuna wOmundu tje ya, eye aa ri nu aa nu, navehe ve tja: ‘Tareye omundu ngo omunararu, nomunwe womavinu, nepanga rovasutise votjisuta tjouhona novanauvi!’ Nungwari ounongo wa Ndjambi ma uyeta ovihape mbi mavi raisa kutja imbwi ounongo we owo ouatjiri.”
Ovirongo ovihinangamburiro
(Lk 10:13-15)20 Ovature vovihuro mbi Jesus ma tjitire ovihimise vye ovingi kave ritanaurire kourunde wawo, neye opa hungirira imbi ovihuro na tja: 21 “Owee kove, Korasin! Owee kove, Betsaida! Andakuzu ovihimise mbya tjitirwa mu eṋe vya tjitirwa mOtirus na kOsidon, andakuzu ovature vavyo va zara rukuru ozombanda zomakutu nokuritirira omutwe okuraisa kutja owo ve ritanaura kourunde wawo! 22 Ami me mu raere kutja meyuva rombanguriro Ndjambi ma tjariparere Tirus na kOsidon tjinene okukapita eṋe! 23 Nove Kapernaum, mo tjangovasi mo tongamisiwa nga keyuru are? Ove mo nakaurirwa pehi nga motjovasengwa! Andakuzu ovihimise mbya tjitirwa move vya tjitirirwa mOsodom, andakuzu otjo opunga atji ri nga ku ndinondi! 24 Nungwari memu raere kutja mEyuva rOmbanguriro Ndjambi ma tjariparere otjihuro Sodom okukapita eṋe!”
Indjeye ku ami nu mu suve
(Lk 10:21-22)25 Moruveze tjingero ndo Jesus wa tjere: “Tate, Omuhona weyuru nehi, ami me ku tjere okuhepa kutja wa undika oviṋa mbi kozonongo na kovanazondunge nu we vi vandururira ounatje ouṱiṱi. 26 Ii, Tate, indji ondja ri ombango yoye kutja pe kare nao.
27 “Oviṋa avihe Tate we vi yandja ku ami. Kape na ngu ma tjiwa kutja Omuna owaṋi posi ya Ihe, nu kape na ngu ma tjiwa kutja Ihe owaṋi posi yOmuna na imba ingwi Omuna omuini mba vanga okumutjiukisa.
28 “Indjeye ku ami eṋe amuhe mbu mwa pungarisiwa i okutjinda omitwaro omizeu, nu ami me mu suvisa. 29 Tooreye omutenge wandje nu mu rihongere ku ami, tjinga ambi ri ongozu nomurisusuparise momutima, neṋe mamu mwine ominyo vyeṋu orusuvo. 30 Orondu otjiyoke tjandje tji me kupe otjiṋa uriri otjipupu, nomutwaro wandje mbu me twa kombanda yoye ka muzeu okuutjinda.”
© Herero Revision Bible © Bible Society in Namibia, 2021.
