2 Ozombara 18 - Herero Revision Bible (HRR)

Hiskija ma rire ombara mOjuda

1 Mombura oitjatatu youhona wa Hosea, omuzandu wa Ela, ombara ya Israel, Hiskija, omuzandu wa Ahas, otja rira ombara mOjuda, 2 e notjiwondo tjozombura omirongo vivari nandano; neye wa honapara mOjerusalem oure wozombura omirongo vivari na muvyu. Ina wa ri Abi, omusuko wa Sakaria. 3 Hiskija wa tjita imbi mbyaa vi tjata ku Muhona ama horere kotjikaro tjaihe mukururume ombara David. 4 Eye wina wa nyona poṋa apehe pomerikotameneno kovisenginina kozondunda, a haṋa ozongunḓe zomawe na ke ovihenḓe ovizere mbya yapurirwa omukuru wotjisenginina oserekaze Asera. Eye wina wa nyanyaura onyoka yongoporo ndja ungurirwe i Moses, ndjiyai isanewa Nehustan. Ovaisrael ave twimisa ovyomoro omuwa kondjozikiro yayo, nga koruveze ndo. 5 Hiskija we riyameka ku Muhona, Ndjambi wa Israel; ehi ra Juda ka rina pu ra karere nombara yarwe ndja ri tjimuna Hiskija, nangarire komurungu poo kombunda ye. 6 Eye wa kara nouṱakame ku Muhona, a kara nonḓuviro ku ye na ṱakamisa omatwako aehe nawa Muhona nga yandjere ku Moses. 7 Muhona otja kara puna ye; neye wa kara nouṋingandu mu atjihe eye tjaa tjiti. Eye wa pirukira ombara ya Asirie na panḓa okuriyandja ku yo. 8 Eye wa havera Ovafilisti, na taurire momaturiro wawo, okuza kotjirongo otjiṱiṱiṱiṱi nga kotjihuro otjinenenene puna otjihuro Gasa nomahi nge tji kondoroka.

9 Mombura oitjaine youhona wa Hiskija, ndja ri ombura oitjahambombari youhona wa Hosea mOisrael, Salmanasar, ombara ya Asirie otja rwisa Ovaisrael na kovere Samaria. 10 Mombura oitjatatu yomakoverero Samaria otji tja wa; indji ya ri ombura oitjahamboumwe youhona wa Hiskija nombura oitjamuvyu youhona wa Hosea. 11 Ombara ya Asirie ya twara Ovaisrael otja ovahuurwa kOasirie, nai katurisa tjiva motjihuro Halak, na tjiva popezu nonḓonḓu Habor, mehi ra Gosan, na tjiva movihuro vya Medie.

12 Samaria tja wa, Ovaisrael tjinga ave ha ri nonḓuviro ku Muhona, Ndjambi wawo, nu ava teya omerikutiropamwe eye nga tjitire puna wo, nave ha ṱakamisire omatwako aehe, nga yandjerwe i Moses, omukarere wa Muhona. Owo kaave puratene nu kaave kara nonḓuviro ku wo.

Ovaasur mave tanda Jerusalem

(2Eku 32:1-19Jes 36:1-22)

13 Mombura oitjamurongo na ine youhona wa Hiskija, Sanherib, ombara ya Asirie, otja rwisa ovihuro avihe ovinamasa vya Juda, ne vi kambura. 14 Hiskija wa hinda ombuze ku Sanherib, ngwa ri mOlakis, na tja: “Ami mba tataiza; arikana, yaruka, pita mehi randje; nami me ku sutu pu movanga.” Ombara ya Asirie ya zira kutja Hiskija e mu hindire osilveri yondjinda yozokirograma 10,000, nongoldo yondjinda yozokirograma 1,000. 15 Hiskija we mu hindira osilveri aihe ndja ri mondjuwo ya Muhona na metuwo rovihuze rondjuwo youhona. 16 Eye wa kakaturura ongoldo komivero vyondjuwo ya Muhona, na indji ongoldo eye omuini ndja twire kozongambezero zomivero, ne i hindi aihe ku Sanherib. 17 Nungwari ombara yOvaasirie ya hinda otjimbumba otjinene tjovita okuza kOlakis okukarwisa Hiskija mOjerusalem. Otjo tja hongorerwa i ovahongore ve ovanene vetatu. Tji ve ya kOjerusalem, owo va kurama mondjira yovaungure vozombanda, meṋe yorurora ndu pupisa omeva okuza kerindi rokombanda. 18 Nu owo va hinda ombuze okukaisana ombara Hiskija; novahongore va Hiskija vetatu va pita okuvetjakanena, okutja oEljakim, omuzandu wa Hiskija, ngwa ri omuṱakamise wondjuwo youhona, na Sebna, omutjangerepo wouhona, na Joak, omuzandu wa Asaf, ngwa ri omuṱakamise wovitjangwa vyouhona. 19 Omuhongore umwe wOvaasirie we ve raera kutja ombara mai vanga okutjiwa kutja ihi otjiṋa tji tja tjita kutja ombara Hiskija e rivare omuini nai, otjikeṋa. 20 Eye wa pura nai: “Mo tjangovasi omambo womotjinyo porwe ongeri ounongo nomasa wokurwa ovita are? Mo ripura kutja owaṋi ngu me ku vatere okupirukira Ovaasirie? 21 Ove mo riyameke kOvaengipte kutja nani mave ku vatere, nungwari owo va sana nokati koruu ku ka teka nake tuvakaṋa eke roye. Notji tji ri ombara ya Engipte ku ngamwa auhe ngu me riyameke ku yo.”

22 Nu ingwi omuhongore Omuasirie wa ryamisa ehungi re komurungu na tja: “Poo mamu ndji raere kutja mamu riyameke ku Muhona, Ndjambi weṋu? Hiskija wa haṋa poṋa apehe pomerikotameneno ku Muhona novipunguhiro vye, nu tjazumba a raere otjiwaṋa tja Juda notja Jerusalem kutja tji rikotamenene potjipunguhiro ihi porwatjo tji tji ri mOjerusalem. 23 Ngatu tye ozombata mena rombara ya Asirie komuhingo mbwi: Me ku pe oukambe omayovi yevari, tji mo munu ovandu ovengi mbe ṱeki mbo okuukavira. 24 Ove komoo ṱeki nangarire pomuhongore Omuasirie wotjihako tjokehi! Nungwari ingee mo undju kutja Ovaengipte ve ku hindire omatemba wovita novakavire! 25 Mo tjangovasi ami mba rwisa ehi reṋu ne nyono ro nokuhinombatero ya Muhona are? Muhona omuini ongwe ndji raera okurwisa ehi reṋu nokunyona ro.”

26 Nu ooEljakim na Sebna na Joak va ravaera komuhongore ngwi nave tja: “Hungira Otjiaramei ku eṱe, muhona! Eṱe matu zuu. O hungire Otjiheberi; ovandu avehe mbe ri korumbo mave zuu.”

27 Ingwi omuhongore wa zira a tja: “Mamu tjangovasi eṋe nombara yeṋu oweṋe amuyerike ombara yandje ku ye ndji hinda kutja mbi kahungire ko oviṋa mbi avihe are? Kako, ami wina me hungire kovandu mba mba haama korumbo, mbu mave ri ombonḓi yawo, nu mbu mave nu omaṱuta wawo.”

28 Omuhongore wa sekama na ravaere mOtjiheberi a tja: “Purateneye ku imbi ombara ya Asirie mbi mai mu raere! 29 Oyo mai mu rongo kutja amu ha wovisiwa i Hiskija. Hiskija kemee mu yama. 30 Nu amu popwa i ye kutja mu riyameke ku Muhona. Amu tjangovasi Muhona me mu yama nokutja ma tjaere otjimbumba tjetu tjovita tjova Asirie kutja atji ha huura otjihuro tjeṋu. 31 Amu puratene ku Hiskija! Ombara ya Asirie mai mu rakiza kutja mu pite motjihuro nu mu riyandje. Eṋe amuhe mamu yandjerwa okurya omapunda womivite vyeṋu oveni nomakuyu komiti vyeṋu oveni, nokunwa omeva mozondjombo zeṋu oveni, 32 nga ombara tji ye mu turisa rukwao mehi nda sana na indi oreṋu oveni, mu mu novikunino vyomivite, mbi eta omandjembere womavinu, nu mu mu novikokotwa vyokutereka ozomboroto; oro ehi romiṋinga nomaze womiṋinga nouitji wokuti. Eṋe tji mamu tjiti imbi eye mbi me mu rakiza, kamu nokukoka, nungwari mamu kara nomuinyo. Amu wovisiwa i Hiskija mokutjangovasi Muhona me mu yama. 33 Oomukuru voviwaṋa vyarwe ve na pu va yamene omahi wawo kombara ya Asirie are? 34 Imba oomukuru votjihuro Hamat na Arpad nambano ve ri pi? Imba oomukuru votjihuro Sefarwajim na Hena na Iwa ve ri pi? Pena umwe ngwa yamene Samaria are? 35 Oomukuru vomahi nga aehe va yamene ruṋe omahi wawo kombara yetu? Notjikeṋa tji matji mu tjiti okuripura kutja Muhona ma sora okuyama Jerusalem?”

36 Notjiwaṋa tja mwina otja ombara Hiskija pe tji raera; novandu kave zirire ko embo nangarire rimwe. 37 Nu ooEljakim na Sebna na Joak va nyondorora ozombanda zawo moruhoze nave kaserekarera kombara imbi omuhongore wOvaasirie mbya hungire.