Oviserekarera vyovisenginina vya Israel mavi nyengwa
1 Ovasemba ve koka, nu kape na ngu kara ko na tja. Ovapore ve ṱa, nu kape na ngu tjiwa. Nowo tji va ṱu, kape na oumba mbu mau ve hihamisa. 2 Imba mbe hupa omuinyo omusemba ve muna ohange norusuvo monḓiro.
3 Indjeye nguno mu ye okupangurwa, oweṋe varunde! Kaweṋe ovasemba pozondjai novakatuke wotukupo novakorondu. 4 Mamu nyekerere uṋe? Mamu yahamene uṋe omahwaranyo weṋu, nokuropora omaraka weṋu, eṋe vanavizeze? 5 Eṋe mu rikotamena koomukuru votukwato mokuvakirasanena kehi yomimbonde omizere. Mu punguha ovanatje veṋu moviana na motupoko twomawe. 6 Eṋe mu toora omawe omaheze moviana mbi namu rikotamene ku wo aayo owo oomukuru. Mu ve tiririra omavinu okurira ozombunguhiro zomanuwa namu ve punguhire ozombunguhiro zovikurya. Mamu tjangovasi ami mbi nohange noviṋa mbi avihe are? 7 Eṋe mu ronda kozondundu ozonde okukapunguhira ko ozombunguhiro nokukavakirasanena ngo. 8 Eṋe mu twa oviserekarera vyeṋu vyovisenginina kongotwe yomivero vyokomurungu na kozongambezero. Mwe ndji imbirahi amamu rihukura ozombanda zeṋu nokurara moviraro vyeṋu ovinene puna ozombarise zeṋu nḓu mu suta kutja ze rare puna eṋe. Nu imbo opu mu kovisira ozonḓuma zeṋu. 9 Mu ritjatja ovizumba nokurivava omaze weṋu omawa tjinene namu kerikotamena komukuru wotjisenginina Molok. Mu hinda ovatumwa veṋu kokure komikuma avihe, nangarire kotjovakoke okukapaha oomukuru ku mamu rikotamene. 10 Eṋe mu rihangaura mokupaha oomukuru varwe namu ramanga okuvepaha. Eṋe mu tjangovasi ovisenginina mavi mu pe omasa, nopu mu ha zu okungundipara.
11 Muhona ma tja nai: “Oomukuru mba oowaṋi mbu mave ku tirisa kutja u ndji korere ovizeze nokundjizemba oparukaze, nokutja o ha kara ko na tja na ami. Wa isa okundjiyozika mena rokutja ami mba mwina nai are? 12 Mo tjangovasi imbi mbi u tjita ovisemba, nungwari ami me horora ouatjiri wotjikaro tjoye, noomukuru voye kave nokusora okukuvatera. 13 Tji mo ku ombatero, oviserekarera vyoye vyovisenginina ngavi ku yame. Otjipukupuku matji vi twara, norumuinyo maru vi zengisa. Nungwari imba mbe riyameka ku ami mave tura mehi, nu mave rikotamene ku ami mondjuwo yandje.”
Ndjambi ma kwizike ombatero nomberukiro
14 Muhona ma tja nai: “Tji eseye otjiwaṋa tjandje tji kotoke ku ami. Tungeye ondjira, nu i ṱuneye! Isemoeye oviputarise avihe mondjira yatjo!
15 “Owami Ndjambi omuyapuke wOkombandambanda ngu karerera. Ami mba tura mokombanda na motjouyapuke, nungwari ami wina mbi kara puna imba mba ningisa ondjenda na imba overisusuparise, kokutja mbi yarure koupe ombepo yoverisusuparise nokutarareka omitima vyovanandjenda. 16 Ami mba yandja omuinyo kotjiwaṋa tjandje, nu hi nokuuhara ame tji posisa nokuṱomazenge na tjo nga aruhe. 17 Ami mba ṱire omazenge na tjo mena rourunde noukorokope watjo, notji mbe tji vera ne tji imbirahi. Nungwari otjo tja ri otjirangaranga, notji tja panḓera pokutwara ozondjira zatjo otjini.
18 “Ami mba muna ondjira ndji tja twara, nungwari me tji verukisa ne tji pe orusuvo, nu me huhumiṋa imba mbe noruhoze 19 kutja ve ndji tange rukwao. Ami me yandja ohange ku avehe vopopezu novokokure. Ami tjiri, me verukisa otjiwaṋa tjandje. 20 Nungwari ovanauvi ve ri otja okuvare ku ku hi norusuvo, nu ku ku nozongazona nḓe ha porimana nu nḓe tukurura ondova nomunoko. 21 Ovarunde kamaave munu ohange,” Muhona ma tja nai.
© Herero Revision Bible © Bible Society in Namibia, 2021.
