Otjiwaṋa tja Juda matji sengwa
1 Muhona wa tja nai ku ami: “Nangarire kutja Moses na Samuel andakuzu va kurama mba okuriheka ku ami, ami hitje ṱotjari notjiwaṋa hi rukwao. Tji ramba tji ze mo momurungu wandje. 2 Otjo tji matji ku pura kutja ngatji yende pi, tji raera kutja ami mba tja nai:
Tjiva va sengirwa okuṱomutjise,
oko oku va tyerwa!
Ovakwao va sengirwa okuṱa movita,
oko oku va tyerwa!
Tjiva va sengirwa okuṱondjara,
oko oku va tyerwa!
Ovakwao va sengirwa okutwarewa kouhuura,
oko oku va tyerwa!
3 Ami, ngu mbi ri Muhona, mba zikamisa kutja oviṋa vine mbi ovitirise vi tjitwe ku wo, okutja mave ṱu movita, noturova twawo matu kokozorwa i ozombwa, nozonḓera maze tu ri, novipuka vyokuti mavi sasaura itwi tu twa sewa po. 4 Ami me tjiti kutja owo ve rire otjiraisiro otjitirise komauhona aehe mouye, motjimbe tjaimbi Manasse, omuzandu wa Jehiskija, mbya tjita mOjerusalem, indu tja ri ombara ya Juda.”
5 Muhona ma tja nai:
“Owaṋi ngu ma ṱondjenda na ove,
tjiwaṋa tja Jerusalem,
nowaṋi ngu ma ṱoruhoze na ove?
Owaṋi ngu ma kondo kove
okukupura kutja u ri vi?
6 Ove we ndji imbirahi,
nu we ndji pa etambo.
Ami opu mba ropororera okuoko
kwandje okukunyanyaura,
orondu ami mba urwa nokuṱotjari na ove.
7 Movihuro avihe mehi ami mba imbirahi
ovature vavyo mombepo tjimuna oviyaya.
Ami mba yandeka otjiwaṋa tjandje,
nu mba zepa ovanatje vatjo,
tjinga atji ha isire ozondjira zatjo ozombi.
8 Novahepundu vatjo va rira
ovengi peheke rokuvare.
Ami mba zepa omitanda vyatjo ngunda avi ri ounatje,
notji mba hihamisa ooina omitima.
Ami mba harisa ooina
ondira nomburuma tjimanga.
9 Ina ngwa zepaisa ovanatje ve
hambombari wa seuka ama hekana.
Ondjerera ye yeyuva ya rira onḓorera;
eye wa yambururwa na hihamwa omutima.
Ami me yandjere ovanavita na ove ve zepe
imba oveṋu ingee mbe nomuinyo.
Ami, ngu mbi ri Muhona,
owami ngu mba hungire.”
Jeremia ma unaunine Muhona
10 Owami omurumendu omuhumandu tjiri! Okutjavi mama tje ndji kwata? Ami mbi posa nu mbi patasana nomundu auhe mehi. Hi yazemisa nu hi yazema otjimariva, nungwari omundu ngamwa auhe u ndji senga. 11 Muhona, ozosengiro zawo ngaze yenenisiwe ami tji mbi he ku karerere nawa, nu tji mbi he riyarikaṋene kove mena rovanavita na ami, owo tji va ri moumba na mombamisiro. 12 Kape na ngu ma sora okuteya otjitenda, tjinenene ihi tji tja za komukuma wokokunene kweyuva, nu tji tja hovekwa nongoporo.
13 Muhona wa tja nai ku ami: “Ami me hindi ovanavita kutja ve kapunde outumbe novihuze vyotjiwaṋa tjandje, kokutja mbi tji verere omauvi aehe ngu tja tjita mehi arihe. 14 Ami me tji isa po otjikarere tjovanavita na tjo mehi, ndi tji hi nokutjiwa, orondu omazenge wandje ye ri otja omuriro, nowo maye yaka nga aruhe.”
15 Ami mba tja nai: “Muhona, ove u tjiwa avihe. Rizemburuka na ami nu u ndji vatere. Ndji esa mbi sutise imba mbe ndji tjera okuzepa. O kara nomuretima na wo kutja ave ha toṋa mokundjizepa. Zemburuka kutja omena roye tji mbi yambururwa. 16 Ove wa hungira ku ami, nu ee puratene kembo roye arihe nonḓero nombango aihe. Ami owami owoye, Muhona Ndjambi Omunamasaaehe, nomambo woye ye urisa omutima wandje nenyando nondjoroka. 17 Ami hi haamene pamwe novandu varwe ame yoro nambi nehore na wo. Mena rokukara nonḓuviro komarakiza woye, opu mbe rikarera erike; nove we ndji rungisa. 18 Me karere tjike pokuhihamwa nai? Okutjavi ovirwaro vyandje tji vi hi nokuveruka? Mo vanga okundjihihamisa omutima otja onḓonḓu, ndji pwira mokurooro tji i tjita are?”
19 Koviṋa mbi Muhona wa zira nai: “Ove tji we ritanaurire ku ami, ami me ku yakura, nove o rire omukarere wandje rukwao. Nu tjinangara moruveze rwokuhungira oviporoporo mo zuvarisa ombuze onanḓengu, mo rire omuprofete wandje rukwao. Otjiwaṋa matji kotoka kove, nove ko nokuhepa okuyenda ku tjo. 20 Ami me ku tjiti u sane kekuma rongoporo ongukutu kotjiwaṋa hi. Owo mave ku rwisa, nungwari kave nokukuhavera. Orondu ami me kara puna ove okukuyama, nu me ku ṱakamisa kutja o ha munu oumba. 21 Ami me ku yama komasa wovanauvi, nu me ku kutura momake wovatjite woutwe. Ami ngu mbi ri Muhona, owami ngu mba hungire.”
© Herero Revision Bible © Bible Society in Namibia, 2021.
