Omarumbi wa Josef mave yaruka rukwao kOengipte puna Benjamin
1 Ourumbu wa ririra ko ouzeu mOkanaan. 2 Nomuhoko wa Jakob tji wa mana ovikokotwa avihe, mbi va etere okuza kOengipte, Jakob arire tja tja kovazandu ve: “Yarukeye, nu keturandereye oukurya.”
3 Nu Juda wa tja ku ye: “Ingwi omurumendu we tu ronga nomasa kutja ngaatu ya komurungu we, tji tu ha eterere omuangu wetu. 4 Tji movanga okuhinda omuangu wetu puna eṱe matu i okukekurandera ovikurya. 5 Nungwari tji u hi nokuvanga, eṱe katu nakuyenda ko. Orondu omurumendu ngo wa tja: ‘Eṋe kamu nokumuna omurungu wandje, omuangu weṋu tje he ri puna eṋe.’ ”
6 Israel arire tja tja: “Hapo okutjavi tji mwe ndji twako ouzeu okuraera komurumendu ngo kutja mu nomuangu warwe?”
7 Nowo ve mu zira ave tja: “Omurumendu wa kara pokutupura oveni nomuhoko wetu a tja: ‘Iho ingee u nomuinyo? Mu nomuangu?’ Eṱe atu mu ziri komapuriro we. Twa sokutjiwa vi kutja eye ma tja: ‘Ngatu eterere omuangu wetu?’ ”
8 Nu Juda arire tja tja ku ihe Israel: “Hinda omuzandu puna ami, tu rirongere nu tu yende ndino matu hupu natu ha ṱondjara, eṱe na ove novanatje vetu. 9 Ami me ritwa moruveze rwe, nove kemupure ku ami. Nu tji mbi he mu kotorere nawa, nga rire ami ngu me tura ondjo kove oure womuinyo wandje auhe. 10 Tjiri, andakuzu katu wombere itjatu yenda nokukotoka ovikando vivari.”
11 Israel, ihe yawo, opa tjera: “Nu tji pe ri nao, tjiteye nai! Tooreye oviṋa oviwa tjinene vyehi ndi momitwaro vyeṋu vi rire oviyandjewa kongooneya: Omaze omerivavwa, nouitji wozonyutji, novyomoro omuwa, nepya nozombanywi nozondenya. 12 Twaerereye ovimariva wina pu pe ṱa potuvari; nu yarureye ovimariva mbi mbya yarurwa mo momakutu weṋu. Ngahino ya ri ondataiziro. 13 Tooreye omuangu weṋu, nu mu rirongere mu yaruke komurumendu ngo. 14 Ndjambi Omunamasaaehe nga tjite omurumendu ngo a ṱotjari na eṋe kutja e mu kotorere erumbi reṋu na Benjamin. Orondu ami tji mba yekwa ovanatje vandje okutja hi tji novanatje rukwao.”
15 Nu ovarumendu mba otji va toora imbi oviyandjewa novimariva, mbi ṱa potuvari puna Benjamin wina; nu ve rirongera nave i kOengipte nave kakurama komurungu wa Josef. 16 Nu Josef tja muna Benjamin puna wo, arire tja tja komukarere wondjuwo ye: “Hitisa ovarumendu mba mondjuwo, zepa otjinamuinyo nu u tji tereke; orondu ovarumendu mba mutenya mave ri puna ami.” 17 Ingwi omukarere wa tjita otja Josef pe mu rakiza na hitisa ovarumendu mba mondjuwo ya Josef.
18 Novarumendu va tira tji va hitisiwa mondjuwo ya Josef, nave ripura ave tja: “Eṱe twa etwa mba mena rovimariva mbya yarurwa momakutu wetu otjikando otjitenga kutja ve tu kambure nu ve tu ise po ovakarere, nokukambura ousino wetu wina.” 19 Owo arire tji va ryama popezu nomukarere wa Josef, nave hungire puna ye pomuvero wondjuwo, 20 nave tje: “Arikana, muhona, otjikando otjitenga twe ere mba okuranda ovikurya. 21 Nu tji twe ya potjikuturiro natu paturura omakutu wetu, omurumendu auhe otja muna ovimariva vye motjinyo tjekutu re, ovimariva vyetu avihe otja ponḓengu yavyo; neṱe otji twe vi kotora nambano. 22 Nu wina twa eta ovimariva vyarwe okuranda na vyo ovikurya. Eṱe katu nokutjiwa kutja owaṋi ngwa yarura mo ovimariva vyetu momakutu.”
23 Nomukarere wa tja: “Amu rikende! Namu tira! Ndjambi weṋu nowaiho ongwa twa mo otjihuze hi momakutu weṋu. Ovimariva vyeṋu mbe vi muna.” Nu arire tja pitisa Simeon ne mu eta ku wo.
24 Nomukarere arire tja hitisa ovarumendu mba mondjuwo ya Josef, ne ve pe omeva kutja ve rikohe ozombaze na pe ousino wawo ovikurya. 25 Owo va ṱuna imbi oviyandjewa vyawo amave undju Josef tji meya mutenya; orondu tjinga ava zuva kutja mave ri mbo. 26 Nu Josef tja kotoka konganda, owo va eta imbi oviyandjewa mondjuwo ku ye, nave rikotamene komurungu we. 27 Neye we ve korisa omberukiro ne ve pura a tja: “Iho ngwa kurupa, ngu mwe ndji raera, u ri vi? Ngunda u nomuinyo, nu u ri nawa?”
28 Nowo ve mu zira ave tja: “Tate, omukarere woye, ingee u nomuinyo, nu u ri nawa.” Nu ve riwisa kozongoro nave rikotamene ku ye.
29 Josef tja muna Benjamin, omuangu we omuini waina, arire tja tja: “Ingwi onguri ongero yeṋu, ngu mwe ndji raera? Ndjambi nge ku sere ondaya, muzandu wandje.” 30 Nu Josef arire tja i kamanga, orondu omutima we tjinga awa tarara mena romuangu we. Neye wa hara okurira, narire tja i ketuwo re okukarira. 31 Nu tja za nokukoha omurungu we, arire tja piti ne rikukutisa na raa omariro. 32 Nu Josef wa pewa ovikurya peke, nomarumbi we va perwa potjiriro tjarwe; Ovaengipte, mba rya puna ye va pewa peke wina; orondu Ovaengipte kaave ri puna Ovaheberi, tjinga a ri ohoṋi onene ku wo okurya puna Ovaheberi. 33 Ovangu nomarumbi va haamisiwa kotjiriro tji tja ri momurungu wa Josef okukongorerasana motjiwondo tjawo okuza komunene nga komuṱiṱi. Novarumendu arire tji va tarasana ava kumwa. 34 Novikurya vya yandjewa amavi zu kotjiriro tja Josef; nu Benjamin wa pewa ovikando vitano komurungu wa imba ovarwe. Nowo va rya nave nu, nave yoroka puna Josef.
© Herero Revision Bible © Bible Society in Namibia, 2021.
