Ongumbiro yokuzera ondjuwo ya Muhona
Komuimburise. Epsalme rovazandu va Kora.
1 Tjiri, omaturiro woye omawa omamanise,
Muhona Omunamasaaehe!
2 Omuinyo wandje u zera nu u
hihamenwa i ondjuwo yoye Muhona.
Omutima nonyama yandje mavi yorokere ove,
ngu u ri Ndjambi omunamuinyo.
3 Nangarire ondjandja ya tunga otjiruwo tjayo,
nondiri i nokaruwo kayo;
ozo ze ṱizira ouzerona wazo povipunguhiro vyoye,
Muhona Omunamasaaehe,
Ombara yandje na Ndjambi wandje.
4 Ovaṋingandu imba mbe tura mondjuwo yoye,
amave ku tanga aruhe.
5 Ovaṋingandu imba mbe muna
omasa wawo move,
tji mave tjiti ouyenda kondundu Sion.
6 Owo tji mave tuurunga otjana tjombara,
mamu pupu otuharwi mu tjo,
nombura ondemune mai
nyomona okuti kwatjo akuhe.
7 Mave harere ko omasa,
ngunda amave kayenda,
nga tji mave kamuna
Ndjambi kondundu Sion.
8 Zuva ongumbiro yandje, Muhona,
Ndjambi Omunamasaaehe!
Puratena ku yo, Ndjambi wa Jakob!
9 Ndjambi, sera ondaya kombara yetu,
indji ombara, ndji wa toorora.
10 Okokuwa okukara eyuva rimwe
mondjuwo yoye komeho
yokukara omayuva eyovi rimwe kwarwe.
Ami me ṱokukurama pomuvero
wondjuwo ya Ndjambi wandje
komeho yokutura mozondanda zovarunde.
11 Orondu Muhona, Ndjambi,
eye eyuva, ndi yandja
ondjerera nomuinyo ku eṱe.
Eye u tu yama nu u yandja otjari nondatero;
ka rurupara oviṋa oviwa ku imba
mbe ryanga mousemba.
12 Muhona Omunamasaaehe,
ovaṋingandu imba mbe riyameka kove!
© Herero Revision Bible © Bible Society in Namibia, 2021.
