Ndjambi u ri puna eṱe
Komuimburise. Eimburiro rovazandu va Kora, otja komuimbure wondenga.
1 Ndjambi eye omaundiro nomasa wetu,
aruhe u vatera momauzeu aehe.
2 Otji tu hi nokutira, ehi nanda ri nyinganyinga,
nozondundu nandi za wire mourekoto wokuvare,
3 nokuvare nandi kwa hwaara naku
yumbu ozongazona,
nozondundu nandi za kurakurisiwa
i ondokohero yakwo.
4 Omipupo vyonḓonḓu mavi
yandja enyando kotjihuro
ovandu mu ve rikotamena ku Ndjambi,
ihi tjomaturiro omayapuke wOkombandambanda.
5 Ndjambi u ri moukoto watjo,
notjo kamaatji nyinganyinga ko,
Ndjambi me tji yama menyunguhuka.
6 Eye ma posisa eraka re noviwaṋa mavi mumapara,
nomauhona maye teratera,
nehi arihe mari zengi mondiriro.
7 Muhona Omunamasaaehe u ri puna eṱe,
Ndjambi wa Jakob eye ondjamo yetu.
8 Indjeye, mu yekutara oviungura vya Muhona,
nu mu mune oviṋa ovihimise
eye mbya tjita kombanda yehi.
9 Eye u yandisa ovita mouye auhe,
u teya omauta nomanga,
nu u ningiririsa omatemba wovita nomuriro.
10 “Iseye ovita, nu tjiweye kutja owami Ndjambi,
omunene kombanda yoviwaṋa avihe mouye!”
Eye ma ravaere nai.
11 Muhona Omunamasaaehe u ri puna eṱe,
Ndjambi wa Jakob eye ondjamo yetu.
© Herero Revision Bible © Bible Society in Namibia, 2021.
