Hagai 1 - Herero Revision Bible (HRR)

Muhona ma rakiza kutja ondjuwo ye i tungururwe

1 Mombura oitjavari youhona wa Darius, ombara ya Persie, meyuva etenga romueze outjahamboumwe, Muhona wa hungira notjinyo tjomuprofete Hagai. Ombuze ya hindwa kongooneya yehi ra Juda Serubabel, omuzandu wa Sealtiel, na kOmupristeri Otjiuru Josua, omuzandu wa Jehosadak.

2 Muhona Omunamasaaehe wa tja nai ku Hagai: “Otjiwaṋa hi matji tja oruveze rwokutungurura ondjuwo yandje ingee karuye ya.” 3 Muhona otja yandja ombuze ndji kotjiwaṋa notjinyo tjomuprofete Hagai: 4 “Tjiwaṋa tjandje, okutjavi eṋe tji mwa tura mozondjuwo nḓa tungwa nawa, ondjuwo yandje ngunda ai ri otjitambatundu? 5 Kamu nokumuna imbi mbi mavi tjitwa ku eṋe are? 6 Eṋe mwa kuna ovikokotwa ovingi tjinene, nungwari mwa konda oviṱiṱi uriri. Mu novikurya okurya, nungwari ovyo kavi mu kutisa. Mu nomavinu okunwa, nungwari owo kaye mu purukisa! Mu nozombanda, nungwari kaze mu harisa oupyu. Nomuungure ka munu oviungura mbya yenene okumuhupisa. 7 Kamu nokumuna kutja oviṋa mbi vya tjitirwa tjike are? 8 Nambano rondeye kozondundu mu kake omiti nu mu tungurure ondjuwo yandje; ami otji me kara nohange notji me yozikwa.

9 “Eṋe mwa undja okumuna omakondero omanene, nungwari owo ya rira omaṱiṱi uriri. Neṋe tji mwa eta omakondero wovikokotwa konganda, ami mbe ye pizira kwarwe. Mba tjitira tjike nao? Omena rokutja ondjuwo yandje i ri otjitambatundu, auhe weṋu ngunda ama tungu ondjuwo ye omuini. 10 Ombura opu i ha zu okuroka, nopu pe ha zu okuhapa otjiṋa. 11 Ami mba eta ourumbu mehi, okutja okozondundu zaro na movikunino vyaro vyovikokotwa novyomivite novyomiṋinga na kovihape mbi hapa mehi na kovandu novipuka na koviṋa avihe eṋe mbi mu kondja okukuna.”

Otjiwaṋa matji kara nonḓuviro komarakiza wa Muhona

12 Serubabel na Josua novandu avehe mba kotokere okuza kouhuura wa Babilon va tjita imbi Muhona, Ndjambi wawo mbye ve raera. Owo va kara nondira ku Muhona, notji va kara nonḓuviro komuprofete Hagai, omuhindwa wa Muhona. 13 Tjazumba Hagai otja yandja ombuze ya Muhona kotjiwaṋa ndji mai tja nai: “Ami me kara puna eṋe; inga onge ri omakwizikiro wandje.” 14 Muhona wa pendura ombepo movandu avehe mba kutja ve tungurure ondjuwo ya Muhona, okutja o Serubabel, ongooneya yehi ra Juda, na Josua, Omupristeri Otjiuru, novandu avehe mba kotokere okuza kouhuura. Owo va uta okutungurura ondjuwo ya Muhona Omunamasaaehe, Ndjambi wawo, 15 meyuva oritjamirongo vivari na yane komueze outjahamboumwe wombura oitjavari youhona wa Darius.