Jeremia 24 - Herero Revision Bible (HRR)

Ovimbamba vivari vyomakuyu

1 Muhona we ndji raisira ovimbamba vivari vyomakuyu mbya tuwa momurungu wondjuwo ya Muhona. Imbi vya tjitwa, indu Nebukadnesar, ombara ya Babilon, tja za nokuhuura Jojakin, omuzandu wa Jojakim, ombara ya Juda, nokumutwara kObabilon okuza mOjerusalem puna ovahongore va Juda novaungure ozonongo novahambure vovipate. 2 Motjimbamba otjitenga mwa ri nomakuyu omawa, nga tenga okuhora; mu ihi otjikwao mwa ri omakuyu omavi, omavi tjinene nai nga tji ye ha pwire okuriwa. 3 Muhona wa tja nai ku ami: “Jeremia, mo munu tjike?”

Ami mba zira e tja: “Omakuyu. Inga omawa, omawa tjinene; nu inga omavi, omavi tjinene nai nga tji ye ha pwire okuriwa.”

4 Muhona otja tja nai ku ami: 5 “Ami, ngu mbi ri Muhona, Ndjambi wa Israel, me munu kutja ovandu mba mba twarewa kObabilon va sana nomakuyu omawa nga, nu ami me tara nondjingonekero ku wo. 6 Ami meve tjevere notjari, nu meve kotora kehi ndi. Meve tungu, nu hi nokuvehaṋa; meve kunu, nu hi nokuvezukura. 7 Ami meve pe omitima vyokundjizemburuka kutja owami ngu mbi ri Muhona. Nu owo otji mave rire otjiwaṋa tjandje, ami me rire Ndjambi wawo, tjinga amave ritanaurire ku ami nomitima vyawo avihe.

8 “Otja tjinga ame tjiti komakuyu omavi, ovinene nai nga tji ye ha pwire okuriwa, ami, ngu mbi ri Muhona, otjinga ame tjiti ku Sidkija, ombara ya Juda, novaingona ve, na kovature va Jerusalem mba sewa po, tjiva mba kara mehi ndi na tjiva mba tjindira kOengipte. 9 Ami me eta otjiwonga otja ihi kombanda yawo, kokutja oviwaṋa avihe mouye vi urumisiwe. Oviwaṋa mbi mavi ve hembe nokuvenyekerera nokuveyora, nu mavi ungurisa ena rawo otja osengiro ngamwa akuhe ami ku mbe ve rimba. 10 Ami meve etere ovita nondjara nomutjise omuzeu, nga tji pe hi nokusewa omundu umwe wawo mehi, ndi mba yandjere ku wo na kooihe mukururume.”