Ombara Hiskija ma ningire ondunge ku Jesaja
(Jes 37:1-7)1 Mokamanga ombara Hiskija tja zuva omaserekarerero wawo, otja nyondorora ozombanda ze moruhoze, e ri zarisa ozombanda zomakutu na i kondjuwo ya Muhona. 2 Eye wa hinda Eljakim, omuṱakamise omunene wondjuwo youhona, na Sebna, omutjangerepo wouhona, nOvapristeri Oviuru komuprofete Jesaja, omuzandu wa Amos. Owo wina va zarere ozombanda zomakutu. 3 Ombuze ndje ve raera okukayandja ku Jesaja, oyo ndji: “Ndino oro eyuva romihihamo; eṱe matu verwa, nu matu yambururwa. Tu ri otja omukazendu ngwe rirongerere okupanduka, nungwari ngu hi nomasa okutjita nao. 4 Ombara yOvaasirie ya hinda omuhongore wayo omunene okukayamburura Ndjambi omunamuinyo. Arikana, Muhona, Ndjambi woye, nga zuve omayambururiro nga, nu nga vere imba mbe ye hungire. Nambano kumbira ovandu vetu ku Ndjambi, imba mba hupa.”
5 Jesaja tja zuva ombuze ndji yombara Hiskija, 6 otja yarura eziriro ndi a tja: “Muhona me ku tjivisa kutja o ha tirisiwa i Ovaasirie nomahungiriro wawo wokutja Muhona ke nokumuyama. 7 Muhona ma tjiti kutja indji ombara i zuve ondangu yorive, ndji mai tjiti kutja ombara i yaruke kehi rayo oini; nu Muhona me keizepaisira ngo.”
Ovaasirie mave hindi ondandero yarwe
(Jes 37:8-20)8 Omuhongore wOvaasirie wa zuva kutja ombara Sanherib wa za mOlakis na karwisa otjihuro Libna, tji tja ri popezu na Lakis; eye opa ira ngo okukahungira na ye. 9 Kwa zuvaka ombuze kOvaasirie kutja otjimbumba tjovita tjOvaengipte tji tja hongorerwa i Tirhaka, ombara ya Etiopie, tje ya okuverwisa. Nombara tji ya zuva nai ya hinda orutuu ku Hiskija, ombara ya Juda, 10 okukemuraera nai: “Omukuru ku we riyameka we ku tjivisa kutja ove ko nokuhita momake wandje; nungwari o wovisiwa i ye. 11 Ove wa zuva ozombara zOvaasirie tji ze tjita komahi ngamwa aehe ngu maze vanga okunyona. Mo ripura kutja mo yenene okutaura are? 12 Ootate mukururume va nyonene ovihuro mbi ooGosan na Haran na Resef, nave zepa ovandu va Eden, mba turire mOtelasar, nu kapa ri omukuru wawo umwe ngwa sorere okuveyama. 13 Ozombara zovihuro ooHamat na Arpad na Sefarwajim na Hena na Iwa ze ri pi?”
14 Ombara Hiskija wa kambura orutuu ndwi kovahindwa ne ru rese. Tjazumba eye wa ya kondjuwo ya Muhona a katwa orutuu ndwi momurungu wa Muhona, 15 na kumbu a tja: “Muhona, Ndjambi wa Israel, ngu u haama kotjihavero tjoye tjouhona kombanda yovakerubi, oove erike ngu u ri Ndjambi, ngu u honapara kombanda yomauhona aehe mouye, ove wa utire eyuru nehi. 16 Nambano, Muhona, tu zuvira, nu tara ku imbi mbi mavi tjitwa ku eṱe. Puratena komambo aehe Sanherib ngu ma hungire okukuyamburura, ove ngu u ri Ndjambi omunamuinyo. 17 Eṱe atuhe matu tjiwa, Muhona, kutja ozombara za Asirie za nyona oviwaṋa ovingi, aze tjiti omahi wavyo okurira onguza 18 naze ningiririsa oomukuru vavyo vovisenginina, mbe ha ri oomukuru oparukaze, nungwari mba ri oviserekarera vyomiti nomawe uriri mbya ungurwa i omake wovandu. 19 Nambano, Muhona, Ndjambi wetu, tu yama kOvaasirie, kokutja oviwaṋa avihe mouye vi tjiwe kutja oove erike, Muhona, ngu u ri Ndjambi.”
Ombuze ya Jesaja kombara
(Jes 37:21-38)20 Jesaja wa hinda ombuze okukaraera ombara Hiskija kutja Muhona wa zuva ongumbiro yombara ne i ziri, 21 ama tja nai: “Otjihuro Jerusalem matji ku yoro, Sanherib, nu matji ku nyekerere. 22 Hapo mo ripura kutja wa yamburura nu wa nyekerera uṋe? Ove kawa ri nondengero ku ami, ngu mbi ri Ndjambi, Omuyapuke wa Israel. 23 Ove wa tuma ovahindwa voye okundjiyamburura kutja ove nomatemba woye aehe wovita mwa huura ozondundu inḓa ozonde tjinenenene, nangarire indji ondomba yondundu Libanon. Ove we rihiva kutja wa ka otupapa itwi oture tjinenenene nomimbonde imbi omiwamiwa koṋa ngo, okutja wa kavaza kokwara kwokuti ku kwa pita. 24 Ove we rihiva kutja wa hupura ozondjombo no nu omeva momahi wozonganda, nokutja ozombaze zovarwe voye wovita za tomba onḓonḓu Nil nga tji ya kaha.
25 “Ko na pu wa zuvire kutja ami mbe ripura okuṱuna oviṋa mbi avihe rukuru are? Nambano ami mbe vi yenenisa. Ami mbe ku pa omasa okutjita ovihuro ovinamasa kutja vi rire ovitambatundu. 26 Ovandu, mba turire mo kava ri nomasa; owo aave tira nu va ri nohoṋi. Va ri otja omahozu mokuti poo ozondombora, nḓa hapa komututu wondjuwo, nu nḓe nyosiwa i ombepo ombyu yokomuhuka.
27 “Nungwari ami me tjiwa oviṋa avihe vyoye mbi u tjita, nokoṋa akuhe ku u yenda; nu me tjiwa tji u rokohera mu ami. 28 Ami mba zuva omaserekarerero womarokohero nga nomeritongamisiro woye; nambano me hweke oruuri meyuru roye nombate motjinyo tjoye, nu me ku yarura nondjira tjingeyo, indji ndji mwa etere.”
29 Tjazumba Jesaja wa tja nai kombara Hiskija: “Otjiraisiro tjoviṋa, mbi mavi tjitwa, otjo hi: Ombura ndji na indji ndji mai yende mamu ri ovikokotwa vyokuti mbi mavi rihapere ovini, nungwari mombura indji oitjatatu mamu yenene okukuna ovikokotwa vyeṋu nokuvikonda, nu mamu kunu omivite namu ri omandjembere wavyo. 30 Imba mba hupa mOjuda mave takavara tjimuna ovikunwa mbi mavi nangananisa omize vyavyo mehi navi eta ovihape. 31 Mamu kara ovandu mOjerusalem na kondundu Sion mbu mave hupu, onḓero ya Muhona Omunamasaaehe tjinga amai tjiti nai.
32 “Ihi Muhona tja hungirira ombara ya Asirie, otjo hi: ‘oyo kai nokuhita motjihuro hi poo okuyumba otjiku nangarire tjimwe mu tjo. Kape novarwe wovita mbe notuvao mbu mave ya popezu notjihuro ho, nu kape notumbo twomakoverero tu matu tungwa okukondoroka tjo. 33 Oyo mai yaruka nondjira tjingeyo, indji ndji ye ya na yo, nu kamaai hiti motjihuro hi. Ami, ngu mbi ri Muhona, mba hungire. 34 Ami me yeura otjihuro hi ne tji yama mena rondjozikiro yandje omuini, na mena romakwizikiro ngu mba tjita komukarere wandje David!’ ”
35 Ouṱuku mbo omuengeri wa Muhona wa ya kozondanda zOvaasirie na kazepa ovarwe wovita 185,000. Menyunguhuka rependukirwa raindo owo avehe va saravara mbo ava koka. 36 Sanherib, ombara yOvaasirie, otja womboroka na yaruka kotjihuro Ninive. 37 Eyuva rimwe Sanherib ngunda ama kumbire mondjuwo onḓere yomukuru we wotjisenginina Nisrok, ovazandu ve vevari, ooAdramelek na Sareser, otji ve mu zepa nomangaruvyo wawo; tjazumba ave henene kehi ra Ararat. Nu omuzandu we warwe, Asarhadon, we mu pingena okurira ombara.
© Herero Revision Bible © Bible Society in Namibia, 2021.
