Jeremia 47 - Herero Revision Bible (HRR)

Ombuze ya Muhona kehi ra Ovafilisti

1 Ombara ya Engipte ngunda ai hiya rwisa Gasa, Muhona wa hungirira ehi rOvafilisti notjinyo tjandje, 2 na tja:

“Tara, omipupo mavi sekama komukuma wokeyuva kokunene,

nu mavi pupu nomasa otja onḓonḓu ndja tanana omikuro.

Ovyo mavi rimbara kombanda yehi navi vandeke

oviṋa avihe mbi ri mu ro, ovihuro novandu mba tura mu vyo.

Ovandu mave ku ombatero; nu ngamwa

auhe kombanda yehi ma riri tjinene,

3 orondu mave zuu ombosiro yovikoti vyoukambe,

nomaporokotero womatemba wovita,

nongwaṋa yomarama wawo.

Ooihe kave nokurikenda novanatje vawo;

omaoko wawo maye rekareka aya pungara.

4 Oruveze rwokunyona ehi ra Filistie rweya,

indwi oruveze rwokutjaera ombatero osenina

ndja tja i ya kOtirus na kOsidon.

Tjiri, ami, ngu mbi ri Muhona, me yandeke Ovafilisti,

imba avehe mba za komikuro vyokuvare kwa Krete.

5 Pe nondjenda onene kotjiwaṋa tja Gasa,

nomamwinino kovature va Askelon.

Ovafilisti mba sewa po mave kara noruhoze nga ruṋe?

6 Ove mo ravaere nai: ‘Ngaruvyo ra Muhona!

Mo kara nokuhinorusuwo nga ruṋe?

Twende kotjihweka tjoye,

u kasuve nu u hirimane!’

7 Nungwari oro mari hirimana vi ngunda

amba yandja oviungura ku ro okuungura?

Ami mbe ri rakiza kutja ri rwise Askelon,

novandu mba tura meṋe yokuvare.”