Omaṱunino wotjimbumba tjovita notjouhona
1 Ihi otjo otjivaro tjoviuru vyomaṱunḓu wOvaisrael notjovanane wozonganda notjovahongore vawo mbaa ve ungura oviungura vyouhonapare. Momueze auhe mombura aa mu kara orupa peke rwovarumendu omayovi omirongo vivari na yane motjiungura momueze mbo, kehi yomuhongore worive.
2 Omana wovahongore wovita, mba ri motjiungura momueze auhe peke, owo nga:
Momueze omutenga wa ri Jasobam, omuzandu wa Sabdiel. 3 Eye wa ri owonganda ya Peres yomuhoko wa Juda.
4 Momueze outjavari wa ri Dodai, Omuahohi. Miklot ongwa ri kehi ye momatyero.
5 Momueze outjatatu wa ri Benaja, omuzandu wa Jehojada, Omupristeri Otjiuru. 6 Eye wa ri omuhongore wa imba “Omirongo vitatu.” Omuzandu we Amisabad we mu pingena okurira omutye wotjimbumba hi.
7 Momueze outjaine wa ri Asahel, omuangu wa Joab. Omuzandu we wena Sebadja ongwe mu pingena.
8 Momueze outjatano wa ri Samhut, Omuisraki.
9 Momueze outjahamboumwe wa ri Ira, omuzandu wa Ikes, ngwa zire kOtekoa.
10 Momueze outjahambombari wa ri Heles, Omuefraim, ngwa zire kOpelon,
11 Momueze outjahambondatu wa ri Sibekai, Omuhusati; eye wa ri owonganda ya Serak yomuhoko wa Juda.
12 Momueze outjamuvyu wa ri Abieser, Omuanatot womuhoko wa Benjamin.
13 Momueze outjamurongo wa ri Maharai, Omunetofa; eye wa ri owonganda ya Serak.
14 Momueze outjamurongo na umwe wa ri Benaja, ngwa zire kOpiraton womuhoko wa Efraim.
15 Momueze outjamurongo na vivari wa ri Heldai, Omunetofa; eye wa ri ondekurona ya Otniel.
Oviuru vyomihoko omurongo na vivari vya Israel
16 Inga owo omana woviuru vyomihoko vyOvaisrael:
Momuhoko wa Ruben wa ri Elieser, omuzandu wa Sikri;
momuhoko wa Simeon wa ri Sefatia, omuzandu wa Maaka.
17 Momuhoko wa Levi wa ri Hasabja, omuzandu wa Kemuel;
momuhoko wa Aron wa ri Sadok.
18 Momuhoko wa Juda wa ri Elihu, umwe wovangu vombara David;
momuhoko wa Isakar wa ri Omri, omuzandu wa Mikael.
19 Momuhoko wa Sebulon wa ri Ismaja, omuzandu wa Obadja;
momuhoko wa Naftali wa ri Jerimot, omuzandu wa Asriel.
20 Momuhoko wa Efraim wa ri Hosea, omuzandu wa Asasia;
momuhoko wa Manasse mbwa turire kongurova wa ri Joel, omuzandu wa Pedaja.
21 Momuhoko wa Manasse mbwa turire komuhuka wa ri Jido, omuzandu wa Sakaria;
momuhoko wa Benjamin wa ri Jaasiel, omuzandu wa Abner.
22 Momuhoko wa Dan wa ri Asarel, omuzandu wa Jeroham. Imba omba ri oviuru vyomihoko vya Israel.
23 Ombara David ka varere ovandu, mba ri notjiwondo tjokehi yozombura omirongo vivari, orondu Muhona wa kwizika kutja ma takavarisa Ovaisrael otja ozonyose keyuru. 24 Omavarero nga ya utwa i Joab, omuzandu womukazendu Seruja, nungwari ke ye manene. Ndjambi wa vera Ovaisrael mena romavarero nga, nu otjivaro ihi otjisenina opu tji ha zire okutjangwa mOmahungi wombara David.
Oviuru mbya ri nondyero moviṋa vyouhona
25 Inga owo omana wa imba mba ri nondyero moviṋa vyouhona:
Komatuwo womapwikiro wovihuze vyombara wa ri Asmawet, omuzandu wa Adiel;
nu komatuwo womapwikiro woviṋa mbya ri mokuti na movihuro na movirongo na motuhungu wa ri Jonatan, omuzandu wa Usija.
26 Nu kovaungure vovitumbwa novikunwa wa ri Esri, omuzandu wa Kaleb.
27 Kovikunino vyomivite wa ri Simi, ngwa zire kOrama;
nu komapwikiro womavinu wa ri Sabdi, ngwa zire kOsifami.
28 Komiti vyomiṋinga na komikuyumbwa mbya ri motutjandja wa ri Baal-Hanan, ngwa zire kObet-Gader;
nu komapwikiro womaze womiṋinga wa ri Joas.
29 Kozongombe, nḓa ri motutjandja twa Saron wa ri Sitrai, ngwa zire kOsaroni;
nu kozongombe, nḓa ri momikutu wa ri Safat, omuzandu wa Adlai.
30 Kozongamero wa ri Obil, Omuismael;
nu kousino wa ri Jekdeja, ngwa zire kOmeronot.
31 Kozonyanda wa ri Jasis, Omuhagari. Imba avehe omba ri nondyero koviṋa vyombara David.
Ovayandjandunge va David
32 Jonatan, inyangwe ya David, wa ri omuyandjandunge nomutjiwe wokutjanga. Eye na Jehiel, omuzandu wa Hakmoni, omba ri ovahonge vovanatje vombara. 33 Ahitofel wa ri omuyandjandunge wombara; nu Husai, Omuarki, wa ri epanga rombara. 34 Kombunda yonḓiro ya Ahitofel, Jehojada, omuzandu wa Benaja, na Abiatar ve mu pingena okurira ovayandjandunge. Omuhongore wovimbumba vyovita vyombara wa ri Joab.
© Herero Revision Bible © Bible Society in Namibia, 2021.
