Eksodus 23 - Herero Revision Bible (HRR)

Ousemba mombanguriro

1 “Ko nokuhandjaura ko ombuze yoposyo. Ko nokuvatera ko omundu ngu nondjo, amo yandja omahongonona woposyo. 2 Ko nakurikuta ko kuna ouingi wovandu okukatjita oviṋa ovihasemba. Nu mombanguriro o yandja ko omahongonona puna ouingi wovandu okurundurura ousemba. 3 Wina o raisa ombangu komusyona poo komuvarwandu mombanguriro.

4 “Ove tji wa munu ongombe poo okasino komunavita na ove avya pandjara, tjiri, vi yarura ku ye. 5 Ove tji wa munu okasino komunavita na ove aka u nomutwaro, o kapita nokumuesa; mu vatera tjiri okukeyeura.

6 “Omundu omusyona tji ma pangurwa, o rundurura ousemba we mombanguriro. 7 Humburuka komahongononeno woposyo. O twa omundu omuhinandjo nomusemba monḓiro. Orondu ami me pangura auhe ngu ma tjiti ouvi ohamukwao nai mbo. 8 Wina o kambura otjiyandjewa tjombopero; orondu otjiyandjewa tjombopero hi matji tjiti kutja ovandu ave ha munu imbi mbi ri ovisemba nu matji yeta oumba ku imba ovehinandjo.

9 “O ṋiṋikiza omundu wozonganda; orondu eṋe oveni mamu tjiwa omeripuriro womundu wozonganda, eṋe oveni wina tjinga amwa ri ovozonganda mOengipte.

Ombura oitjahambombari neyuva oritjahambombari

10 “Oure wozombura hamboumwe mo sokukuna mehi roye nokuwonga imbi ovihape vyaro; 11 nungwari mombura oitjahambombari ri esa ri suve; nu mbi mavi hapa mu ro, o kondo ovasyona ve rye ko. Nu imbi mbi mave hupisa, ovipuka vyokuti mavi ri. Tjita tjingetjo wina notjikunino tjoye tjomivite nomiṋinga.

12 “Ove ungura oviungura vyoye momayuva hamboumwe, nungwari suva meyuva oritjahambombari kutja ongombe yoye nokasino koye nomukarere woye nomundu wozonganda vi kotore omasa.

13 “Nu ṱakamiseye avihe mbi mbe mu raere. Amu kumbu koomukuru varwe, nu ngaamu tamuna omana wawo.

Omikandi Ominene Vitatu

(Eks 34:18-26Deu 16:1-17)

14 “Ndji tjitira omukandi tutatu mombura okundjiyozika. 15 Momueze Abib, eṋe mbu mwa pita mOengipte, ndji tjitireye omukandi wOzomboroto nḓe hi nosurise otja punga ambe ku rakiza. Oure womayuva hambombari nga womukandi mbwi, o ri omboroto ndji nosurise. Nu ape ningi ngu meya okurikotamena ku ami nokuhinotjiyandjewa okundjipa. 16 Kareye nOmukandi wOmakondero, tji wa utu okunikora ovihape vyoye. Nu wina kareye nOmukandi wOviranda komayandero wombura, tji wa wongere ovinikorwa vyoye motjikunino. 17 Ombura aihe ovikando vitatu mombura vyomukandi mbwi, ovarumendu voye avehe ngave ye okurikotamena ku ami, ngu mbi ri Muhona Ndjambi weṋu.

18 “Amu ndji pe omboroto ndji nosurise otja otjiyandjewa tji mamu ndji punguhire otjinamuinyo. Wina omaze wotjinamuinyo tjombunguhiro yomukandi aye turikwa nga muhuka tji pa tji.

19 “Ombura aihe eteye kondjuwo ya Muhona Ndjambi weṋu ovitengakuhora mbi mwa teya motjikunino tjeṋu.

“Ko nokutereka ko ondjona momaihi woina.

Omakwizikiro nomahongero

20 “Tara, ami me hindi omuengeri komurungu woye, ngu me ku tjevere mondjira yoye, nu ngu me ku eta poṋa ami pu mbe ku ṱunina. 21 Ove mu pa ondjozikiro, nu kara nonḓuviro ku ye; o rangaranga ku ye; tjinga eri ami ngu mbe mu hindi; orondu eye kemee ku isire tji wa rangaranga. 22 Nungwari ove tji mo kara nonḓuviro ku ye tjiri, nu tji mo tjiti avihe mbi mba rakiza, ami me rwisa ovanavita naove avehe. 23 Omuengeri wandje me ku hongorere, ne ku eta mehi rOvaamori norOvahetite norOvaperesi norOvakanaan norOvahevi norOvajebusi, nu ami meve nyono. 24 Nu ove o rikotamene koomukuru vawo nokuvekarera; nu wina o tjiti otja wo. Nungwari ove teya oviserekarera vyawo oparukaze nu u ṱukuṱure ozongunḓe zawo zomawe ozonḓere. 25 Eṋe tji mamu rikotamene ku ami, ngu mbi ri Muhona, Ndjambi weṋu; ami memu sere ondaya novikurya nomeva nu me isa mo omitjise avihe mokati keṋu. 26 Mehi reṋu kamaamu kara omukazendu umwe ngu ma imbirahi otjivereko poo ngu ma rire ongandji, ami me mu pe omayuva omengi okukara nomuinyo.

27 “Ame me tjiti kutja ovandu mbe mu pirukira ve ndji tire; Me eta ombambaukire mokati kovanavita naove, nu me tjiti kutja ovanavita naove ve tanauke nu ve tupuke. 28 Ami me tjiti kutja ovanavita naove ve urume; Me pitisa Ovahevi nOvakanaan nOvahetite, ove ngunda au hiye ya. 29 Ami hi nokuveramba komurungu woye moure wombura imwe kutja ehi ari ha sewa tjo, novipuka vyokuti avi he mu takavarere. 30 Ami meve ramba kouṱiṱiṱiṱi komurungu woye, nga tji wa takavarisa orukwato, u yenene okukambura indi ehi. 31 Ami me zikamisa omuruko wehi roye okuza kOmuronga wOtuu nga kOmuronga Mediterania, nokuza kokuti onguza nga konḓonḓu Eufrat. Orondu imba ovature vehi ndo meve yandja momake weṋu, nu eṋe mamu ve ramba komurungu weṋu. 32 Eṋe amu rikutu kuna wo poo kuna oomukuru vawo. 33 Nowo ave tura mehi reṋu, tjaa mave mu pukisa nave tjiti kutja eṋe mu tjite ourunde komurungu wandje. Eṋe tji mwe rikotamene koomukuru vawo, ihi matji mu etere onyonokero.”