Ovapangure 12 - Herero Revision Bible (HRR)

Jefta nOvaefraim

1 Ovaefraim va woronganisirwa pamwe okukarwa; owo va konda onḓonḓu Jordan ave i kOsafon nave katja nai ku Jefta: “Okutjavi tji wa karwa nOvaamoni nokuhinokutuisana okuyenda puna ove? Eṱe matu ku nyosire mondjuwo yoye.”

2 Nungwari Jefta wa tja nai ku wo: “Ami novandu vandje twa ri notjiposa otjinene kuna Ovaamoni. Mba kwa ombatero ku eṋe, nungwari eṋe kamu ere okundjiyama ku wo. 3 Nami tji mba muna kutja eṋe kamu nokuya okundjiyama, otji mbe ritwa moumba wokurwisa Ovaamoni; nu Muhona we ndji pa outoṋi kombanda yawo. Nambano eṋe mwe ya okundjirwisira tjike?” 4 Jefta wa woronganisa Ovagilead okukarwisa Ovaefraim; neye we ve havera. Ovaefraim ave tja: “Eṋe, Vagilead, mbu mu kara mokati komuhoko wa Efraim nowa Manasse, oweṋe ovandu ovataure mbu mwa zire kehi ra Efraim.” 5 Nu Ovagilead va tjaerera Ovaefraim pomakondero wa Jordan. Nu ngamwa Omuefraim auhe omuture tja tja: “Ndji esa mbi konde,” Ovagilead otjaave mu pura ave tja: “Oove Omuefraim?” Neye tja ziri a tja: “Kako,” 6 owo otjaave mu raere kutja a tje “Skibolet.” Neye aa tja: “Sibolet,” tjinga aa ha sora okutamuna nawa, otjaave mu kambura nave mu zepere mbo pomakondero wonḓonḓu Jordan. Moruveze ndo mwa ṱa Ovaefraim omayovi omirongo vine na yevari.

7 Nu Jefta wa ri omunane mOisrael oure wozombura hamboumwe. Neye wa koka na pakwa motjihuro tje omuini mOgilead.

Ovapangure ooIbsan na Elon na Abdon

8 Kombunda ya Jefta, Ibsan ngwa zire kObetlehem wa rira omunane mOisrael. 9 Eye wa ri novazandu omirongo vitatu. Novakazona ve omirongo vitatu wa kupisa kwarwe; novasuko omirongo vitatu, mba kapaha kwarwe, wa eta kovazandu ve okurira ovakazendu vawo. Ibsan wa ri omunane mOisrael oure wozombura hambombari. 10 Neye wa koka na pakwa mObetlehem.

11 Kombunda ya Ibsan, Elon ngwa zire kOsebulon wa rira omunane mOisrael oure wozombura omurongo. 12 Nu Elon, Omusebulon, wa koka na pakwa mOajalon mehi ra Sebulon.

13 Kombunda ya Elon, Abdon, omuzandu wa Hilel, ngwa zire kOpiraton wa rira omunane mOisrael. 14 Eye wa ri novazandu omirongo vine, novazandu vovazandu omirongo vitatu, mbaa ve kavire kousino omirongo hambombari. Abdon wa ri omunane mOisrael oure wozombura hambondatu. 15 Nu Abdon, omuzandu wa Hilel, wa koka na pakwa mOpiraton mehi ra Efraim, mehi rozondundu rOvaamalek.