Esekiel 39 - Herero Revision Bible (HRR)

Gog ma haverwa

1 Muhona Ndjambi wa tja nai: “Muatje womundu, senga Gog, omunane otjiuru tjotjiwaṋa tja Mesek notja Tubal; uka ye nu u mu raere kutja ami owami omunavita na ye. 2 Ami me mu tanaurire komuhunga omupe ne mu pitisa kokure komukuma wokeyuva kokunene, nga tje ya kozondundu za Israel. 3 Me tono outa we okuisa mo meke re rokumuho, noviku vye me isa mo meke re rokunene. 4 Gog notjimbumba tje tjovita noverikutevakumwe na ye mave u nave kokere kozondundu za Israel, nami me yandjere kutja oturova twawo tu rire ovikurya vyozonguvi novimbirinyama novyovipuka vyokuti. 5 Owo mave ṱire mouhaiya wokuti. Ami, ngu mbi ri Muhona Ndjambi, owami ngu mba hungire. 6 Ami me yakisa omuriro mehi ra Magog na komikuro avihe vyokuvare ovandu ku ve tura nokuhinongendo, nu auhe ma tjiwa kutja ami owami ngu mbi ri Muhona. 7 Ami, tjiri, me tjiukisa ena randje eyapuke kotjiwaṋa tjandje tja Israel, nami hi nokutarera ena randje amari yambururwa rukwao, notji mavi tjiwa kutja ami, ngu mbi ri Muhona, owami ngu mbi ri Omuyapuke wa Israel.”

8 Muhona Ndjambi wa tja nai: “Eyuva, ndi mba heya, tjiri, mari ya. 9 Ovature vovihuro vya Israel mave piti nu ave kawonga ovirwise mbya isiwa okuyekuviisa po ozonguṋe. Mave yakisa omuriro notuvao nomauta noviku nomanga nozongwinya, nu mave kara nozonguṋe, nḓa yenene koure wozombura hambombari. 10 Owo kamaave katyora ozonguṋe mokuti rukwao poo okukaka omiti movihwa, owo tjinga amave yakisa imbi ovirwise. Owo mave pundu imba mbe ve punda, nave huura imba mbe ve huura.” Muhona Ndjambi ongwa hungire nai.

Ombakero ya Gog

11 Muhona wa tja nai: “Avihe mbi tji vya tjitwa, ami me yandja ku Gog ehi romapakero imo mOisrael, mOtjana tjOvaryange, komuhuka wOmuronga wOmongwa. Gog notjimbumba tje tjovita atjihe mave pakwa mo, notjana hi matji rukwa kutja ‘Otjana tjotjimbumba tjovita tja Gog’. 12 Ovaisrael mape ve kambura oure womieze hambombari okupaka oturova atuhe nokukohorora ehi arihe rukwao. 13 Ovature avehe vehi mave vatere okupaka oturova, nowo mave pewa ondjozikiro mena rotjiṋa hi meyuva routoṋi wandje. Ami, ngu mbi ri Muhona Ndjambi, owami ngu mba hungire. 14 Kombunda yomieze mbi hambombari mape toororwa ovarumendu mbu mave tuurunga ehi arihe okukapaha nokukapaka oturova two ingee tu twa rimbara mehi, kokutja ve kohorore indi ehi. 15 Tjaave ryanga mehi nave munu omaṱupa womundu, aave twa po otjiraisiro meṋe yomaṱupa nga, kokutja imba ovase vomaendo ve yekuyepaka mOtjana tjotjimbumba tjovita tja Gog. 16 Mape kara otjirongo popezu nOtjana hi tji matji rukirwa kotjimbumba tjovita tja Gog. Komuhingo mbwi ehi otji mari kohororwa rukwao.”

17 Muhona Ndjambi wa tja nai ku ami: “Muatje womundu, isana ozonḓera azehe novipuka vyokuti vi ze kominda avihe nu vi yekurya ombunguhiro, ndji mbe vi ṱunina. Oyo mai rire omukandi omunene kozondundu za Israel ku mavi karira onyama nokunwa ombinḓu. 18 Ovyo mavi ri oturova tozombangaṋe zovita, nu avi nu ombinḓu yovanane vehi; avehe mave ṱu otja ozondwezu zozonḓu nozondjona nozongombo nozondwezu zozongombe ozonḓune. 19 Ami tji mba zepa ovandu mba ve rire ozombunguhiro, ozonḓera novipuka vyokuti mavi ri ozonḓura azehe pu mavi yenene, nu avi nu ombinḓu nga tji vya puruka. 20 Ovyo mavi rire potjiriro tjandje imbwi oukambe otja pu mavi yenene novakavire vawo nozombangaṋe novarwe wovita. Ami, ngu mbi ri Muhona Ndjambi, owami ngu mba hungire.”

Okuyarura ko kOisrael koupe

21 Muhona wa tja nai: “Ami me yandjere oviwaṋa kutja vi mune ounene wandje, nu e vi raisire kutja omasa wandje mbi ye ungurisa vi, tji me tjiti ozondyero zandje ozosemba. 22 Ovaisrael mave tjiwa okuza ku nai kutja owami ngu mbi ri Muhona, Ndjambi wawo. 23 Noviwaṋa mavi tjiwa kutja Ovaisrael va ire kouhuura mena romauvi omanene ngu va tjita ku ami. Ami opu mbe ve pera etambo nopu mba yandjerera ovanavita na wo kutja ve ve havere nu ve ve zepe motjirwa. 24 Ami mbe ve pa imbi owo mbi va pwa okumuna mena rouhakohoke wawo nourunde wawo, nami mbe ve pa etambo.”

25 Muhona Ndjambi wa tja nai: “Nungwari nambano ami me ṱotjari nozondekurona za Jakob, ihi otjiwaṋa tja Israel, nu me ze ṋingaparisa rukwao. Ami me pyukire ena randje eyapuke. 26 Owo tji mave tura rukwao nokuhinokurikenda mehi rawo oveni nokuhinomundu ngu meve tanda, mave yenene okuzemba omayambururiro, nga tjitwa ku wo mokundjipataṋa. 27 Ami me kotora otjiwaṋa tjandje okuza komahi aehe ku kwa tura ovanavita na wo, kokutja mbi raisire oviwaṋa ovingi kutja owami Omuyapuke. 28 Otjiwaṋa tjandje otji matji tjiwa kutja owami ngu mbi ri Muhona, Ndjambi watjo. Otjo matji tjiwa otjiṋa hi, ami tjinga ambe tji hindire kouhuura, nu nambano ame tji wongo kutja mbi tji kotore kehi ratjo otjini; nu hi nokuisa nangarire umwe kombunda. 29 Ami me tirire Ombepo yandje kotjiwaṋa tja Israel, nu himee humburuka na tjo rukwao. Ami, ngu mbi ri Muhona Ndjambi, owami ngu mba hungire.”