Eimburiro rorukupo rwombara
Komuimburise otja kOzongara. Epsalme rovazandu va Kora. Eimburiro rorusuvero.
1 Omutima wandje we urisiwa nomambo omawa,
ngu me imburire ombara otja omuimbo.
Eraka randje re ri rongerere omuimbo
otja otjitjange tjomutjange ngwa sora.
2 Oove omuwa tjinene povandu avehe;
u sora okuhungira omambo omatjate,
orondu Ndjambi u ku sera ondaya aruhe.
3 Engaruvyo roye kuta kevango, mbara onamasa;
oove ngu u ri omunene nomutongame.
4 Kayende movita u katoṋe,
u karwire ouatjiri nousemba.
Omasa woye maye ku etere ondoṋeno onene!
5 Oviku vyoye ovyo ovitwe,
vi tuvakaṋa omitima vyovanavita na ove.
Oviwaṋa mavi wisirwa pozombaze zoye.
6 Ouhona Ndjambi mbwe ku pa
mau karerere nga aruhe.
Ove u honaparera otjiwaṋa tjoye nousemba.
7 Ove wa suvera ousemba, nu wa tonda ouvi.
Opu wa za okutwirisiwa i Ndjambi,
ngu ri Ndjambi woye,
nomaze wouṋingandu pozombara zarwe azehe.
8 Ozombanda zoye ze nomoro omuwa
womamira nowovindombo;
ovanyande vovinangoma mave ku
nyandere mozondjuwo zouhona,
nḓa harekwa nomayo wozondjou.
9 Mokati kovasuko voye ovakarere
ovayozikwa mu novasuko vozombara;
nu kokunene kwoye kwa kurama
ombara oserekaze ndja harekwa
nongoldo ongohoke ndja za kOofir.
10 Puratena, musuko wombara, puratena nawa;
zemba otjiwaṋa tjeṋu nonganda yaiho!
11 Ouwa woye oumanise mau ku suverisa kombara;
eye omuhona woye,
opu mo sokukarera nonḓuviro ku yo.
12 Musuko wa Tirus, ovatumbe votjiwaṋa mave
ku yozike noviyandjewa.
13 Ombara oserekaze i ri mondjuwo youhona,
eye omuwa tjinene!
Ongwava ye ya wozewa nourenga wongoldo.
14 Eye ma wombororwa kombara
mombanda onde yovivaravara,
ama ṱikwa i ovasuko omakura we,
owo wina mave etwa kombara.
15 Owo mave ya nenyando nondjoroka,
nu mave hitisiwa mondjuwo yombara.
16 Ove, mbara yandje, mo kara novanatje ovengi
mbu mave pingene ooiho
mukururume okurira ozombara,
nove mo ve ziki okurira ovanane mehi arihe.
17 Eimburiro randje ma ri tjiukisa ena roye
okuza kozondekurona nga kozondekurona;
noviwaṋa avihe mavi ku tanga aruhe nga aruhe.
© Herero Revision Bible © Bible Society in Namibia, 2021.
