Omeripura wokuyandisa otukupo otuhovekwa
1 Esra ngunda e ripete mongumbiro momurungu wondjuwo ya Muhona, ama riri nu ame rihepura ourende we, otjimbumba otjinene tjOvaisrael, ovarumendu novakazendu novanatje otji ve mu woronganena tjandje mave riri tjinene. 2 Sekania, omuzandu wa Jehiel, wonganda ya Elam, otja tja nai ku Esra: “Eṱe twa kara nokuhinouṱakame ku Ndjambi tji twa kupa ovakazendu wozonganda; nungwari nangarire kutja pe ri nao, inga pe nomaundjiro kOvaisrael. 3 Nambano ngatu tjite omakwizikiro omaṱakame ku Ndjambi wetu kutja matu isa ovakazendu mba novanatje vawo ve yaruke. Eṱe matu tjiti imbi ove na imba mbe yozika omatwako wa Ndjambi mbi mamu tu rongo okutjita. Matu tjiti imbi Omatwako wa Ndjambi mbi maye hee. 4 Otjiṋa hi nga tji rire ourizirira woye. Eṱe matu ku vatere. Panḓipara, nu u ungure!”
5 Esra otja tjita kutja ovapristeri ozohongora nOvalevi notjiwaṋa atjihe ve tjite oruyano rokutja mave yenenisa ondunge ya Sekania. Nowo va yana. 6 Tjazumba eye otja sekama momurungu wondjuwo ya Muhona na kahita metuwo ra Johanan, omuzandu wa Eljasib, na rara mo ouṱuku e hi nokurya nokunwa, tjandje u noruhoze nouhaṱakama wovahuurwa.
7 Ombuze ya hindwa mOjerusalem na mOjuda arihe kutja avehe, mba kotokere okuza kouhuura ve woronganene mOjerusalem. 8 Omarakiza wovanane votjiwaṋa owo nga: Auhe ngu he ere moure womayuva yetatu, ma yekwa ouini we auhe, nu ma kondwa kombongo. 9 Moure womayuva yetatu nga, meyuva oritjamirongo vivari komueze outjamuvyu ovarumendu avehe mba mba turire mehi ra Juda nora Benjamin otji ve ya kOjerusalem, nave woronganene morupanda rwondjuwo ya Muhona. Ombura aa i roko tjinene, nu auhe wa zezerisiwa i ombura na indji onḓengu yombongarero.
10 Omupristeri Esra wa sekama na hungire ku wo a tja: “Eṋe mwa rira ovahaṱakama; mwa eta ondjo kOvaisrael mokukupa ovakazendu wozonganda. 11 Nambano rihepureye omauvi weṋu komurungu wa Muhona, Ndjambi wooiho mukururume, nu mu tjite ombango ye. Kareye peke novandu wozonganda, mba tura mehi retu, nu mu haṋike novakazendu veṋu wozonganda.”
12 Otjiwaṋa tja zira ama tji ravaere nai: “Eṱe matu tjiti ngamwa ihi tji mo tu raere.” 13 Nungwari tja weza atji tja: “Ovandu ovengi tjinene, nombura mai roko nomasa. Katu nokusora okukurama pendje nai. Ihi katjiṋa tji matji sokutjitwa meyuva rimwe poo momayuva yevari, orondu ovengi vetu va tura ondjo motjiṋa hi. 14 Ovahongore vetu ngave kuramenepo ombongarero aihe; owo ngave konḓonone otjiṋa hi. Tjazumba auhe ngu nomukazendu wozonganda nge ye moruveze ndwa tuwa po, pamwe novanane novapangure votjihuro tjawo. Komuhingo mbwi omazenge wa Ndjambi motjiṋa hi otji maye isiwa po.” 15 Kapa ri umwe ngwa kuramena omeripura nga momurungu posi ya Jonatan, omuzandu wa Asahel, na Jakseja, omuzandu wa Tikwa, nowo va vaterwa i Mesulam nOmulevi Sabetai.
16 Ovahuurwa mba kotokere va yakura omeripura nga, nu Esra, omupristeri, arire tja toorora ovarumendu moviuru vyozonganda, na tjanga omana wawo. Meyuva etenga komueze outjamurongo otji va uta omakonḓononeno motjiṋa hi, 17 nu moure womieze vitatu vyokomurungu va konḓonona oviposa avihe vyovarumendu, mba kupire ovakazendu wozonganda.
Omana wovarumendu mba kupire ovakazendu vozonganda
18 Omana wovarumendu, mba kupire ovakazendu vozonganda, owo nga: Ovapristeri va tjangwa otja kozonganda:
Monganda ya Jesua noyovangu ve, imba ovazandu va Josadak, mwa ri ooMaaseja na Elieser na Jarib na Gedalja. 19 Owo va kwizika kutja mave haṋika novakazendu vawo, notji va punguha ondwezu yonḓu i rire ombunguhiro yokuisapo ondjo yawo.
20 Monganda ya Imer mwa ri Hanani na Sebadja.
21 Monganda ya Harim mwa ri ooMaaseja na Elia na Semaja na Jehiel na Usija.
22 Monganda ya Pashur mwa ri ooEljoenai na Maaseja na Ismael na Netanel na Josabad na Elasa. 23 Mozonganda zOvalevi mwa ri ooJosabad na Simi na Kelaja, wina ngu ri Kelita, na Petakja na Juda na Elieser. 24 Mozonganda zovaimbure mwa ri Eljasib, mozonganda zovatjevere vondjuwo ya Muhona mwa ri Salum na Telem na Uri. 25 Mozonganda zOvaisrael ovakwao, monganda ya Paros mwa ri ooRamja na Issija na Malkija na Mijamin na Eleasar na Malkija na Benaja.
26 Monganda ya Elam mwa ri ooMatanja na Sakaria na Jehiel na Abdi na Jeremot na Elia.
27 Monganda ya Satu mwa ri ooEljoenai na Eljasib na Matanja na Jeremot na Sabad na Asisa.
28 Monganda ya Bebai mwa ri ooJohanan na Hananja na Sabai na Atlai.
29 Monganda ya Bani mwa ri ooMesulam na Maluk na Adaja na Jasub na Seal na Jeremot.
30 Monganda ya Pahat-Moab mwa ri ooAdna na Kelal na Benaja na Maaseja na Matanja na Besalel na Binui na Manasse.
31 Monganda ya Harim mwa ri ooElieser na Issija na Malkija na Semaja na Simeon, 32 na Benjamin na Maluk na Semarja.
33 Monganda ya Hasum mwa ri ooMatenai na Matata na Sabad na Elifelet na Jeremai na Manasse na Simi.
34 Monganda ya Bani mwa ri ooMaadai na Amram na Uel, 35 na Benaja na Bedja na Keluhi, 36 na Wanja na Meremot na Eljasib, 37 na Matanja na Matenai na Jaasu.
38 Monganda ya Binui mwa ri ooSimi, 39 na Selemja na Natan na Adaja. 40 Monganda ya Sakai mwa ri ooSasi na Sarai, 41 na Asarel na Selemja na Semarja, 42 na Salum na Amarja na Josef.
43 Monganda ya Nebo mwa ri ooJeiel na Matitja na Sabad na Sebina na Jadai na Joel na Benaja.
44 Ovarumendu avehe mba va kupire ovakazendu wozonganda. Owo va haṋika novakazendu vawo, nave ve hindi puna ovanatje vawo kutja ve yaruke.
© Herero Revision Bible © Bible Society in Namibia, 2021.
