1 Okuza komunene.
Me tjanga komuyozikua omutoororua wa Ndjambi novanatje ve. Ami mbe mu suvera tjinene, nu kawami porwandje, nungwari wina owo mba avehe mbe tjiwa ouatjiri, 2 orondu ouatjiri u ri mu eṱe nu mau karerere mu eṱe nga aruhe.
3 Otjari nomutima omuwa nohange mbi za ku Ndjambi Tate na ku Jesus Kristus, Omuna wa Ihe, ngavi rire ovyetu mouatjiri na morusuvero.
Ouatjiri norusuvero
4 Ami mba nyanda tjinene tji mba muna kutja ovanatje voye tjiva ve hupa mouatjiri otja ketwako ndi twa pewa i Tate. 5 Nopu me ningirire kove, muyozikua, kutja ngatu suverasane. Ami hi nokumutjangera etwako epe nungwari oro etwako ndi twa kara na ro okuza kombutiro. 6 Norusuvero ndwi maru hee kutja ngatu kare nonḓuviro ketwako ra Ndjambi mongarero yetu. Netwako ndi otja amuhe punga amwa zuva okuza kombutiro okongwi okutja eṋe amuhe mamu sokukara nongaro yorusuvero.
7 Ovapukise ovengi va rimbara mouye auhe. Owo ve tja Jesus Kristus kangu ri ye ngwi ngwa rira omundu. Omundu otja ingwi eye omupukise nOmunavita na Kristus. 8 Otji mwa sokuṱakamisa nawa kutja amu ha pandjarisa imbi mbi twa ungurira, nungwari kutja mu mune ondjambi yeṋu okuura.
9 Auhe ngu ha ṱakamisa omahongero wa Kristus, nungwari ngu ye rundurura, eye ke noruwano na Ndjambi. Nu ingwi ngu ri momahongero nga eye u na Ihe nOmuna aveyevari. 10 Omundu worive tje ya ku eṋe na ha hongo omahongero nga, amu mu sekirisa mozoyeṋu; nu wina amu roro nangarire ingwi okumuminika; 11 orondu auhe ngu me mu minike ma kara norupa mouvi eye mbu ma tjiti.
Omambo omasenina
12 Ami ingee mbi noviṋa ovingi okumuraera. Nungwari hi nokumutjangera vyo. Nu moruveze rwanao ami omuini meya ku eṋe okuyekumuraera, kokutja enyando retu ri urisiwe. 13 Ovanatje womuṱena kwoye omusuverwa mave ku minike.
© Herero Revision Bible © Bible Society in Namibia, 2021.
