Omasanekero womukandi worukupo
(Lk 14:15-24)1 Norukwao Jesus wa hungirire kovandu momasanekero a tja: 2 “Ouhona womayuru wa sana nombara ndja tjitira omuzandu wayo omukandi worukupo. 3 Oyo ya hindire ovakarere vayo okukaraera ovaṋangwa vayo ve ye komukandi, nungwari owo kave vangere okuya. 4 Oyo opu ya hindira ovakarere ovakwao ve katje nai kovaṋangwa: ‘omukandi wandje wa ṱunwa pa pu; ozonduwombe nozondana zandje nḓa ṋunisiwa za ṱu, navihe vya ṱunwa vya manuka. Indjeye komukandi worukupo!’ 5 Nungwari imba ovaṋangwa kave karere ko na tja, notji va ya koviungura vyawo, umwe kehi re romakunino nomukwao kondjuwo ye yomarandisiro. 6 Novakwao tjiva va kambura imba ovakarere ave tono nave ve zepa. 7 Ombara ya pindikire tjinene na rire tji ya hindi ovarwe vayo wovita okukazepa ovandu mbo nokukanyosa otjihuro tjawo. 8 Tjazumba ai isana ovakarere vayo ai tja ku wo: ‘Omukandi wandje wa ṱunwa wa manuka, nungwari ovandu mbu mba ṋanga kave sorere ko. 9 Nambano twendeye komivanda mu kaṋange ovandu ovengi komukandi otja punga amamu kevemuna.’ 10 Ovakarere arire tji va i komivanda nave kawonga ovandu avehe mbu va kamuna ngo, ovawa novavi, netuwo mu mwa ri orukupo ari ura ovandu.
11 “Nombara tji ya hita okukatara imba ovaṋangwa, arire tji ya munu omundu ngu hi nombanda yorukupo, 12 nai mu pura ai tja: ‘Mukwetu, imwi wa hiti vi au hi nombanda yorukupo?’ Nungwari eye ka hungirire otjiṋa. 13 Poṋa mbo ombara ya raera ovakarere kutja: ‘Mu pandekeye omake nozombaze nu mu kemuyumbe pendje monḓorera ṱukuṱuku, a rire ka karirira nokukakweya omayo.’ ”
14 Nu Jesus wa mana okuhungira a tja: “Ovengi uri mba isanewa, nungwari ouṱiṱi mba toororwa.”
Okusuta otjisuta tjouhona
(Mk 12:13-17Lk 20:20-26)15 Nu Ovafarisei va kazikamisa kutja Jesus mave mu pata vi momambo we. 16 Tjazumba arire tji va hindi ovahongewa vawo tjiva novandu tjiva votjira tja Herodes ku ye kutja ve katje nai: “Muhonge, matu tjiwa kutja ove u hungira ouatjiri, nokutja u honga ondjira ya Ndjambi mouatjiri, nu ko rikende nouripura wovandu, tjinga au ha tara ovandu momirungu. 17 Tu raera kutja mo ripura vi? Okusuta otjisuta tjouhona kombara ya Roma pa yandjerwa poo kape yandjererwe?”
18 Nungwari Jesus wa tjiza ovineya vyawo, notja zira a tja: “Vanatjavivi weṋe, mamu ndji rorere tjike? 19 Ndji raisireye ihi otjimariva otjisilveri tjotjisuta tjouhona!”
Owo arire tji ve mu etere ihi otjimariva otjisilveri, 20 neye e ve pura a tja: “Omurungu wauṋe nu indi ena orauṋe ndi ri ku tjo?”
21 Owo va zira ave tja: “Owombara.”
Jesus opa tjera ku wo: “Yandjeye ovyombara kombara, nu imbi ovya Ndjambi mu yandje ku Ndjambi.”
22 Nu tji va zuva omambo nga va himwa tjinene, na rire tji ve mu esa ave i.
Okupenduka movakoke
(Mk 12:18-27Lk 20:27-40)23 Meyuva tjingero ndo Ovasaduke tjiva imba mbu yave tja kape nombendukiro yovaṱi, ve ere ku Jesus. 24 Nu arire tji ve mu pura ave tja: “Muhonge, Moses wa tjere omurumendu ngu hi novanatje tja koka, omuangu poo erumbi re nga rye omuhepundu kutja owo ve kwate ovanatje mbu mave varwa otja orukwato rwomurumendu ngwi omuṱi. 25 Notji pa ri ovarumendu oovangu nomarumbi hambombari moyetu. Ingwi otjiveri wa koka nokuhinovanatje nu omukazendu we e mu esa nomuangu we. 26 Otjiṋa tjingetjo hi tja tjitirwe komuangu outjavari na koutjatatu nga ku ingwi outjahambombari. 27 Korusenina ingwi omukazendu omuini wina arire tja koka. 28 Nambano mombendukiro, ovaṱi tji mave penduka, ingwi omukazendu ma rire owauṋe mokati kawo, avehe pouhambombari wawo tjinga ave mu kupire?”
29 Jesus we ve zirire a tja: “Eṋe mu ri posyo tjinene mena rokutja kamu nokutjiwa omatjangwa nomasa wa Ndjambi. 30 Orondu ovaṱi tji va penduka movakoke mave kara otja ovaengeri, kamaave kupu, nu kamaave kupwa. 31 Nambano ingwi okupenduka kwovakoke: Kamu na pu mwa resa imbi Ndjambi mbye mu raerere are? Eye wa tjere: 32 ‘Owami Ndjambi wa Abraham na Ndjambi wa Isak na Ndjambi wa Jakob.’ Eye ka Ndjambi wovakoke, nungwari oNdjambi wovanamuinyo.”
33 Otjimbumba tjovandu tji tja zuva omambo nga, arire tji tja himisiwa i omahongero we.
Etwako enanḓengu pu aehe
(Mk 12:28-34Lk 10:25-28)34 Ovafarisei tji va zuvire kutja Jesus wa mwinisa Ovasaduke va worongana, 35 nu umwe wawo, ngwa ri onongo yomambo, we mu rora nomambo e mu pura a tja: 36 “Muhonge, etwako enanḓengu pomakwao aehe oriṋe?”
37 Jesus a ziri a tja: “Suvera Muhona Ndjambi woye nomutima woye auhe nomuinyo woye auhe nozondunge zoye azehe. 38 Indi ondi ri etwako enanḓengu netenga. 39 Netwako oritjavari ndi ṱeki pekwao ndi oro ndi: Suvera omukweṋu otja tji we risuvera omuini. 40 Momatwako yevari nga omu mwa wanena Omatwako wa Moses aehe nomahongero wovaprofete.”
Omutwirisiwa, Omuna wa David
(Mk 12:35-37Lk 20:41-44)41 Ovafarisei tji va woronganene, Jesus we ve purire a tja: 42 “Mu ripura vi nOmutwirisiwa? Eye Omuna wauṋe?”
Owo va zirire ave tja: “Eye Omuna wa David.”
43 Jesus arire tja pura a tja: “Nu David mOmbepo we mu isanene tjike kutja ‘Muhona’? Indu tja tjere:
44 ‘Muhona wa tja nai kOmuhona wandje:
Kara pehi kokunene kwandje
nga ami tji mba twa ovanavita na ove
kehi yozombaze zoye’
45 Nu David omuini tji me mu tja ‘oMuhona’, Omutwirisiwa ma rire vi Omuna wa David?”
46 Nu kapa ri umwe ngwa sorere okuzira Jesus embo, nokuza keyuva ndo kapa ri omundu ngwa rorere okumupura omapuriro rukwao.
© Herero Revision Bible © Bible Society in Namibia, 2021.
