Ombanguriro koviwaṋa oviraranganda
1 Ombuze ya Muhona oyo ndji: Eye wa zikamisa omberero kehi ra Hadrak na kotjihuro Damaskus. Kamihoko vya Israel porwavyo mbi ri ovya Muhona, nungwari otjihuro ohongora tja Sirie wina otja Muhona. 2 Otjihuro Hamat tji tji ri komukuro wehi ra Hadrak wina otja Muhona, novihuro ooTirus na kOsidon novature vavyo ozonongo wina. 3 Tirus tje ritungira oviṱunga nu tja tendeka osilveri nongoldo onyingi kumwe nga tji vya rira oviṋa uriri tjimuna ondova momivanda. 4 Nungwari Muhona ma isa po oviṋa avihe mbi tji na vyo. Ma yumbu outumbe watjo mokuvare, notjihuro matji sesetwa i omuriro.
5 Otjihuro Askelon matji munu oviṋa mbi, nu atji tira. Notjihuro Gasa matji munu nai natji zezerisiwa i omburuma. Wina otjihuro Ekron matji munu hi, nomaundjiro watjo maye zengisiwa. Gasa matji zepaisa ombara yatjo, nu Askelon matji isiwa tjo. 6 Ovandu mbe nombinḓu ndja rungwa mave tura mOasdod. Muhona ma tja nai: “Ami me yandeke omeritongamisiro wOvafilisti. 7 Owo kave tji nokurya onyama ndji nombinḓu, novikurya vyarwe mbya zerikwa. Avehe mba mba sewa po mave rire ouṋepo wotjiwaṋa tjandje, nu mave sana kovoruzo romuhoko wa Juda. Ovature va Ekron mave rire ovotjiwaṋa tjandje tjimuna Ovajebusi tji va tjita. 8 Ami omuini me tjevere ehi randje nu me ṱakamisa kutja ovimbumba vyovarwe wovita avi ha tuurungire mu ro. Ami hi nokuyandjera ovandu ovindandi kutja ve ṋiṋikize otjiwaṋa tjandje rukwao, orondu ami mba muna ombamisiro yatjo.”
Ombara ndji mai ya
9 Yoroka, yoroka, tjiwaṋa tja Sion!
Ravaereye ondjoroka, oweṋe vature va Jerusalem!
Tareye, ombara yeṋu mai ya!
Oyo mai ya nousemba noutoṋi
aye risusuparisa naya kavire kokasino,
okasino okamutanda, okangorona kokasino okazenḓu.
10 Muhona ma tja nai:
“Ami me isa mo omatemba wovita mOisrael
noukambe wovita mOjerusalem;
omauta ngaa e ungurisiwa movita maye teyewa.
Ombara yoye mai tjiti ohange mokati koviwaṋa;
oyo mai honapara okuza kokuvare nga kokuvare,
okuza konḓonḓu Eufrat nga komaandero wouye.”
Otjiwaṋa tja Ndjambi matji yarurwa ko
11 Muhona ma tja nai:
“Mena romerikutiropamwe wandje na eṋe,
nga tuwa ko otjihako tjombinḓu yozombunguhiro,
ami me mu kutura,
me mu kutura kondjombo
youhuura ndji hi nomeva.
12 Kotokeye, eṋe vahuurwa nambano
mbu mu nomaundjiro.
Kotokeye koyeṋu ku ku nondjamo!
Ami me mu raere kutja nambano me
mu sutire nondaya povikando vivari imbi
avihe mbi mwa hihamisirwa.
13 Ami me rumbire Juda otja outa womurwe wovita,
nu me twako Israel otja otjiku.
Ami me ungurisa ovarumendu va Sion
otja engaruvyo okurwisa ovarumendu va Grike.”
14 Muhona ma munika kombanda yotjiwaṋa tje.
Eye ma yaha oviku vye tjimuna otutjeno twombura.
Muhona Ndjambi ma posisa ohiva;
eye ma kayenda movivepo mbi mavi zu
komukuma wokeyuva kokumuho.
15 Muhona Omunamasaaehe ma yama otjiwaṋa tje,
notjo matji yandeke ovanavita na tjo.
Matji rokoha motjirwa otja ovandu
mba purukisiwa i omavinu,
nu matji tirahi ombinḓu yovanavita na tjo;
oyo mai pupu otja ombinḓu yombunguhiro ndji
mai tirirwa kotjipunguhiro okuza motjiyaha.
16 Eyuva ndo tji re ya Muhona, Ndjambi
wawo ma yama otjiwaṋa tje tjimuna
omurise tje yama orupanda rwe kooma.
Owo mave keṋakeṋa mehi re otja omawe
omahuze kekori rouhona.
17 Ehi, tjiri, mari rire ewa nemanise!
Ovandu omitanda mave harisiwa omasa
i ovikokotwa nomavinu waro.
© Herero Revision Bible © Bible Society in Namibia, 2021.
