Esekiel 2 - Herero Revision Bible (HRR)

1 “Muatje womundu, sekama! Me vanga okuhungira kuna ove.” 2 Eraka ngunda amari hungire, Ombepo ya Ndjambi ye ndji pa omasa nai ndji kuramisa kozombaze. Nami mba zuva eraka, ndi mari hungire nai komurungu: 3 “Muatje womundu, ami me ku hindi kotjiwaṋa tja Israel. Otjo tje ndji pirukira natji ndji sekamene, nu nga ku ndinondi otjo tja poka ku ami tjimuna ooihe mukururume tji va tjitire. 4 Otjo otjirangaranga, nu katji ndji yozike, notji me ku hindi kutja u ketjiraere imbi ami, ngu mbi ri Muhona Ndjambi, mbi me hungire ku tjo. 5 Kutja ovapirukire mbo mave puratene kove poo indee, nowo mave tjiwa kutja mu na omuprofete mokati kawo.

6 “Nungwari ove, muatje womundu, o ve tira nu o tirisiwa i omambo wawo. Owo mave ku nyekerere nave ku nyengwa; mape sana aayo wa tura mokati kozondje. Tjiri, o tira ovapirukire mbo poo omambo wawo aehe ngu mave hungire. 7 Ove mo sokuveraera omambo aehe ngu me ku raere, nandarire kutja mave puratene poo indee. Zemburuka kutja owo, tjiri, ovapirukire.

8 “Muatje womundu, puratena ku imbi mbi me ku raere. O rire omupirukire otja omuhoko mbwi. Paturura otjinyo nu u rye ihi tji me ku pe.”

9 Ami mba muna eke nda roporokere ku ami, noro ra ri nembo emangwa. 10 Eke ndi ra mangurura embo emangwa ndi, notji mba muna kutja embo ndi ra tjangwa komikuma aviyevari kutja ozondjuriro nozondjemeno nomaririro.