Onḓiro ya Saul novazandu ve
(1Eku 10:1-12)1 Ovafilisti va rwa ovita kuna Ovaisrael, nOvaisrael va taura, novengi va ṱa nave saravara kondundu Gilboa. 2 Ovafilisti va tezera Saul novazandu ve, nave kazepa ovazandu vetatu va Saul okutja ooJonatan na Abinadab na Malkisua. 3 Notjirwa tji tja kovera Saul tja ri otjizeu; ovanamauta tji ve mu muna, ve mu yaha ave mu tende tjinene. 4 Saul otja tja nai komutjinde wovirwise vye: “Nana engaruvyo roye u ndji zepe, kutja Ovafilisti ovahasukara ave he ya okundjihemba.” Nungwari ingwi omutjinde wovirwise vye wa panḓa, tjinga aa tira tjinene. Saul otja toora engaruvyo re ne riwisire ko omuini. 5 Nomutjinde wovirwise vye tja munu kutja Saul wa koka, eye wina arire tje riwisire kengaruvyo re, naveyevari otji va koka. 6 Saul novazandu ve vetatu, nomutjinde wovirwise vye, novandu avehe otji va ṱa meyuva ndo. 7 Ovaisrael mba turire komukuma mbwina wOrutjandja rwa Israel va taura, nokutja Saul wa ṱu puna ovazandu ve, arire tji va isa ovihuro mbi, nave tupuka; nOvafilisti otji ve ya, nave tura mu vyo.
8 Mependukirwa Ovafilisti va ya okukahuura oviṋa vyovaṱi, arire tji va munu orutu rwa Saul na itwi twovazandu ve vetatu atwa saravara kondundu Gilboa. 9 Nowo va konda otjiuru tja Saul, ave mu hukura ovirwise vye nave hindi ovatumwa komikuma avihe vyehi rOvafilisti okukainganisa ombuze youtoṋi mozondjuwo ozonḓere zovisenginina na motjiwaṋa. 10 Tjazumba otji va twa ovirwise vya Saul mondjuwo onḓere yomukuru wotjisenginina Astarte, nungwari indwi orutu rwe ve ru papera korumbo rwotjihuro Bet-San.
11 Novature va Jabes mOgilead tji va zuva imbi Ovafilisti mbi va tjita ku Saul, 12 ovarumendu imba omapenda tjinene otji va kayenda ouṱuku auhe; nowo va katurura orutu rwa Saul na itwi twovazandu ve korumbo rwa Bet-San, nave tu eta kOjabes, ku ve tu ningirisira. 13 Nowo va toora omaṱupa wawo, ave keyepaka kehi yomungwati kOjabes, nave keritjaera kovikurya oure womayuva hambombari.
© Herero Revision Bible © Bible Society in Namibia, 2021.
