Otjirimunikise tjozombahu
1 Muhona Ndjambi we ndji raisira otjirimunikise hi: Eye wa utire ehapu rozombahu, omakondero wehozu rombara tji ya za nokutjitwa, nehozu tji ra ri pokunyomoka rukwao moruteṋi. 2 Ozombahu tji za zu nokurya oruhapo ngamwa aruhe mehi, ami arire tji mba tja: “Muhona Ndjambi, isira otjiwaṋa tjoye arikana! Nambano Jakob ma hupu vi eye tjinga e ri okaṱiṱi nai?”
3 Nu Muhona wa ṱondjenda tjinene na tja: “Imbi kavi nokutjitwa ko.”
Otjirimunikise tjomuriro
4 Muhona Ndjambi we ndji raisira otjirimunikise tjarwe hi: Muhona Ndjambi wa eta omuriro kutja a vere na wo otjiwaṋa. Nomuriro mbwi wa seseta omupupo omunene wokehi yehi nau ryama okuseseta ehi romakunino wina. 5 Ami arire tji mba tja: “Arikana Muhona, hirimana! Namba Jakob ma hupu vi eye tjinga e ri okaṱiṱi nai?”
6 Nu Muhona Ndjambi wa ṱondjenda tjinene na tja: “Na ihi wina katji nokutjitwa ko.”
Otjirimunikise tjongoze osaneke
7 Muhona we ndji raisira otjirimunikise tjarwe hi: Muhona wa kuramene kombanda yekuma romatungiro nda ri oseka, e nongoze meke re ndja kutwa kohonga. 8 Muhona we ndji pura nai: “Mo munu tjike, Amos?”
Nami e ziri e tja: “Me munu ongoze osaneke.”
Muhona arire tja tja: “Tara, ami me twa ongoze osaneke ndji mokati kotjiwaṋa tjandje Israel okutjirora. Ami himee tji isire ko rukwao. 9 Pozondunda ozondekurona za Isak puyaze kumbire mape hahaurwa; notuveze twomerikotameneno wOvaisrael wina matu hahaurwa; ami me yandisa ouhona wombara Jerobeam.”
Amos na Amasja
10 Amasja, omupristeri wa Betel, otja tjivisa ku Jerobeam, ombara ya Israel, na tja: “Amos we rikutu kuna ovekupirukire okukusekamena mokati kotjiwaṋa tja Israel. Omambo we maye nyono ehi. 11 Orondu Amos ma tja nai: ‘Jerobeam ma ṱengaruvyo, notjiwaṋa tja Israel, tjiri, matji toorwa mehi ratjo nokutwarewa kouhuura.’ ”
12 Nu Amasja wa tja nai ku Amos: “Ove, muuke ove, twende zapo mba, yaruka kehi ra Juda arire ku wa ka tjitira ko ehupo roye nokukaukira ngo! 13 Imwi mObetel o uhara amo tjitire mo omaukiro rukwao, orondu poṋa mba opomerikotameneno wombara, oruveze romerikotameneno wotjiwaṋa.”
14 Amos wa zira na tja ku Amasja: “Ami kawami omuprofete, nu kawami omuzandu womuprofete, nungwari owami omurise, nu wina owami omukune womikuyu. 15 Nu Muhona ongwe ndji isa ko korupanda rwozonyanda na tja ku ami: ‘Twende u kaukire otjiwaṋa tjandje Israel!’ 16 Nambano puratena kombuze ya Muhona ndji ma hungire. Ove motja nai ku ami: ‘O ukire otjiwaṋa tja Israel, nu o hungire okambo kondjuwo ya Isak!’ 17 Muhona otji ma tja nai kove, Amasja: ‘Omukazendu woye ma rire omukorondu motjihuro: Ovazandu novasuko voye mave ṱengaruvyo, nehi roye romakunino mari sanekwa kotjisanekero nari haṋewa. Nu ove omuini mo kakokera kehi rovanavisenginina, notjiwaṋa tja Israel matji twarewa kouhuura.’ ”
© Herero Revision Bible © Bible Society in Namibia, 2021.
