Ndjambi eye Muhona woruveze ndu maru ya
1 Purateneye kotjiṋa hi, tjiwaṋa tja Israel,
eṋe mbu mu ri ozondekurona za Juda.
Eṋe mu yana mena ra Muhona,
nu mu tja mu rikotamena ku Ndjambi wa Israel,
nungwari omambo weṋu tjandje
kamasemba nu kauatjiri.
2 Eṋe mu ritongamisa nu mu tja
oweṋe ovature votjihuro otjiyapuke,
nu mu tja mwe riyameka ku Ndjambi wa Israel;
ena re ondi ri Muhona Omunamasaaehe.
3 Muhona ma tja nai ku Israel:
“Rukuru ami mba zuvarisire imbi mbi mavi tjitwa;
tjazumba mokamanga arire tji mba yenenisa vyo.
4 Ami mba tjiwa kutja oove otjirangaranga,
nokutja ove u nongukutusengo otja otjitenda,
nu ko petuka tjimuna ongoporo ndji ha petuka.
5 Nu otji mbe ku raera oviṋa mbi mavi ya rukuru,
ngunda avi hiya tjitwa,
okutjaera kutja o ha tja
oviserekarera vyoye vyovisenginina
ombya tjita kutja oviṋa mbi vi yenenisiwe.
6 “Oviṋa avihe, mbi mba tjivisa, nambano vya tjitwa;
nove mo sokuitavera kutja
omazuvarisiro wandje ya ri osemba.
Nambano me ku raere oviṋa ovipe mbi mavi ya,
ovitjitwa mbi mbi hi na mba hororere ko rutenga.
7 Ami nambano nai me tjiti kutja vi yenenisiwe;
oviṋa otja imbi kavina pu vya ri momayuva nga kapita.
Andakuzu opu vya ri, ove itjo tja u vi i rukuru avihe.
8 Ami mba tjiwa kutja ovandu
katjave kara nouṱakame move,
nokutja ove aruhe u tjiukwa otja omupirukire.
Opu wa za okuhinokuzuva oviṋa avihe mbi oparukaze,
nopu u ha zire okuvizuva nomatwi woye.
9 “Ovandu kutja ve tange ena randje,
ami me tjaere omazenge wandje.
Me ye yarura ombunda mena rondjozikiro yandje,
nu hi nokukuyandeka.
10 Ami mbe ku rora nomuriro womihihamo
tjimuna osilveri tji i kohororwa mezuko.
11 Imbi mbi me tjiti me ritjitire omuini;
ami hi nokuyandjera ena randje okuyambururwa,
nu hi nokuyandjera ngamwa auhe
okuhaṋasana nami ondatero
ndji ri oyandje, noyandje erike.”
Kirus eye omunane omutoororwa wa Muhona
12 Muhona ma tja nai:
“Puratena ku ami, Israel, ngu u ri otjiwaṋa tji mba isana!
Owami Ndjambi, ngu mbi ri Omutenga nomusenina,
Ndjambi erike!
13 Omake wandje ya ungura omazikameno wehi,
nu ya parangisa omayuru.
Tji me isana ehi nevaverwa,
owo ye ya tjimanga naye kurama pamwe.
14 “Wongareye nu mu puratene, eṋe amuhe!
Kape noomukuru mbe zuvarisa kutja
omurumendu ngu mba toorora ma rwisa Babilon;
eye ma tjiti imbi ami mbi me vanga kutja a tjite.
15 Owami ngwi ngu mba hungira nu ngu mbe mu isana.
Ami mbe mu raa kutja me ye
nu mbe mu pa ondoṋeno momeripura we.
16 “Nambano indjeye popezu na ami
mu zuve imbi mbi me hungire.
Okuza kombutiro ami mba hungira ongahukiro,
nu aruhe mba tjita kutja
omambo wandje ye rire ouatjiri.”
Nambano Muhona Ndjambi
we ndji pa ombepo ye ne ndji hindi.
Omeripura wa Muhona kotjiwaṋa tje
17 Omuyapuke wa Israel,
Muhona, Omukuture woye, ma tja nai:
“Owami Muhona, Ndjambi woye,
ngu mbi vanga okukuhonga ihi tji tji ri ombatero kove,
nu ngu me ku urikire ondjira mu mo sokukawondja.
18 “Andakuzu wa puratena komatwako wandje,
ouṋingandu itjau pupira kove otja onḓonḓu ndji ha pwire,
ousemba itjau ya kove otja
ozongazona nḓe ritona komukuro.
19 Ozondekurona zoye itjaze rira ozengi pu pe ṱeki eheke,
nu ami etje tjita kutja omana wazo
aye ha zemisiwa komurungu wandje.”
20 Piteye mObabilon mu ryange moukutuke!
Ravaereye ombuze nenyando;
nu tjiviseye nai koṋa akuhe:
“Muhona wa kutura omukarere we Israel!”
21 Muhona tja tuurungisa otjiwaṋa tje momutenya,
mokuti onguza ku kwa kukuta,
owo kave ṱire onyota.
Eye we ve pitisira omeva moruuwa;
wa pamuna oruuwa,
nu mu rwo amu pupu omeva.
22 “Ovarunde kamaave munu ohange”, Muhona ongwa hungire.
© Herero Revision Bible © Bible Society in Namibia, 2021.
