Ouvara wa Jesus
(Mt 21:23-27Mk 11:27-33)
1 Eyuva rimwe Jesus ngunda e ri mondjuwo ya Muhona ama hongo ovandu nokuzuvarisa Ombuze Ombwa, ovapristeri oviuru nozonongo zomambo, novanene arire tji ve ya, 2 nave mu pura ave tja: “Tu raera kutja oviṋa mbi u vi tjita mouvara watjike? Nu ngwe ku pa ouvara okutjita oviṋa mbi, owaṋi?”
3 Jesus we ve zira a tja: “Nambano ami me mu pura epuriro rimwe. 4 Ndji raereye kutja ousemba wa Johanes wokupapitisa wa za mu Ndjambi poo wa za movandu?”
5 Owo va uta okupatasana mu wo oveni ave tja: “Tji twa tja: ‘Wa za mu Ndjambi,’ ma tja: ‘Nu okutjavi tji mu ha kamburire mu Johanes?’ 6 Nungwari tji twa tja: ‘Wa za movandu,’ otjimbumba atjihe hi matji tu zepa nomawe, orondu ovandu avehe aave vara Johanes kutja omuprofete.” 7 Nowo otji va zira ave tja: “Katu nokutjiwa kutja ousemba mbo wa za pi.”
8 Jesus arire tja tja ku wo: “Nu ami wina otji mbi hi nakumuraera kutja oviṋa mbi ami mbi vi tjita mouvara watjike.”
Omasanekero wovayazeme votjikunino tjomivite
(Mt 21:33-46Mk 12:1-12)
9 Jesus wa serekarera ovandu omasanekero nga na tja: “Omundu umwe wa kunine otjikunino tjomivite, e tji yazemisa kovakune, narire tja i mouyenda oure. 10 Noruveze rwomanikorero womandjembere tji rwa yenene, eye otja hinda omukarere we kovayazeme okukaeta ovihape imbi ovye. Nungwari ovayazeme va tona ingwi omukarere, tjazumba ave mu ramba nokuhinotjiṋa momake. 11 Omuini wotjikunino otja hinda omukarere omukwao; nungwari ovayazeme ve mu tona wina, ave mu yamburura navi nave mu ramba nokuhinotjiṋa momake. 12 Nu eye wa hinda omukarere outjatatu; novayazeme ve mu hihamisa, tjazumba arire tji ve mu ramba. 13 Nu ingwi omuini wotjikunino wa tja: ‘Me tjiti vi? Me hindi omuzandu wandje ingwi omusuverwa; tjiri, owo mave mu pe ondengero!’ 14 Nungwari ovayazeme mbo tji ve mu muna, arire tji verihungirire oveni ave tja: ‘Ingwi onguri omuzandu womuini wotjikunino. Indjeye tu mu zepe, eṱa ri rire oretu!’ 15 Otji ve mu nanena pendje yotjikunino nave mu zepa.”
Jesus wa pura a tja: “Ingwi omuini wotjikunino tjomivite ma tjiti vi? 16 Eye meya, a zepa ovayazeme mbo, tjazumba a yandja otjikunino ho ku varwe.”
Ovandu tji va zuvire omambo nga, arire tji va tja: “Kako, ngaape kara nao!”
17 Nu Jesus wa siririka omeho we mu wo, a tja: “Hapo omatjangwa nga maye hee tjike:
‘Ewe ndi nda imbirahirwe i ovatunge,
onda karira enanḓengu tjinene pomawe aehe’?
18 Auhe ngwa wire kewe ndi ma hahauka, nu auhe ku kwa wire ewe ndi ma ṱukuṱuka.”
Okusuta otjisuta tjouhona
(Mt 22:15-22Mk 12:13-17)
19 Ozonongo zomambo novapristeri oviuru va kondja okukambura Jesus moiri ndjo, owo tjinga aave tjiwa kutja eye wa tuvirira wo momasanekero nga, nungwari owo aave tira otjiwaṋa. 20 Nowo va uta okumutjungira. Notji va popa ovandu tjiva okuritjinda aayo ovasemba nave ve hindi okukapata Jesus momambo we kutja ve sore okumuyandja komunane wOrukondwa. 21 Ovarumendu mba va purire Jesus ave tja: “Muhonge, matu tjiwa kutja ove u hungira nu u honga ouatjiri nokutja ko tara ovandu momirungu, nungwari u honga ondjira ya Ndjambi mouatjiri. 22 Tu raera kutja okusuta otjimariva tjouhona kombara ya Roma pa yandjerwa poo kape yandjererwe?”
23 Nungwari Jesus wa tjiza ovineya vyawo, notje ve zira a tja: 24 “Ndji raisireye ihi otjimariva otjisilveri. Omurungu wauṋe, nu indi ena orauṋe ndi ri ku tjo?”
Owo va zira nai: “Owombara.”
25 Jesus arire tja tja ku wo: “Yandjeye ovyombara kombara, nu imbi ovya Ndjambi yandjeye ku Ndjambi.”
26 Nowo kave sorere okumupata momambo we komurungu wotjiwaṋa, nu arire tji va mwina ava himisiwa i eziriro re.
Okupenduka movakoke
(Mt 22:23-33Mk 12:18-27)
27 Ovasaduke tjiva mbu yave tja kape nombendukiro ve ere ku Jesus nave tja: 28 “Muhonge, Moses we tu tjangera etwako, ndi mari tja: ‘Omurumendu tja koka e nomukazendu ngu hi novanatje, omuangu poo erumbi re nga rye omuhepundu kutja ve kwate ovanatje mbu mave varwa otja orukwato rwomurumendu ngwi omuṱi.’ 29 Notji pa ri ovarumendu oovangu nomarumbi hambombari; ingwi otjiveri wa kupire, nu a koka e hi novanatje. 30 Tjazumba ingwi outjavari wa kupa omuhepundu ngwi, neye wina wa koka e hi novanatje. 31 Notjiṋa tjingetjo hi wina tja tjitirwe ku ingwi outjatatu na ku imba ovakwao vane mba serwe po: Avehe pouhambombari wawo va koka ave hi novanatje. 32 Korusenina ingwi omukazendu omuini wina arire tja koka. 33 Nambano meyuva ndi ovakoke tji mave penduka, ingwi omukazendu ma rire owauṋe mokati kawo, avehe pouhambombari wawo tjinga ave mu kupire?”
34 Jesus we ve zirire a tja: “Ovarumendu novakazendu wouye mbwi ve kupa nu ve kupwa; 35 nungwari ovarumendu novakazendu imba mbu mave varwa otja mbu mave kapenduka movakoke nokukamuna ouye mbwina, kamaave kupu nokukupwa. 36 Mave kara tjimuna ovaengeri, nu kamaave koka. Owo ovanatje va Ndjambi, tjinga ava penduka movakoke. 37 Nu Moses ma raisa ongahukiro kutja ovakoke mave pendurwa komuinyo. Nu otjiṋa hi we tji raisa membo re mu mu na inga omambo wotjihwa tjaa tji yaka, eye mu ya hungire Muhona otja ngu ri ‘Ndjambi wa Abraham, na Ndjambi wa Isak, na Ndjambi wa Jakob.’ 38 Eye ka Ndjambi wovakoke, nungwari oNdjambi wovanamuinyo, orondu ovandu avehe ku ye ve nomuinyo.”
39 Ozonongo zomambo tjiva va hungira ave tja: “Muhonge, ove wa ziri nawa tjinene!” 40 Okuzambo kape ningire omundu ngwa rorere okumupura omapuriro rukwao.
Omutwirisiwa, Omuna wa David
(Mt 22:41-46Mk 12:35-37)
41 Jesus we ve purire a tja: “Okutjavi tji kuza Omutwirisiwa eye Omuna wa David? 42 David omuini ma tja nai membo rOmapsalme:
‘Muhona wa tja nai kOmuhona wandje:
Kara pehi mba kokunene kwandje
43 nga ami tji mba twa ovanavita na ove kehi yozombaze zoye.’
44 David tji me mu tja ‘oMuhona,’ ma rire vi Omuna we?”
Jesus ma rongo ovandu otja kozonongo zomambo
(Mt 23:1-36Mk 12:38-40)
45 Ovandu avehe ngunda amave puratene ku ye, eye wa tja kovahongewa ve: 46 “Ritjevereye kozonongo zomambo. Ozo za suvera okuryanga nozombanda nḓe raisa kutja owo ovananḓengu, nokuminikwa nondengero potuveze twomarandisiro; ze haama kovihavero vyovatengwandu mozosinagoge, nu ze toorora otuveze twondengero pomikandi. 47 Ozo ze punda oviṋa vyovahepundu nokuhinahoṋi, nu ze munika komurungu wovandu amaze ve wovisa nozongumbiro ozonde. Omberero yazo mai rire onḓeu tjinene!”