Levitikus 14 - Herero Revision Bible (HRR)

Omakohororero Womunangana

1 Rukwao Muhona wa yandja ku Moses 2 omazikamisiro ohunga nomakohororero womunangana. Meyuva eye ndi ma varwa kutja omukohoke, eye nga etwe komupristeri, 3 nu omupristeri nga pite pendje yozondanda ne kemutare. Nu tja munu kutja omutjise wongana wa veruka, 4 omupristeri nga rakize kutja ingwi ngu ma kohororwa a eterwe ozonḓera mbari ozonamuinyo ozongohoke norutau rworupapa norusepa oruserarovazu nokayao kohisop. 5 Tjazumba omupristeri nga rakize kutja imwe yozonḓera nḓa i ṱire motjinyo tjonyungu yomunoko mu mu nomeva omakohoke woruharwi. 6 Eye nga kambure onḓera indji onamuinyo puna orutau rworupapa norusepa oruserarovazu nokayao kohisop ne vi tjaveke mombinḓu yonḓera ndji ndja ṱire kombanda yomeva nga omakohoke woruharwi. 7 Nomupristeri nga pemenene ombinḓu ndji potuhambombari ku ingwi ngu ma kohororwa komutjise wongana, nu e mu vare kutja omukohoke; nonḓera indji onamuinyo nge i yese i tuke mouhaiya wokuti. 8 Kombunda yanao ingwi ngu ma kohororwa nga kohe ozombanda ze, nu nge rihore ozondjise ze azehe, nokurikoha morutu rwe aruhe; otji ma rire omukohoke. Tjazumba eye ma yenene okuhita mozondanda rukwao, nungwari oure womayuva hambombari ma kara pendje yondanda ye. 9 Nu meyuva oritjahambombari nge rihore rukwao ozondjise ze azehe motjiuru, noruyezu rwe, nozombumbu ze, nomainya we aehe morutu; eye nga kohe ozombanda ze, nu nge rikohe morutu aruhe. Neye otji ma rire omukohoke.

10 “Nu meyuva oritjahambondatu nga ete ozondjona mbari ozondume nondema yombura imwe, azehe nḓe hi novipo, noruhere orunḓunḓura ozokirograma ndatu ndwa rungwa nomaze womiṋinga ru rire ombunguhiro yovikurya, nomaze womiṋinga oriṱera ohinga. 11 Omupristeri ngu ma tjiti omakohororero nga kuramise omurumendu ngu ma kohororwa puna oviyandjewa mbi komurungu wa Muhona pomahitiro wOndanda yOmahakaeneno. 12 Tjazumba omupristeri nga toore ondjona imwe yainḓa ozondume puna omaze womiṋinga oriṱera ohinga, e vi punguhe vi rire ombunguhiro yomasutiro wondjo, neye nge vi yandje otja otjiyandjewa tjapeke ku Muhona. 13 Ombunguhiro ndji ondjapuke noyo oyomupristeri nu ondjona ndji nge i zepere poṋa pu pe ṱira ovinamuinyo vyozombunguhiro zokuisapo ourunde nozombunguhiro ozoningiririsiwa. Neye nga tjite nao orondu tjinga e ri ombunguhiro yomasutiro wondjo. 14 Nomupristeri nga wote ko ombinḓu yombunguhiro yomasutiro wondjo ndji, e i hwe kokutwi kwokunene kehi kwa ingwi ngu ma kohororwa, na wina ku katjimunene weke re rokunene, na ku katjimunene wombaze ye yokunene. 15 Tjazumba nga kambure ko omaze womiṋinga ouṱiṱi e ye tirire meke re rokumoho. 16 Nu nga tjaveke omunwe weke re rokunene momaze nga, nu nge ye pemenene komurungu wa Muhona potuhambombari. 17 Nu komaze, nga hupu meke romupristeri, nga hwe kokutwi kwokunene kehi kwa ingwi ngu ma kohororwa, na wina ku katjimunene weke re rokunene, na ku katjimunene wombaze ye yokunene, kombanda yaindji ombinḓu yombunguhiro yondjo. 18 Nomaze, nga hupu meke romupristeri nga hwe motjiuru tja ingwi ngu ma kohororwa. Komuhingo mbwi ingwi omupristeri otji me mu tjitire ombunguhiro yomakohororero.

19 “Kombunda yanao omupristeri nga punguhe ombunguhiro yokuisapo ourunde, nu a tjite ombunguhiro yomakohororero, nu tjazumba nga zepe otjinamuinyo tjombunguhiro oningiririsiwa, 20 nu e tji punguhe puna ombunguhiro yovikurya kotjipunguhiro. Momuano mbwi, omupristeri nga tjite ombunguhiro yomakohororero nomundu ngwi ma rire omukohoke.

21 “Nungwari ingwi omunangana tje ri omusyona, nu tje hi nokuyenena okuranda oviṋa avihe vyozombunguhiro, nu nga ete ondjona imwe uriri kombunguhiro yomasutiro wondjo, i rire ombunguhiro yotjiyandjewa tjapeke ku Muhona. Nu wina nga ete okirograma imwe uriri yoruhere orunḓunḓura ndwa rungwa nomaze womiṋinga ru rire ombunguhiro yovikurya, nomaze womiṋinga oriṱera ohinga. 22 Neye wina nga ete ozohanda mbari poo ovingutyona vivari, mbi ma yenene okuranda, imwe i rire ombunguhiro yokuisapo ourunde, nongwao i rire ombunguhiro oningiririsiwa. 23 Meyuva oritjahambondatu kombunda yomakohororero we, nge vi ete komupristeri pomahitiro wOndanda yOmahakaeneno komurungu wa Muhona. 24 Nomupristeri nga toore ondjona yombunguhiro yondjo nomaze womiṋinga oriṱera ohinga, nu nge vi yandje otja otjiyandjewa tjapeke ku Muhona. 25 Tjazumba omupristeri nga zepe ondjona ndji, a wote kombinḓu yombunguhiro yondjo ne i hwe kokutwi kwokunene kehi kwa ingwi ngu ma kohororwa, na wina ku katjimunene weke re rokunene, na ku katjimunene wombaze ye yokunene. 26 Omupristeri nga tirire omaze womiṋinga ouṱiṱi meke re rokumoho, 27 na pemenene omaze nga nomunwe weke re rokunene potuhambombari komurungu wa Muhona. 28 Nu omaze nga hupu meke romupristeri, nga hwe kokutwi kwokunene kehi kwa ingwi ngu ma kohororwa, na wina ku katjimunene weke re rokunene, na ku katjimunene wombaze ye yokunene, kombanda yombinḓu yombunguhiro yomasutiro wondjo. 29 Nomaze, nga hupu meke romupristeri, nga hwe motjiuru tja ingwi ngu ma kohororwa. Komuhingo mbwi omupristeri otji me mu tjitire ombunguhiro yomakohororero. 30 Okuzambo omupristeri nga punguhe ohanda imwe yazo poo otjingutyona tjimwe tjavyo, ingwi omusyona mbya yenena okuranda. 31 Indji imwe nge i punguhe i rire ombunguhiro yokuisapo ourunde, nongwao i rire ombunguhiro oningiririsiwa pamwe nombunguhiro yovikurya. Komuhingo mbwi omupristeri otji ma tjitire ingwi ngu ma kohororwa ombunguhiro yomakohororero. 32 Indi ondi ri etwako komunangana ngu hi nomasorero okueta oviṋa vyombunguhiro komakohororero we.”

Omutjise wongana kozondjuwo

33 Rukwao Muhona wa yandja kooMoses na Aron 34 omazikamisiro ohunga nozondjuwo nḓena omutjise wongana Muhona mbu ma eta kozondjuwo zawo. Omazikamisiro nga ye unguriseye tji mwa hiti mehi ra Kanaan, ndi me yandja ku eṋe ri rire ouini weṋu, nu ami e eta omutjise wongana mozondjuwo zeṋu. 35 Omuini wondjuwo mu mu nomutjise wongana nge ye komupristeri e mu tjivise nai, mape munika aayo mu nomutjise wongana mondjuwo ndji. 36 Tjazumba omupristeri nga rakize kutja oviṋa avihe vi pitisiwe mondjuwo, ngunda e hiye ya okutara imbwi omutjise wongana kutja oviṋa avihe mbi ri mondjuwo, avi ha varwa otja ovihakohoke; kombunda yanao omupristeri nge ye okutara ondjuwo ndji. 37 Nu tja zu nokutara omutjise mbwi na munu outootoo komakuma wondjuwo mbu mau munika otja oruhapo poo ouserandu, nu mbu mau munika oukoto mekuma, 38 omupristeri nga pite mondjuwo, nu nge i pate oure womayuva hambombari. 39 Meyuva oritjahambombari omupristeri nga kotoke, nu tja munu kutja eṋi ra ryamene ko momakuma wondjuwo, 40 nga rakize kutja omawe ku kwa munika eṋi ndi ye teyewe nu ye imbirahiwe pendje yotjihuro poṋa popahakohoke. 41 Nu inga omakuma womoukoto wondjuwo ngaye teturwe, novitetukiro ngavi kaimbirahiwe pendje yotjihuro poṋa popahakohoke. 42 Tjazumba ngamu yarurwe mo omawe warwe moruveze rwainga nga isiwa mo, nu inga omakuma ngaye serurwe nomunoko warwe.

43 “Nungwari indi eṋi tji ra piti rukwao mondjuwo, omawe tji ya zu nokuisiwa po, noyo tji ya zu nokuteturwa nai serurwe, 44 omupristeri nga katare. Neṋi tji ra ryamene ko momakuma wondjuwo, okutja omutjise wongana ombi tjinene; ondjuwo ndji ohakohoke. 45 Oyo ngai haṋewe, okutja omawe nomiti nomunoko, avihe ngavi imbirahiwe pendje yotjihuro poṋa popahakohoke. 46 Auhe ngu ma hiti mondjuwo ndji ngunda aya patwa, ma rire omuhakohoke nga kongurova. 47 Nu auhe ngu ma rara poo ngu ma rire mondjuwo ndji nga kohe ozombanda ze.

48 “Nungwari omupristeri tje ya okutara, na munu kutja eṋi kari ryamenene ko, ondjuwo tji ya zu nokuserurwa, eye nge i vare kutja ongohoke, indi eṋi tjinga ara zengi. 49 Okukohorora ondjuwo ndji, eye nga kambure ozonḓera mbari, norutau rworupapa, norusepa oruserarovazu, nokayao kohisop. 50 Neye nga zepere onḓera imwe yazo motjinyo tjonyungu yomunoko mu mu nomeva omakohoke woruharwi poo wonḓonḓu. 51 Eye nga kambure orutau rworupapa, nokayao kohisop, norusepa oruserarovazu, nonḓera indji onamuinyo ne vi tjaveke mombinḓu yonḓera ndji ndja tu na momeva inga omakohoke. Neye nga pemenene ondjuwo ndji potuhambombari. 52 Komuhingo mbwi omupristeri otji ma kohorora ondjuwo ndji noviṋa mbi, okutja ombinḓu yonḓera, nomeva omakohoke, nonḓera onamuinyo, norutau rworupapa nokayao kohisop, norusepa oruserarovazu. 53 Nu onḓera ndji onamuinyo nge yese i tuke mokuti ongaango. Komuhingo mbwi omupristeri otji ma tjitire ondjuwo ndji omakohororero, noyo mai rire ongohoke.

54 “Inga onge ri omatwako womutjise wongana noweyaze, 55 nowongana mozombanda na mozondjuwo, 56 novyomisuro, nowovinyuru, nowomaṋi omavahe, 57 okuraisa otjiṋa tjorive kutja oruṋe tji tji ri otjihakohoke poo otjikohoke. Inga onge ri omatwako womutjise wongana.”