Levitikus 8 - Herero Revision Bible (HRR)

Omazikiro wa Aron novazandu ve

1 Muhona wa hungira ku Moses ama tja: 2 “Twara ooAron novazandu ve pomahitiro wOndanda yOmahakaeneno nozombanda ozondjapuke zoupristeri, nomaze omatwirise, nondwiyona yombunguhiro yokuisapo ourunde, nozondwezu mbari zozonḓu, notjimbamba mu mu nomavanda nge hi nosurise. 3 Nu woronganisira ombongo aihe poṋa mbo.”

4 Moses wa tjita otja Muhona pe mu rakiza. Ombongo ya woronganena pomahitiro wOndanda yOmahakaeneno. 5 Nu Moses wa tja kombongo: “Nambano ami me tjiti otjiṋa Muhona tja rakiza.”

6 Moses wa eta ooAron novazandu ve popezu ne ve tjiti kutja ve rikohe momeva. 7 Neye wa zarisa Aron ombanda yokehi, e mu varanga nekwamo ne mu zarisa orupera rwokombanda. Wina we mu zarisa ombanda yokoviṱuve, e mu varanga nekwamo rombanda yokoviṱuve ne i pamisa na to. 8 Tjazumba arire tje mu kutu ondjaṱu yomorukoro na twa mo ozohanga Urim na Rumim mondjaṱu ndjo. 9 Neye we mu twako ekori kotjiuru na kakaterisa ko ondjenge ombapi yongoldo kekori komurungu. Ondjenge ndji oyo otjihako otjiyapuke otja Muhona pa rakiza ku Moses.

10 Tjazumba Moses wa toora omaze omatwirise na twirisa na wo Ondanda yOmahakaeneno na avihe mbya ri mu yo ne vi yapurire Muhona. 11 Neye wa pamenena otjipunguhiro potuhambombari nomaze tjiva wokutwirisa; komuhingo mbwi otja twirisa otjipunguhiro noviungurise vyatjo avihe, notjiyaha tjomerikohero, notjikurameno tjatjo okuviyapurira Muhona. 12 Neye otja tirira omaze omatwirise tjiva kotjiuru tja Aron e mu twirisire. 13 Rukwao Moses wa eta ovazandu va Aron popezu, e ve zarisa ozombanda zokehi, e ve varanga nomakwamo ne ve kutu ozonḓuru koviuru otja Muhona pa rakiza.

14 Moses wa eta ondwiyona yombunguhiro yokuisapo ourunde, nu Aron novazandu ve va twa omake wawo kotjiuru tjayo. 15 Nu Moses we i zepa na woto ombinḓu tjiva ne i hu nomunwe we kozonya zotjipunguhiro okutjiyapura. Nungwari ombinḓu ndja hupa we i tirira pehi meṋe yotjipunguhiro. Komuhingo mbwi otje tji yapura nokutjikohorora. 16 Tjazumba Moses wa isa ko oruehe aruhe, noruamba ndwa ri kehuri, nozosyoti azeyembari puna ozonḓura zazo ne vi ningiririsire kotjipunguhiro. 17 Neye wa kaningiririsa omukova wondwiyona, nonyama notjandja tjayo pendje yozondanda otja Muhona pa rakiza.

18 Tjazumba Moses wa eta ondwezu yonḓu yombunguhiro oningiririsiwa, nu Aron novazandu ve va twa omake wawo kotjiuru tjayo. 19 Moses we i zepa na pemenene ombinḓu keṋe yotjipunguhiro okukondorokisa. 20 Neye we i haṋa moviṋepo pekepeke na ningiririsa otjiuru noviṋepo mbi nozonḓura. 21 Nungwari imbi oviṋa vyopehuri nozonyu we vi koha momeva na ningiririsire indji ondwezu yonḓu aihe kotjipunguhiro. Nu indji ombunguhiro oningiririsiwa, yari ombunguhiro oningiririsiwa otja Muhona pa rakiza ku Moses, nomuṋuko wayo aa u yandja onyuṋe ku Muhona.

22 Moses wa eta ondwezu yonḓu oitjavari, ndja ri oyomazikiro wovapristeri, nu Aron novazandu ve va twa omake wawo kotjiuru tjayo. 23 Moses we i zepa na woto ombinḓu tjiva ne i hu kokutwi kwa Aron kwokunene kehi, na komunwe katjimunene weke re rokunene, na komunwe katjimunene wombaze ye yokunene. 24 Tjazumba Moses wa eta ovazandu va Aron popezu na hu ombinḓu kokutwi kwokunene kwaauhe wawo kehi, na komunwe katjimunene weke rokunene raauhe, na komunwe katjimunene wombaze yokunene yaauhe. Nombinḓu ndja hupu we i pamenena keṋe yotjipunguhiro okukondorokisa. 25 Neye wa toora ozonḓura, okutja omutjira, nozonḓura azehe zoviṋa vyopehuri, noruamba nozosyoti azeyembari puna ozonḓura zazo, nokurama kwokunene. 26 Eye wina wa toora evanda rimwe motjimbamba tjomavanda nge hi nosurise tji tja ri komurungu wa Muhona, nevanda rimwe nda huwa omaze, nevanda rimwe epapi; nomavanda nga aehe we ye twa kombanda yovikonya vyozonḓura na kombanda yokurama kwokunene. 27 Nu ovikurya avihe mbi we vi twa momake wa Aron novazandu ve; nowo ve vi yandja ku Muhona otja otjiyandjewa tjapeke. 28 Tjazumba Moses we vi isa mo momake wawo ne vi ningiririsire kotjipunguhiro, kombanda yombunguhiro oningiririsiwa otja ombunguhiro yomazikiro. Nu indji ondji ri ombunguhiro oningiririsiwa, nomuṋuko wayo ma u yandja onyuṋe ku Muhona. 29 Nu Moses wa toora orukoro wina ne ru yandja ku Muhona otja otjiyandjewa tjapeke. Nu indwi orukoro rwondwezu yomazikiro ondwa rira orwa Moses otja Muhona pa rakiza ku ye.

30 Nu Moses wa isa ko omaze tjiva omatwirise, nombinḓu tjiva ndja ri kotjipunguhiro ne vi pemenene kooAron novazandu ve na kozombanda zawo. Komuhingo mbwi otje ve yapurira Muhona pamwe nozombanda zawo.

31 Moses wa tja kooAron novazandu ve: “Kasumisireye onyama ndji pomahitiro wOndanda yOmahakaeneno, nu i rireye mbo puna omavanda nge ri motjimbamba tjombunguhiro yomazikiro, otja Muhona pa rakiza. 32 Nungwari onyama nomavanda nga hupu vi ningiririseye. 33 Oure womayuva hambombari amu piti mOndanda yOmahakaeneno, nga omayuva womayapuriro weṋu tji ya kapita; orondu omayapuriro weṋu maye kambura oure womayuva hambombari. 34 Muhona we tu rakiza kutja tu tjite nai aruhe otja tji twa tjiti ndinondi kokutja ourunde weṋu u isiwe po. 35 Eṋe mamu sokukara pomahitiro wOndanda yOmahakaeneno omutenya nouṱuku, oure womayuva hambombari, amamu ṱakamisa omazikamisiro wa Muhona kutja amu ha ṱu; orondu otji mba rakiziwa.” 36 Nu Aron novazandu ve otji va tjita oviṋa avihe Muhona mbya rakizire ku Moses.