Moses ma pewa inga omatwako omurongo rukwao
(Eks 34:1-10)1 “Nu moruveze ndwi Muhona wa tjere nai ku ami: ‘Rihongera ovitjangero vivari vyomawe tjimuna imbi ovitenga, nu u riungurire otjipwikiro tjomuti. Ronda ku ami kondundu. 2 Nu kovitjangero mbi ami me tjanga ko omambo nga nga tjangerwe ku imbi ovitenga mbi wa nyanyaura; nu vi twa motjipwikiro.’
3 “Otji mba ungura otjipwikiro pomue, ne hongo ovitjangero vivari vyomawe tjimuna imbi ovitenga, ne rondo kondundu ambi novitjangero mbi vivari momake. 4 Nu Muhona wa tjanga kovitjangero mbi otja tja tjangere ku imbi ovitenga inga omatwako omurongo, nga yandjere ku eṋe meyuva rombongarero pondundu tja hungirire na eṋe mokati komuriro. Nu Muhona we vi yandja ku ami. 5 Nami mba tanauka ne heruka kondundu, ne katwa ovitjangero mbi motjipwikiro tji mba ungura, novyo vya kara mo otja Muhona pe ndji rakiza.”
6 NOvaisrael va tjindire okuza pozondjombo za Beerot-Bene-Jaakan nave i kOmosera. Aron oka kakokera, na rire kapakwa; nomuzandu we Eleasar we mu pingena moupristeri. 7 Okuza ngo owo va tjindira kOgudgoda, tjazumba ave tjindire kOjotbata, ehi rotuharwi. 8 Moruveze ndo Muhona wa toorora omuhoko wa Levi okutjinda Otjipwikiro tjOmerikutiropamwe wa Muhona, nokumukarera otja ovapristeri nokusera otjiwaṋa ondaya mena re nga ku ndinondi. 9 Ovalevi opu ve ha zire okupewa ehi ri rire otjirumatwa tjawo tjimuna omihoko vyarwe avihe tji vya perwe ehi; Muhona onguri otjirumatwa tja Levi otja Muhona, Ndjambi woye, pe mu kwizikira.
10 “Ami mba kara kondundu oure womayuva nomauṱuku omirongo vine tjimuna otjikando ihi otjitenga, nu Muhona we ndji zuvira otjikando hi rukwao, na ha vanga okukuyandeka. 11 Nungwari Muhona wa tja nai ku ami: ‘Sekama, twende u kahongorere otjiwaṋa kutja tji kahite mehi nokukerikambura ri rire ouini watjo, ami ndi mba kwizikira ooihe mukururume noruyano okuvepa.’
Omaronga omape
12 “Nu nambano, Israel, Muhona, Ndjambi woye, ma vanga nai kove: Tira Muhona, Ndjambi woye, teza ozondjira ze, mu suvera nokumukarera nomutima woye auhe nomuinyo woye auhe; 13 nu ṱakamisa omatwako wa Muhona, nomazikamisiro we ngu me ku rakiza ndinondi kutja u kare nawa! 14 Tara, eyuru ora Muhona, Ndjambi woye, nangarire eyuru indi rokombandambanda, nehi na avihe mbi ri mu ro. 15 Nungwari mooiho mukururume porwe Muhona oma ri nonyuṋe norusuvero; eye wa toorora eṋe, inḓa ozondekurona zawo, mokati koviwaṋa avihe otja tjinga ape ri nai. 16 Vi eseye imbi avihe mbi he ri ovya Muhona, nu amu rire ovirangaranga. 17 Orondu Muhona, Ndjambi weṋu, eye o Ndjambi kombanda yoomukuru vovisenginina, neye o Muhona kombanda yovahona; eye omunene nomunamasa, neye wa pwa okutiriwa. Eye ke nandoorora, nu kakambura oviyandjewa vyombopero. 18 Eye u ungurira ozosewa novahepundu ousemba, nu u suvera owozonganda ame mu pe ovikurya nozombanda. 19 Eṋe wina otji mamu sokusuvera owozonganda, tjinga amwa ri ovozonganda mOengipte. 20 Tira Muhona, Ndjambi woye, u mu karere erike, nu u kare nouṱakame mu ye, nomakwizikiro woye ye tjita mena re porwaro. 21 Mu tanga, eye Ndjambi woye, ngwe ku tjitira oviṋa ovinene novihimise mbi mbi wa muna nomeho woye omuini. 22 Ooiho mukururume tji va ire kOengipte va ri omirongo hambombari uriri, nungwari nambano Muhona, Ndjambi woye, we ku takavarisa otja ozonyose zeyuru.
© Herero Revision Bible © Bible Society in Namibia, 2021.
