Omapsalme 68 - Herero Revision Bible (HRR)

Outoṋi wa Ndjambi kovanavita na ye

Komuimburise. Epsalme ra David. Eimburiro.

1 Ndjambi ma sekama nu ma

rimbi ovanavita naye;

imba mbe mu tonda mave taura komurungu we.

2 Otja omuise punga au hingwa i ombepo,

ove opunga amo ve rimbi;

notja erose punga ari zuzuka komuriro,

ovanauvi wina opunga amave

zengi momurungu wa Ndjambi.

3 Nungwari ovasemba mave nyanda

nu mave yoroka komurungu wa Ndjambi;

mave yoroka nenyando enene.

4 Imburireye Ndjambi, tangeye ena re;

ṱuneye ondjira yaingwi ngu

kayenda movikamba.

Ena re oMuhona.

Yorokereye momurungu we.

5 Ndjambi ngu kara momaturiro we omayapuke,

u tjevera ozosewa,

nu u yama ovahepundu.

6 Eye u yandja oruuto ku imba mba hepauka,

nu u pitisa ovapandekwa kouyara;

nungwari imba ovapirukire mave

tura mehi orunguza.

7 Ndjambi, ove tji wa hongorera otjiwaṋa tjoye,

nu tji wa tuurunga okuti onguza,

8 ehi otji ra zezera neyuru ari roko ombura

komurungu wa Ndjambi wa Sinai,

komurungu wa Ndjambi wa Israel.

9 Ndjambi, ove wa rokisa ombura

onyingi mehi roye,

navihe mbya wotama ove u tutumuna;

10 notjiwaṋa tjoye tja tura mu ro;

mouwa woye, Ndjambi,

ove wa ṱunina ovasyona eha.

11 Muhona wa yandja embo re,

nu ihi otjimbumba otjinene

tja zuvarisa na tji tja nai;

12 “Ozombara novimbumba

vyazo vyovita maze taura!”

Ovakazendu mozonganda va haṋa

oviṋa mbya huurwa,

13 okutja oviserekarera vyozonguti

mbya tuwa osilveri,

novivava vyazo vyongoldo

ongohoke ndji keṋakeṋa.

(Okutjavi tjiva veṋu tji va

kara movyunda vyozonḓu meyuva rotjirwa?)

14 Omunamasaaehe tja rimba ozombara

kondundu ya Salmon,

arire tja rokisa ovitutukende kombanda yayo.

15 Ondundu ya Basan oyo ondundu

yotuhungu otuingi.

16 Oweṋe zondundu zotuhungu otuingi,

mamu ṱire tjike eruru nondundu

Ndjambi ndje rivangera okurira omaturiro we?

Muhona omu ma tura nga aruhe!

17 Nomatemba we wovita omanamasa

omayovi omengi Muhona

ma zu kOsinai na hiti motjouyapuke tje.

18 Eye ma rondo kombanda nu

ma twaerere ovahuurwa ovengi;

eye ma kambura oviyandjewa kovemupirukire,

kutja owo wina ve ture puna Muhona Ndjambi.

19 Muhona nga tangwe, ngu tjinda

omauzeu wetu eyuva arihe;

eye Ndjambi ngu tu yama.

20 Ndjambi wetu eye Ndjambi ngu tu vatera;

eye oMuhona, Muhona wetu,

ngu tu yama konḓiro.

21 Ndjambi, tjiri, ma ṱukuṱura oviuru

vyovanavita naye,

nu ma nyainya imba mbe panḓera

pozondjito zawo zourunde.

22 Muhona wa tja nai:

“Ami me kotora ovanavita

na eṋe okuza kObasan,

meve kotora okuza mourekoto wokuvare,

23 kokutja ozombaze zeṋu ze

yate mombinḓu yawo,

nokutja ozombwa zeṋu

ze i tjake otja pu maze vanga.”

24 Ndjambi, orukosi rwoutoṋi woye,

ru munikwa i avehe,

indwi orukosi rwa Ndjambi wandje,

Ombara yandje,

rwokuhita motjouyapuke tje.

25 Ovaimbure veri komurungu;

novatone vovihumba veri kongotwe yawo,

nu pokati kawo pena ovakazona

mbu mave tono ozonḓukwa.

26 Tangeye Ndjambi mombongarero yotjiwaṋa tje,

tangeye Muhona,

eṋe mbu mu ri ovombongo ya Israel!

27 Rutenga mape ya Benjamin,

omuhoko omuṱiṱiṱiṱi,

tjazumba a rire ovanane va Juda

puna otjimbumba tjawo,

amave kongorerwa i ovanane

va Sebulon nova Naftali.

28 Raisa omasa woye, Ndjambi,

inga omasa ngu wa ungurisa motjimbe tjetu,

29 okuza mondjuwo yoye mOjerusalem,

ozombara mu ze ku etera oviyandjewa.

30 Vera Engipte, ihi otjipuka tjotuu;

vera oviwaṋa indwi orupanda

rwozondwezu zozongombe nozondana zazo,

nga tji mavi rikotamene kove

nokukupunguhira osilveri yazo.

Rimbarisa oviwaṋa mbyo

mbi suvera okutjita ovita!

31 Ovakuramenepo mave zu kOengipte,

Ovakusa mave yere omake wawo

okukumba ku Ndjambi.

32 Imburireye Ndjambi, oweṋe mauhona wouye,

imbureye ondangero ku Muhona,

33 ku ye ngu ryanga momayuru,

momayuru woruveze orukuru.

Purateneye ku ye ngu ravaera neraka romasa.

34 Zuvariseye ouvara wa Ndjambi;

ounene we u ri kombanda ya Israel,

nomasa we ye ri movikamba.

35 Ndjambi eye omutiriwa,

tji ma zu mondjuwo ye.

Ndjambi wa Israel eye u yandja

omasa nouvara kotjiwaṋa tje.

Ndjambi nga tangwe!