Esekiel 18 - Herero Revision Bible (HRR)

Ourizirira womundu kourike

1 Muhona wa hungira ku ami a tja: 2 “Omuano mbwi ovandu mbu ve kara pokuhungira mehi ra Israel, owo uṋe?

‘Ooihe va rya omandjembere omangura,

nungwari omayo wovanatje onga hara ouwe.’ ”

3 Muhona Ndjambi ma tja nai: “Tjiri, otja ngu mbi ri Ndjambi omunamuinyo, eṋe kamu nakuhungira omuano mbwi rukwao mehi ra Israel. 4 Omuinyo womundu auhe owandje, okutja omuinyo wa ihe na imbwi owomuatje. Omundu ngwa tjiti ourunde ongwa sokuṱa.

5 “Ngatu tje pe nomurumendu womutima omupore nomusemba nomuṱakame tjiri. 6 Eye ke rikotamene koomukuru vovisenginina vyOvaisrael, nu ka ri ozombunguhiro nḓe punguhirwa ovipunguhiro ovizere kozondunda; eye ka yamburura omukazendu womukwao mokurara pu ye, nu ka rara pomukazendu ngunda e ri komayuva we woukazendu. 7 Eye ka ṋiṋikiza omundu nu ke mu pundu oviṋa vye, u yarurira omuyazeme otjiṋa otjiyamba; u parura ovanandjara nu u yandja ozombanda ku imba mbe ri muzu. 8 Eye ka yazemisa ovimariva kutja a mwine po ovihohe. U panḓa okutjita ouhasemba nu u pangura osemba pokati kaimba mbe nozombata kumwe. 9 Omurumendu otja ingwi u kara nonḓuviro komazikamisiro wandje nokuṱakamisa omaraerero wandje nouṱakame. Eye omusemba, nu ma kara nomuinyo.” Muhona Ndjambi ongu ma tja nao.

10 “Nambano ngatu tje omurumendu ngwi u nomuzandu ngu tjita ozondjito zoutwe nokuzepa ovandu, nu ngu tjita oviṋa avihe mbi 11 ihe mbye hi na indu wa tjitire, okutja okurya ozombunguhiro nḓe punguhirwa kovipunguhiro ovizere kozondunda nokuyamburura ovakazendu vovakwao mokurara pu wo; 12 omuzandu ngwi u ṋiṋikiza ovasyona nokupunda ovandu oviṋa vyawo, nokuṱakamisa ihi omuyazeme tji me mu pe otja otjiṋa otjiyamba; nu wina u yenda kovipunguhiro ovizere vyovisenginina kozondunda e kerikotamena koomukuru ovayaukise vovisenginina, 13 na yazema ovimariva kutja a munine po ovihohe. Eye hapo nai ma kara nomuinyo are? Kako, eye kamaa kara nomuinyo. Eye wa tjita oviṋa avihe oviyaukise mbi, notji ma ṱu. Eye u nomerizirira konḓiro ye omuini.

14 “Nambano ngatu tje omuzandu ngwi u nomuatje omuzandu wina. Nomuzandu we ngwi ma munu ourunde auhe ihe mbe tjita, nungwari kahorere kotjikaro. 15 Eye ke rikotamene koomukuru vovisenginina vyOvaisrael, nu ka ri ozombunguhiro nḓe punguhirwa kovipunguhiro ovizere kozondunda. Eye ka yamburura omukazendu womukwao mokurara pu ye 16 nu ka ṋiṋikiza omundu nokumupunda. U yarurira omuyazeme ihi tje mu pa otja otjiṋa otjiyamba. Eye u parura ovanandjara nu a zarisa imba mbe ri muzu. 17 Eye u panḓa okutjita ouhasemba nu ka yazemisa ovimariva kutja a munine po ovihohe. Eye u ṱakamisa omaraerero wandje nokukara nonḓuviro komazikamisiro wandje. Omuzandu ngwi ke nokuṱa mena romauvi wa ihe, nungwari, tjiri, ma kara nomuinyo. 18 Nungwari ingwi ihe wa ṋiṋikiza ovandu nokuvepunda oviṋa vyawo, nu aruhe aa tjiti ouhasemba kovandu. Komuhingo mbwi eye otja ṱa mena romauvi eye omuini nga tjitire.

19 “Nungwari eṋe mu pura amu tja: Okutjavi omuzandu tje ha hihamisirwa omauvi wa ihe? Eziriro oro ndi rokutja omuzandu ngwi wa tjita ouwa nousemba. Eye wa ṱakamisa omazikamisiro wandje nu e ye yenenisa nouṱakame, neye, tjiri, otje hi nakuṱa. 20 Ingwi ngu ma tjiti ouvi, ongu ma ṱu. Omuzandu ke nokuhihamisirwa omauvi wa ihe, nu ihe ke nokuhihamisirwa omauvi womuzandu we. Omundu omusemba ma sutirwa ousemba mbwe tjita, nomunauvi ma hihamisirwa ouvi mbwe tjita.

21 “Omunauvi tja isa okutjita ourunde na ṱakamisa omazikamisiro wandje aehe, nu a tjiti ousemba nouwa, ke nokuṱa; eye, tjiri, ma kara nomuinyo. 22 Omauvi we aehe maye isirwa, neye ma kara nomuinyo, tjinga a tjita ousemba.” 23 Muhona Ndjambi ma pura nai: “Mamu tjangovasi ami mbi nonyuṋe monḓiro yomunauvi are? Kako, ami tjinene mbi vanga okumumuna kutja a kare nomuinyo.

24 “Nungwari omusemba tja isa okutjita ouwa na utu okutjita ouvi auhe ouyaukise omurunde mbwe tjita, eye hapo ma kara nomuinyo are? Kako! Kape notjiṋa otjiwa tjimwe tja tjita eye ku ma zemburukirwa. Eye ma ṱire ouhaṱakama nourunde we.

25 “Nungwari eṋe mamu tja nai: ‘Imbi Muhona mbye tjita ovihasemba!’ Purateneye ku ami, oweṋe Vaisrael. Eṋe mu tjangovasi omuhingo mbu mbi tjita oviṋa omuhasemba are? Kako, omuhingo weṋu ombu ri omuhasemba. 26 Omusemba tja isa okutjita ousemba na utu okutjita ouvi, nu tjazumba a koka, okutja nao wa ṱu motjimbe tjouvi mbwa tjita. 27 Omunauvi tja isa okutjita ouvi na tjiti ousemba nouwa, okutja ma yama omuinyo we. 28 Eye tja munu kutja imbi mbya tjita kavisemba na isa ouvi, eye, tjiri, ke nokuṱa, nungwari ma kara nomuinyo. 29 Neṋe Ovaisrael mamu tja nai: ‘Imbi Muhona mbye tjita ovihasemba!’ Mamu tjangovasi omuhingo wandje omuhasemba, ka tjiperi are? Kako! Omuhingo weṋu ombu ri omuhasemba.

30 “Nambano ami, ngu mbi ri Muhona Ndjambi, me mu raere, Vaisrael, kutja me pangura auhe weṋu otja koviṋa mbya tjita. Ritanaureye nu mu ise ouvi auhe mbu mu tjita, nu amu riyandjere ko kutja omauvi weṋu ye mu yandeke. 31 Pokeye kouvi ngamwa auhe mbu mu tjita nu mu riutire omitima omipe nombepo ombe. Okutjavi, eṋe Vaisrael, tji mu vanga okuṱa? 32 Ami hi nonyuṋe monḓiro yomundu. Ritanaureye komauvi weṋu, nu mamu kara nomuinyo!” Muhona Ndjambi ongu ma tja nao.