Ondjitukiro ya Jesus
(Mk 9:2-13Lk 9:28-36)1 Kombunda yomayuva hamboumwe Jesus wa toorere Petrus na Jakobus nomuangu we Johanes, e ve twara kombanda yondundu onde nu ave kakara ngo peke. 2 Nu eye wa tjitukira momurungu wawo. Omurungu we au keṋakeṋa otja eyuva, nozombanda ze aze rire ozombapa twee. 3 Tjimanga ovahongewa vetatu mba va muna Moses na Elia amave hungire kuna Jesus. 4 Nu Petrus opa tjera nai ku Jesus: “Muhona, tjiri, okokuwa eṱe okukara mba! Tji movanga ami me tungu oviranda vitatu mba, tjimwe tji rire otjoye, tjimwe tji rire otja Moses, nu tjimwe tji rire otja Elia.”
5 Nu Petrus ngunda ama hungire, otjikamba otjiyere arire tji tje ve pe omuzire, nu motjikamba amu zu eraka nda tjere: “Ingwi eye Omuna wandje omusuverwa ami mu mbi nonyuṋe, purateneye ku ye!”
6 Ovahongewa tji va zuva indi eraka, va uruma tjinene nai nga tji va u onḓurumika. 7 Jesus arire tje ya ku wo, a ṱunu ku wo a tja: “Pendukeye, nu amu tira!” 8 Nu tji va yera omeho wawo kave mwine omundu posi ya Jesus porwe.
9 Nu ngunda amave heruka kondundu Jesus we ve rakiza a tja: “Ngaamu roro amu serekarere komundu otjirimunikise tji mwa munu hi nga Omuna wOmundu tja pendurwa movakoke.”
10 Nu ovahongewa va pura Jesus ave tja: “Okutjavi ozonongo zomambo tji ve tja Elia ma sokutenga po okuya?”
11 Jesus arire tja ziri a tja: “Tjiri, Elia ongu ma tenge po okuya, neye ma yarura avihe koupe. 12 Nungwari me mu raere kutja Elia weya rukuru, novandu kave mu zemburukire ko nu ve mu tjita otja puyave vanga. Momuhingo tjingewo owo wina otjinga amave tatumisa Omuna wOmundu.”
13 Poṋa mbo ovahongewa arire tji va zuu nawa kutja eye aa hungire Johanes Omupapitise ku wo.
Jesus ma verukisa omuzandu ngu nombepo ohakohoke
(Mk 9:14-29Lk 9:37-43a)14 Nowo tji va yarukire kotjimbumba tjovandu, arire tji pe ya omundu ku Jesus, a wora ozongoro komurungu we, 15 na tja: “Muhona, arikana tjariparera omuzandona wandje! Eye wa vera orusenge, nu u kanyata orutu tjinene. Potuingi u wira momuriro nu wina potuingi u wira momeva. 16 Ami mbe mu etere kovahongewa voye, nowo kave sorere okumuverukisa.”
17 Jesus wa zirire a tja: “Muhoko okehinangamburiro nokapuke! Me kara puna eṋe nga ruṋe? Me kara nomuretima na eṋe nga ruṋe? Eteye omuzandu nguno ku ami!” 18 Jesus wa rakiza indji ombepo ohakohoke noyo arire tji ya piti momuzandu, nu moiri tjingeyo eye a veruka.
19 Tjazumba ovahongewa ve ya ku Jesus mongumumu nave mu pura ave tja: “Okutjavi eṱe tji tu ha sorere okupitisa indji ombepo ohakohoke?”
20 Jesus wa zira a tja: “Orondu tjinga amu hi nongamburiro ndja yenena. Tjiri, me mu raere kutja andakuzu mu nongamburiro ndji ṱeki pondwi yomumosteri, atja mu yenena okutja nai kondundu ndji: ‘Humburuka u kakurame mbena!’ noyo atjai humburuka. Nu katjamu urwa i otjiṋa!”
Jesus ma hungire onḓiro ye rukwao
(Mk 9:30-32Lk 9:43b-45)22 Novahongewa avehe tji va woronganene mOgalilea, Jesus wa tjere ku wo: “Omuna wOmundu ma yandjewa momake wovandu, 23 nowo mave mu zepa; nungwari kombunda yomayuva yetatu eye ma pendurwa movakoke.”
Novahongewa arire tji va ṱoruhoze tjinene.
Okusuta otjisuta tjondjuwo ya Muhona
24 Jesus novahongewa ve tji ve ere kOkapernaum, ovasutise votjisuta tjondjuwo ya Muhona ve ya ku Petrus nave mu pura ave tja: “Omuhonge weṋu u suta otjisuta tjondjuwo ya Muhona?”
25 Petrus wa zirire a tja: “Ii, u suta!”
Nu Petrus tja hita mondjuwo, Jesus arire tje mu tengere po okuhungira a tja: “Simon, mo ripura vi? Owaṋi ngu suta otjimariva tjouini notjimariva tjouhona kozombara zouye mbwi? Ovature vehi poo ovandu wozonganda?”
26 Petrus a ziri a tja: “Ovandu wozonganda.”
Jesus a kotora a tja: “Mape hee kutja ovature vehi kave sokusuta. 27 Nungwari eṱe katu nokuvanga okupindikisa ovandu mba. Twende komuronga u kayumbe ombate yozohi momeva. Nu ohi ndja tenge po okurumata nana u pitise momeva. Nu tji wa paturura otjinyo tjayo, mo vaza mo otjimariva otjisilveri. Isamo u kasute na tjo otjisuta tjetu na ove tjondjuwo ya Muhona.”
© Herero Revision Bible © Bible Society in Namibia, 2021.
