Vaterasaneye
1 Vakwetu, omundu tja wire mouvi worive, eṋe mbu mu hongorerwa i Ombepo, mu vatereye amamu mu rongo nomutima omutarazu. Nu ṱakamisa kutja ove omuini wina o ha rorwa. 2 Vaterasaneye okutjinda omauzeu weṋu. Komuhingo mbwi otji mamu yenenisa indi etwako ra Kristus. 3 Omundu tji ma tjangovasi eye otjiṋa, ngunda, tjiri, e he ri otjiṋa, me riwovisa omuini. 4 Auhe nge rikonḓonone otja komeritjindiro we omuini. Nu tja munu kutja ovitjitwa vye oviwa, eye ma yenene okurihivira vyo nokuhinokuvisasaneka na imbi vyomukwao. 5 Orondu auhe u sokutjinda omutwaro we omuini.
6 Ingwi ngu ma hongwa embo ra Ndjambi, nga haṋasane nomumuhonge imbi avihe oviwa mbye na vyo.
7 Amu riwovisa oveni: Ndjambi ka nyekererwa. Ihi omundu tji ma kunu, wina otji ma kondo. 8 Ngu ma kunu mehi rongaro ye youndu mu ro ma kondo mo omakondero wonḓiro; nu ngu ma kunu mehi rOmbepo, eye mOmbepo ndji ma kondo mo omakondero womuinyo waaruhe. 9 Atu ha urwa okutjita ouwa, orondu tji tu ha urirwe, matu kondo omakondero moruveze orusemba. 10 Nu ngunda atu noruveze, ngatu tjite ouwa ku avehe, nu tjinene kovakambure ovakwetu.
Omaronga omasenina nozombinika
11 Okuzamba me tjanga neke randje omuini ku eṋe. Tareye uri ozoreṱera ozonene nḓa!
12 Ovandu mba mbe mu kondjisa kutja mu sukarekwe ve vanga okuraisa ombunikiro ombwa yopendje kokutja ave ha tatumisirwa otjikoroise tja Kristus. 13 Nangarire kutja owo ve risukarekisa, owo oveni kave ṱakamisa Omatwako wa Moses. Owo ve vanga kutja eṋe mu sukarekwe, kokutja owo ve sore okurihivira imbi mbya tjitwa kotutu tweṋu. 14 Nungwari ami me vanga okurihivira ihi otjikoroise tja Muhona wetu Jesus Kristus porwatjo. Nu Kristus tjinga a ṱa kotjikoroise, ouye ku ami otjinga awa ṱa, nami wina otjinga amba ṱa komunda wouye. 15 Kape notjiungura kutja omundu wa sukara poo ka sukarere, nungwari ihi otjinanḓengu porwatjo okongwi okutja ove wa rira omundu omupe mu Ndjambi. 16 Nu imba mbe ryanga komuhingo mbwi mongaro yawo, Ndjambi nge ve pe ohange notjari. Owo ombe ri otjiwaṋa tjatjiri tja Israel!
17 Omambo wandje omasenina me tja nai: Ape ningi omundu ngu me ndji pe ouzeu rukwao, ovivavize, mbi mbi na vyo korutu, tjinga amavi raisa kutja ami mbi norupa mondatumisire ya Jesus.
18 Otjari tja Muhona wetu Jesus Kristus ngatji kare na eṋe amuhe, vakwetu. Amen.
© Herero Revision Bible © Bible Society in Namibia, 2021.
