Omuprofete Jehu ma tena Josafat
1 Josafat, ombara ya Juda, wa kotoka kondjuwo ye youhona mOjerusalem nokuhinatjipo. 2 Omuprofete Jehu, omuzandu wa Hanani, wa kahakaena nombara na tja ku yo: “Mo ripura kutja osemba okuvatera ovanauvi, nokusuvera imba mbe tonda Muhona are? Mokutjita nao ove we riyetere omazenge wa Muhona kombanda yoye. 3 Nungwari nangarire nao, mu noviwa mbi wa tjita. Ove wa isa mo ovihenḓe avihe ovizere vyomukuru wotjisenginina oserekaze Asera ovandu kuyave rikotamene, nu wa kondja okukongorera ombango ya Ndjambi.”
Omarundururiro Josafat nga tjita
4 Josafat wa kara mOjerusalem; nungwari eye aa ryanga aruhe mokati kovandu okuza kOberseba komukuma wokeyuva kokumuho nga komukuro wehi rozondundu ra Efraim komukuma wokeyuva kokunene kutja e ve kotore ku Muhona, Ndjambi wooihe mukururume. 5 Eye wa zika ovapangure movihuro avihe vya Juda mbya zeuparisiwa, 6 ne ve rongo a tja: “Ṱakamiseye, tji mamu pangura; kamu nokupangura otja kouvara womundu, nungwari mamu pangura otja kouvara wa Muhona, neye u ri puna eṋe, tji mamu pangura. 7 Tireye Muhona, nu mu pangure nounongo, orondu Muhona, Ndjambi wetu, ka vanga omatiku poo okutara konḓengu yomundu poo okukambura otjisuta tjombopero.”
8 Josafat wa zika Ovalevi novapristeri noviuru vyomaṱunḓu mOjerusalem kutja ve rire ovapangure voviposa vyokuzunḓa Omatwako wa Muhona, novapangure vozombata zoviposa pokati kovature votjihuro. 9 Eye we ve rakiza nai: “Ungureye oviungura vyeṋu amu nondira ku Muhona, nouṱakame, nonḓuviro ku ye mu avihe mbi mamu tjiti. 10 Ovakweṋu mbu mwa tura pamwe movihuro ngamwa avihe, tji ve mu etere otjiposa tjokuzepa omundu poo tjokuzunḓa omatwako poo omazikamisiro, ve rongeye nawa moviposa mbi kutja ave ha tura ondjo komurungu wa Muhona. Tji mu hi nokutjita nao, eṋe novature ovakweṋu mamu munu ouzeu womazenge wa Muhona. Nungwari tji mamu ungura oviungura vyeṋu nouṱakame, kamu nokutura ondjo. 11 Amarja, Omupristeri Otjiuru, ma kara nousemba moviposa avihe vyokukatuka Omatwako wa Muhona nu Sebadja, omuzandu wa Ismael, ongooneya mehi ra Juda, ma kara nousemba noviposa avihe vyokukatuka omatwako wombara. Imba Ovalevi ombe notjiungura tjokumuna kutja omatyero wozombanguriro ye yenenisiwe. Panḓipareye, nu tjiteye omaraerero nga, nu Muhona nga kare komunda wa imba mbe tjita ousemba.”
© Herero Revision Bible © Bible Society in Namibia, 2021.
